1 ᤂᤧᤴ ᤕᤧᤶᤔᤥ ᤖᤥᤔᤡ ᤐᤕᤶ ᤜᤠᤱ ᤀᤃᤛ᤻ᤋᤛᤧᤸᤗᤧ ᤁᤧᤖᤧᤰ ᤖᤥᤔᤡ ᤜᤠᤱᤈᤢᤶᤔᤥ ᤕᤠᤶᤏᤠ᤺ᤳᤏᤡ᤺ᤳ ᤆᤥ᤺ᤰᤔᤠ ᤑᤠ᤹ᤀᤠᤱ ᤀᤡᤱᤍᤳ ᤐᤡᤖᤢᤛᤡ॥ 2 ᤁᤴ ᤌᤡᤰᤛᤡᤃᤣ᤺ᤰᤐᤠ ᤕᤠᤶᤏᤠ᤺ᤳᤏᤡ᤺ᤳ ᤔᤧᤈᤥᤃᤢᤸᤗᤧ ᤛᤡᤖᤡᤕᤠ ᤌᤢᤶᤔᤥᤒᤠ ᤛᤢᤜᤠᤱᤃᤧᤶᤒᤠ ᤁᤢᤖᤣᤏᤡᤕᤛ ᤘᤕᤧ॥ 3 ᤁᤧᤖᤧᤰ ᤔᤏᤠᤜᤠ᤹ ᤕᤠᤶᤏᤠ᤺ᤳᤏᤡ᤺ᤳᤋᤥ ᤔᤡᤱ ᤛᤠᤵᤛᤧ ᤀᤠᤒᤠᤅᤣ ᤐᤠᤱᤈᤢᤶᤔᤥ ᤔᤧᤒᤣ॥
4-5 ᤜᤧᤰᤁᤣ᤺ᤸᤗᤧ ᤕᤢᤛᤢᤑᤧᤴᤏᤠᤱ ᤃᤠᤗᤡᤗ ᤌᤢᤶᤔᤥᤒᤠ ᤏᤠᤛᤖᤋ ᤐᤠᤱᤓᤣ᤹ᤀᤥᤗᤠᤶ ᤕᤜᤢᤍᤡᤕᤠᤛ᤻ᤔᤠ ᤍᤠᤀᤢᤍᤖᤧ ᤁᤢᤒᤠᤱᤈᤢᤶ ᤒᤧᤌᤗᤣᤜᤧᤶᤔᤥ ᤔᤡᤱ ᤛᤠᤵᤛᤧ ᤌᤠᤛᤡᤱ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ ᤘᤕᤧ॥ ᤂᤢᤏᤧ᤹ ᤁᤢᤔᤣ᤺ᤰᤂᤡᤶ ᤐᤠ᤺ᤴ ᤁᤧᤒᤢ᤹ᤔᤠᤀᤠᤱ ᤁᤧᤘᤠ᤹ᤔᤠ ᤔᤖᤡᤕᤶᤔᤡᤴᤏᤢ ᤐᤣ॥ ᤂᤧᤴ ᤕᤧᤶᤔᤥ ᤂᤢᤏᤧ᤹ ᤔᤧᤴᤇᤢᤰᤔᤠ ᤘᤕᤧᤖᤥ॥ 6 ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤘᤕᤧᤳᤇᤡᤸᤗᤧ ᤔᤖᤡᤕᤔᤖᤧ ᤁᤢᤛᤠᤃᤵᤔᤠ ᤕᤧᤶ ᤋᤩᤧᤀᤠᤱ 7 ᤛᤠᤍᤢᤱᤅᤡᤸᤗᤧ ᤋᤖᤢ. ᤜᤧᤰᤁᤩᤠᤱ ᤋᤢᤶᤒᤠ ᤕᤧᤶᤒᤡᤳᤇᤠ᤹ᤛᤠ᤺ᤴ ᤛᤠᤘᤠ᤺ᤴᤍᤢᤀᤠᤱ ᤂᤧᤴ ᤀᤅᤧ᤺ᤰᤘᤠ᤺ᤴ ᤋᤣ᤺ᤳᤋᤡᤸᤗᤧ ᤛᤢᤅᤢᤀᤠᤱ ᤘᤠᤄᤥ᤺ᤱᤅᤥ ᤏᤧᤛ᤻ᤛᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤆᤧᤕᤠᤱᤎᤥ᤺ᤰᤁᤥ ᤕᤠᤱᤎᤥ᤺ᤰᤔᤠ ᤔᤧᤄᤥ᤺ᤛᤧᤳᤇᤢᤴᤗᤥ॥
13 ᤂᤧᤵᤔᤥ ᤜᤰᤆᤄᤳ ᤕᤖᤡᤰ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤎᤠ᤺ᤶᤛᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤖ ᤀᤰᤂᤣ ᤔᤧᤒᤠ᤺ᤳᤋᤢ.
15 ᤜᤧᤰᤁᤩᤠᤱ ᤂᤧᤴ ᤔᤠᤱᤗᤠᤀᤡᤱᤒᤠᤜᤠ᤹ ᤕᤠᤱᤎᤥ ᤛᤠᤱᤃᤪᤠᤶᤐᤣᤍᤠᤱᤅᤥ ᤔᤧᤏᤢ᤺ᤰᤂᤧ ᤔᤧᤒᤣ. ᤜᤧᤰᤁᤩᤠᤱ ᤂᤧᤴ ᤔᤧᤸᤗᤢᤰᤁᤶᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤀᤠᤏᤡ᤹ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤀᤠᤶᤔᤧᤳᤋᤧᤒᤠ ᤜᤧᤰᤁᤣ ᤒᤧᤌᤗᤣᤜᤧᤶᤔᤥ ᤁᤧᤒᤥ᤺ᤱᤒᤠ ᤐᤠ᤺ᤴᤏᤡᤴ ᤐᤣᤃᤡᤀᤠᤱ ᤀᤥᤔᤧᤳᤋᤢᤶᤗᤥ॥”
16 ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤖᤠ ᤔᤧᤈᤠᤳᤋᤧᤖ ᤒᤧᤌᤗᤣᤜᤧᤶᤔᤥ ᤔᤧᤒᤣ॥ ᤂᤧᤵᤔᤥ ᤕᤢᤛᤢᤑ ᤏᤢ ᤔᤖᤡᤕᤔ ᤜᤧᤰᤁᤩᤠᤱ ᤘᤠᤄᤥ᤺ᤱᤅᤥ ᤔᤧᤀᤡᤵᤋᤢᤀᤠᤱ ᤏᤧᤛ᤻ᤛᤧᤒᤠ ᤀᤅᤧ᤺ᤰᤘᤠ᤺ᤴ ᤔᤧᤍᤢᤔᤢᤖᤥ॥ 17 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤔᤧᤏᤡ᤺ᤛᤢᤀᤠᤱ ᤂᤧᤱᤜᤠ᤹ ᤀᤅᤧ᤺ᤰᤘᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤔᤧᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤔᤧᤈᤧᤰᤋᤢᤛᤡᤖᤥ॥ 18 ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ 19 ᤁᤖ ᤔᤖᤡᤕᤶᤔᤡᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤏᤡᤱᤘᤠ᤹ ᤛᤡᤃᤠᤱ ᤕᤢᤰᤂᤢᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤗ ᤘᤕᤧᤖᤥ॥ 20 ᤜᤧᤰᤁᤩᤠᤱ ᤂᤧᤴ ᤔᤧᤸᤗᤢᤰ ᤁᤶᤒᤠᤜᤠ᤹ᤖᤧ ᤔᤠᤱᤗᤠᤀᤡᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤒᤠ ᤔᤧᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤔᤧᤈᤥᤃᤢᤖ ᤁᤢᤏᤠᤖᤠ ᤔᤧᤓᤥ᤺ᤛᤢᤖ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥
25 ᤀᤠᤸᤗ ᤕᤖᤢᤛᤗᤧᤶᤔᤥ ᤛᤡᤔᤡᤕᤥᤏ ᤔᤧᤵᤔᤏᤠᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤴ ᤛᤠᤶᤕᤥᤏᤡᤒᤠ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧ॥ ᤂᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤔᤡᤰᤘᤠ ᤁᤧᤍᤢ᤺ᤰᤐᤧᤴ ᤜᤠᤱᤄᤢᤖ ᤘᤕᤧᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤌᤡᤶᤛᤢᤀᤠᤱ 26 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤁᤧᤏᤡ᤺ᤛᤢᤀᤠᤱᤗᤰ ᤁᤧᤔᤠᤛᤡᤱᤗᤥ ᤗ᤹ᤖᤡᤰ ᤛᤣᤛᤣᤔᤠᤱᤅᤡᤸᤗᤧ ᤀᤥᤛᤣ᤺ᤴᤎᤠᤰᤋᤢᤀᤠᤱ ᤘᤕᤧᤖᤥ॥ 27 ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤗᤥᤛᤢᤀᤠᤱ ᤂᤢᤏᤧ᤹ ᤔᤠᤱᤜᤡᤶᤔᤥ ᤋᤣ᤹ᤖᤢ॥ ᤂᤧᤵᤔᤥ ᤕᤢᤛᤢᤑ ᤏᤢ ᤔᤖᤡᤕᤔᤖᤧ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤀᤅᤧ᤺ᤰᤘᤠ ᤕᤧᤛᤢ᤺ᤴ ᤋᤥ᤺ᤶᤔᤠ ᤑᤠ᤹ᤀᤠᤱ ᤋᤠᤖᤧᤳᤇᤢᤸᤗᤧ 28 ᤛᤡᤔᤡᤕᤥᤏᤖᤧ ᤁᤢᤜᤢᤰᤁᤥ ᤀᤅᤧ᤺ᤰᤘᤠ᤺ᤴ ᤐᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖ ᤀᤰᤂᤣ ᤐᤠ᤺ᤳᤋᤢ.
33 ᤀᤅᤧ᤺ᤰᤘᤠ᤺ᤸᤗᤧ ᤁᤢᤔᤧᤴᤏᤥ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤳᤇᤢᤀᤠᤱ ᤛᤠ᤹ᤖᤡᤰ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧᤖᤥ॥ 34 ᤜᤧᤰᤁᤩᤠᤱ ᤛᤡᤔᤡᤕᤥᤏᤖᤧ ᤂᤧᤱᤜᤠ᤹ ᤔᤢ᤹ᤀᤡᤛᤠᤶ ᤌᤠ᤺ᤛᤢ ᤐᤡᤖᤢᤛᤡᤖ ᤔᤖᤡᤕᤶᤔᤡᤴ ᤔᤧᤳᤋᤢ. “ᤁᤴ ᤀᤅᤧ᤺ᤰᤘᤠ᤺ᤴ ᤀᤡᤛᤪᤠᤀᤡᤸᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤐᤥᤃᤧᤱᤔᤠ ᤏᤢ ᤛᤒᤵᤔᤠᤖᤧᤴ ᤔᤡᤰᤛᤣ᤺ᤴ ᤐᤥ᤺ᤱᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤗᤥ॥ 35 ᤜᤧᤰᤁᤣ᤺ᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤌᤠ᤺ᤵᤗᤥ॥ ᤜᤧᤰᤁᤩᤠᤱ ᤋᤢᤰᤂᤣᤖᤧ ᤂᤠᤃᤧᤛᤢᤰᤐᤠ ᤋᤠᤓᤣ᤺ᤸᤗᤧ ᤁᤢᤀᤡᤛᤡ᤺ᤰ ᤁᤧᤗᤢᤱᤔᤠ᤹ᤀᤡᤴ ᤗᤛ᤻ᤛᤢ᤹ᤖᤥ॥”
36 ᤜᤧᤰᤁᤩᤠᤱ ᤂᤧᤵᤔᤥ ᤀᤠᤛᤣᤖ ᤛᤢᤘᤠᤱᤒᤠ ᤑᤏᤢᤀᤧᤗᤖᤧ ᤁᤢᤛ᤻ᤛᤠ᤺ ᤜᤴᤏᤠ ᤔᤧᤵᤔᤏᤠᤔᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤔᤠ ᤛᤠᤶᤕᤥᤏᤡᤔᤠ ᤏᤢ ᤛᤣᤘᤠᤖᤥᤔᤠᤎᤡᤰ ᤘᤕᤧ॥ ᤂᤧᤴ ᤁᤢᤔᤣ᤺ᤰᤂᤡᤶ ᤐᤥ᤺ᤰᤂᤧᤀᤠᤱ ᤏᤢᤛᤡ (᥍) ᤋᤱᤒᤣ ᤌᤠᤖᤡᤰ ᤁᤢᤕᤧᤶᤒᤠ᤺ᤴᤏᤢ ᤛᤥᤖᤡᤰ ᤘᤕᤧᤳᤇᤡ ᤜᤧᤰᤁᤩᤠᤱ ᤁᤢᤕᤧᤶᤒᤠ᤹ᤀᤡᤴ ᤔᤠᤛᤡᤱᤅᤠᤱ ᤔᤣᤔᤣᤍᤢᤔᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥ 37 ᤂᤢᤏᤧ᤹ ᤋᤱᤒᤣ ᤕᤧᤳ-ᤗᤡ (᥎᥊) ᤁᤧᤃᤧᤵᤔᤠ ᤁᤠᤵᤔᤥᤔᤠ ᤘᤕᤧᤖᤥ॥ ᤂᤧᤸᤗᤧ ᤔᤠᤱᤜᤡᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤸᤗᤧᤳᤋᤣ ᤛᤧᤴᤍᤡᤰ ᤗᤧᤴᤍᤡᤰ ᤆᤠ᤺ᤏᤧᤳ ᤕᤢᤅᤧᤖ ᤋᤢᤘᤠ ᤆᤥᤃᤧᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠ ᤆᤥᤃᤢᤖ ᤘᤕᤧᤖᤥ॥ 38 ᤂᤧᤴ ᤕᤧᤶᤔᤥ ᤂᤧᤵᤔᤥ ᤋᤩᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤆᤥ᤺ᤰᤕᤢᤶᤓᤥ ᤁᤧᤜᤠᤱᤒᤠ ᤔᤏᤠᤜᤠ᤹ ᤀᤅᤧ᤺ᤰᤘᤠ᤺ᤸᤗᤧ ᤁᤢᤔᤧᤴᤏᤥ ᤔᤧᤳᤋᤢᤛᤡᤖᤥ॥
49 ᤕᤧᤛᤢᤖᤧ ᤛᤣ᤺ᤴᤍᤥᤛᤢᤛᤡ. “ᤐᤠᤏᤢᤍᤡᤱ ᤀᤠᤶᤒᤦ ᤀᤠᤶᤔᤦ. ᤌᤣᤀᤠᤱ ᤕᤠᤵᤔᤡ ᤁᤧᤃᤥ᤺ᤳᤇᤡᤒᤠᤒᤣ᥅ ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤜᤡᤶᤔᤥ ᤘᤠ᤹ᤔᤠ ᤐᤥ᤺ᤱ ᤑᤠ᤹ᤀᤠᤱ ᤂᤡᤴᤇᤡ᤹ ᤁᤧᤴᤏᤡ᤺ᤛᤧᤳᤇᤢᤴᤒᤡ᥅” 50 ᤁᤖ ᤁᤴ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤧᤳᤇᤢᤴᤗᤥ॥
51 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠ ᤁᤢᤶᤔᤠᤛᤡᤏᤢ ᤏᤠᤛᤖᤋᤀᤥ ᤐᤣ॥ ᤂᤢᤏᤧ᤹ᤃ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤴᤇᤡ᤹ ᤐᤠ᤺ᤴ ᤁᤧᤄᤧᤶᤒᤠ ᤘᤕᤧ॥ ᤁᤢᤶᤔᤠᤖᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤏᤡᤱᤘᤠ᤹ ᤛᤡᤃᤠᤱ ᤕᤢᤰᤂᤢᤖᤥ॥ 52 ᤀᤰᤂᤣᤗ᤹ᤖᤡᤰ ᤕᤧᤛᤢ᤺ᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤏᤠᤛᤡᤱᤃᤧᤴ ᤌᤰᤁᤥ ᤏᤡᤱᤘᤠ᤹ᤑᤢᤔᤠᤱ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤖᤧ ᤂᤢᤏᤡ᤹ ᤗᤢᤱᤃᤢᤶᤔᤥ ᤐᤥ᤺ᤖᤧᤖ ᤐᤣᤖᤥ॥
<- ᤗᤢᤁᤠ 1ᤗᤢᤁᤠ 3 ->