᥈ ᤁᤥᤖᤴᤌᤡ 9

ᤕᤖᤢᤛᤗᤧᤶᤛᤔᤠ ᤏᤛᤠᤏᤡᤒᤠᤜᤠ᤹ᤖᤧ ᤗᤠᤃᤡ ᤁᤢᤓᤠ᤹ᤕᤠᤱ

1 ᤕᤖᤢᤛᤗᤧᤶᤛᤔᤠ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡ ᤁᤢᤓᤠ᤹ ᤕᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤛᤠᤵᤔᤠᤖ ᤏᤧᤔᤠ ᤀᤡᤱᤃᤠ᤹ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴᤗᤥ॥ 2 ᤌᤣᤀᤠᤱᤓᤧᤸᤗᤧ ᤁᤢᤓᤠ᤹ ᤐᤡᤖᤢᤶᤛᤡᤶ ᤁᤧᤗ᤹ᤒᤠ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤀᤡᤱᤃᤠ᤹ ᤏᤡ᤺ᤛᤢᤱ. ᤜᤧᤰᤁᤩᤠᤱ ᤂᤡᤏᤡ᤹ ᤀᤰᤂᤤᤕᤠ ᤌᤢᤶᤔᤥ ᤁᤧᤘᤠ᤹ᤒᤠᤜᤠ᤹ ᤁᤢᤓᤠ᤹ ᤐᤡᤔᤠ ᤕᤠ᤺ᤶᤒᤰᤁᤥ ᤔᤡ᤺ᤳᤗᤡᤱᤅᤠᤱᤎᤥᤀᤣ ᤕᤠᤖᤡᤵ ᤁᤧᤘᤕᤡᤒᤠᤸᤗᤧ ᤀᤡᤱᤃᤠ᤹ ᤀᤠᤏᤧᤒᤥ ᤐᤥ᤺ᤖᤧᤀᤠᤱ ᤘᤠ᤹ᤒᤠ ᤐᤠ᤺ᤴᤏᤡᤴ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤒᤠ ᤔᤏᤠᤜᤠ᤹ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤢᤓᤠ ᤐᤡᤔᤠ ᤕᤠᤖᤡᤵ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤀᤥ ᤕᤖᤡᤰᤗᤧ ᤁᤢᤓᤠ ᤐᤡᤔᤠ ᤕᤠᤶᤈᤠᤱᤘᤠ ᤔᤧᤄᤥ᤺ᤛᤢᤀᤠᤱ ᤔᤧᤘᤠ᤹ᤖᤥ॥ 3 ᤜᤧᤰᤁᤩᤠᤱ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤡᤱᤃᤠ᤹ ᤀᤠᤏᤧᤒᤥ ᤐᤥ᤺ᤖᤧᤒᤠ ᤐᤠ᤺ᤴᤏᤡᤴ ᤜᤏᤧ ᤔᤧᤒᤥ᤺ᤱᤅᤡᤴᤗ ᤁᤖ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤕᤠᤖᤡᤵ ᤁᤧᤒᤥ᤺ᤰᤂᤡᤀᤠᤱ ᤁᤧᤕᤢᤅᤡᤖ ᤑᤠ᤹ᤀᤠᤱ ᤋᤃᤡᤀᤣ ᤁᤵᤔᤥᤗᤠᤶ ᤑᤢ᤹ᤏᤢᤛᤠ᤹ᤜᤠ᤹ ᤂᤡᤏᤡ᤹ᤀᤥ ᤐᤠᤱᤄᤢᤱᤛᤡᤱᤗ ᤐᤳᤋᤠᤖᤥ॥ 4 ᤁᤢᤓᤠ ᤔᤧᤛᤣᤍᤥᤏᤡᤕᤠᤒᤠ ᤔᤏᤠᤜᤠ᤹ ᤀᤡᤱᤃᤠ᤹ᤏᤢ ᤂᤧᤵᤔᤥ ᤔᤧᤍᤠ᤺ᤸᤗᤧ ᤀᤡᤱᤃᤠ᤹ ᤔᤧᤳᤋᤢᤱᤛᤡᤱᤒᤠ ᤁᤢᤀᤡᤛᤡ᤺ᤰ ᤂᤧᤴ ᤕᤠ᤺ᤶᤒᤰᤁᤥ ᤕᤠᤖᤡᤵ ᤔᤧᤶᤒᤥ᤺ᤱᤅᤣ ᤁᤧᤘᤕᤡᤒᤠ ᤁᤧᤶᤍᤢᤔᤡᤏᤧ ᤑᤠ᤹ᤃᤪ ᤀᤠᤏᤡᤃᤧᤖᤰ ᤔᤧ᤺ᤴ. ᤁᤖ ᤂᤡᤏᤡ᤹ᤀᤠᤱ ᤛᤠ᤹ᤖᤡᤰ ᤛᤡᤖᤡᤱᤔ᤺ᤔᤥ ᤁᤧᤎᤩᤧ᤹ᤀᤡᤖᤥ॥ 5 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤔᤠᤱᤜᤧᤰ ᤁᤧᤈᤥᤃᤢᤶᤒᤠ ᤁᤢᤀᤡᤛᤡ᤺ᤰ ᤁᤢᤓᤠ᤹ ᤕᤠᤱᤅᤡᤴ ᤕᤠᤖᤡᤵ ᤆᤥ᤺ᤰᤔᤠ ᤁᤧᤛᤢᤰᤋᤢᤶᤗ ᤑᤠ᤹ᤀᤠᤱ ᤂᤧᤴ ᤑᤢ᤹ᤏᤢᤛᤠ᤹ᤜᤠ᤹ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤂᤡᤏᤡ᤹ᤀᤥ ᤐᤠᤱᤔᤠᤛᤡ ᤏᤢ᤺ᤒᤠ ᤐᤥ᤺ᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤜᤧᤰᤁᤣ᤺ᤸᤗᤧ ᤂᤧᤴ ᤁᤢᤓᤠ᤹ ᤕᤠᤱᤅᤡᤱᤃ ᤏᤡᤱᤘᤠ᤹ ᤋᤢᤰᤗ ᤔᤧ᤺ᤴ. ᤁᤖ ᤏᤡᤱᤘᤠ᤹ ᤜᤶᤔᤠᤀᤠᤱ ᤐᤡᤔᤠ ᤐᤥ᤺ᤱᤗᤥ॥

6 ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤀᤠᤳᤋᤡᤸᤗᤧ ᤆᤩ᤹ᤖᤰ ᤕᤠ᤹ᤖᤡ᤺ᤶᤒᤧᤴ ᤜᤣ᤹ᤖᤢ. ᤂᤧᤸᤗᤧ ᤆᤩ᤹ᤖᤰ ᤆᤠ ᤛᤢᤵᤛᤢ᤹ᤖᤥ॥ ᤀᤠᤳᤋᤡᤸᤗᤧ ᤕᤖᤡᤰ ᤕᤠ᤹ᤖᤡ᤺ᤶᤒᤠ ᤜᤣ᤹ᤖᤢ. ᤂᤧᤸᤗᤧ ᤕᤖᤡᤰᤁᤣ ᤆᤠ ᤛᤢᤵᤛᤢ᤹ᤖᤥ॥ 7 ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤴᤍᤧᤴᤏᤣ ᤔᤧ᤺ᤴ. ᤁᤖ ᤁᤶᤔᤩᤠᤰ ᤐᤡᤔᤠ ᤛᤢᤰᤋᤢᤶᤒᤧ᤹ ᤗ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ᤀᤥ ᤏᤡ᤺ᤴᤎᤥ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰ ᤔᤧᤒᤡᤖᤢᤖᤖᤥ॥ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤢᤛᤡᤖᤠ᤹ ᤌᤠᤱᤗ ᤐᤡᤖᤢ᤹. ᤂᤧᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤋᤢᤰᤋᤢ᤹ᤖᤥ॥ 8 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥᤃᤡᤒᤠᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤧᤒᤡᤖᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ ᤛᤍᤠᤍᤡᤱ ᤁᤧᤃᤳᤋᤢᤶᤔᤠᤱ ᤁᤠᤰ ᤏᤢ᤺ᤒᤠ ᤕᤠ᤺ᤶᤒᤰᤁᤥ ᤕᤖᤡᤰ ᤐᤡᤔᤠ ᤁᤧᤛᤢᤰᤋᤢᤶᤗᤥ॥ 9 ᤀᤰᤂᤣᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ.

“ᤏᤡᤱᤘᤠ᤹ ᤁᤧᤜᤶᤒᤠᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤒᤡᤒᤠᤜᤠ᤹ᤖᤧ ᤂᤢᤏᤡ᤹ ᤏᤢ᤺ᤒᤠ ᤕᤠ᤺ᤶᤒᤰᤁᤡᤴ ᤛᤍᤠᤍᤡᤱ ᤛᤍᤠᤍᤡᤱ ᤘᤠ᤹ᤖᤥ॥”[a]

10 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠ᤺ᤴᤁᤧᤔ᤺ᤒᤠᤜᤠ᤹ ᤕᤠ᤹ᤖᤡ᤺ᤶᤒᤠ ᤐᤡᤖᤢᤛᤡ ᤜᤧᤰᤁᤩᤠᤱ ᤆᤠᤔᤠ ᤁᤢᤈᤠ ᤐᤡᤖᤢᤛᤡ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ᤀᤣ ᤂᤡᤏᤡ᤹ ᤁᤧᤃᤳᤋᤢᤶᤒᤠᤴᤏᤠᤱ ᤑᤥ᤺ᤛᤢ᤹ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤢ᤺ᤒᤠ ᤕᤠ᤺ᤶᤒᤰᤁᤡᤴ ᤑᤥ᤺ᤛᤢ᤹ ᤁᤧᤒᤡᤖᤡ᤹ᤖᤥ॥

11 ᤂᤡᤏᤡ᤹ᤃ ᤏᤡᤱᤘᤠ᤹ ᤜᤶᤔᤠᤀᤠᤱ ᤐᤡᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤐᤖᤡᤰᤗᤧ ᤔᤢ᤹ᤀᤡᤛᤠᤒᤠ ᤁᤧᤈᤥᤃᤡ᤹ᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤧ ᤂᤡᤏᤡ᤹ ᤁᤧᤛᤢᤵᤛᤢᤶᤒᤠ ᤁᤢᤓᤠ᤹ ᤕᤠᤱᤅᤡᤴ ᤆᤠᤜᤠᤒᤥ ᤁᤧᤘᤠ᤹ᤒᤠᤜᤠ᤹ ᤐᤡᤖᤢᤶᤛᤡᤶᤒᤧᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤔᤧᤒᤡᤖᤢ᤹ᤖᤥ॥ 12 ᤂᤡᤏᤡ᤹ ᤁᤧᤛᤢᤵᤛᤢᤶᤒᤠ ᤁᤢᤓᤠ᤹ ᤕᤠᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤆᤠᤜᤠᤒᤠ ᤔᤧᤈᤥᤃᤧᤀᤠᤱ ᤔᤧᤘᤕᤧᤒᤠᤀᤥ ᤁᤢᤓᤠ᤹ᤖᤰ ᤔᤧᤒᤥ᤺ᤰᤂᤧᤴ ᤁᤖ ᤁᤴ ᤕᤠ᤺ᤶᤒᤰᤁᤡᤸᤗᤧᤃ ᤕᤖᤡᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤔᤧᤒᤡᤖᤢᤖᤥ॥ 13 ᤁᤴ ᤔᤠᤱᤛᤣᤘᤠ ᤕᤠ᤺ᤶᤒᤰᤁᤥᤗᤠᤶ ᤂᤡᤏᤡ᤹ ᤀᤠᤰᤋᤱᤒᤠ ᤁᤧᤈᤥᤃᤡ᤹ ᤁᤧᤗ᤹ᤒᤠᤴ ᤘᤣ᤹ᤜᤠ᤹ ᤀᤥᤛᤣ᤺ᤴᤃᤧᤎᤠᤰᤋᤢᤶᤛᤡᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱᤅᤡᤴ ᤏᤛᤠ᤺ᤴ ᤁᤧᤈᤥᤃᤢᤶᤔᤠᤱ ᤀᤡᤱᤈᤠ᤺ᤱᤃᤧᤶᤒᤠ ᤁᤧᤒᤥ᤺ᤰᤂᤡᤒᤠᤴ. ᤜᤧᤰᤁᤩᤠᤱ ᤁᤧᤃᤳᤋᤢᤶᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤏᤡᤱᤘᤠ᤹ ᤁᤧᤜᤴᤍᤢᤶᤔᤠᤱ ᤁᤧᤖᤧᤰ ᤁᤧᤜᤠ᤺ᤳᤋᤢᤶᤛᤡᤶᤒᤠᤴ ᤔᤧᤏᤡ᤺ᤛᤢᤒᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢ᤹ᤖᤥ॥ 14 ᤜᤧᤰᤁᤩᤠᤱ ᤂᤡᤏᤡ᤹ᤀᤥᤗᤠᤶ ᤁᤧᤍᤠ᤺ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧᤃ ᤛᤡᤰᤗᤢᤱᤔᤥᤗᤠᤶ ᤂᤡᤏᤡ᤹ᤗᤠᤃᤡ ᤋᤢᤘᤠ ᤔᤧᤈᤥᤃᤢ᤹ᤖᤥ॥

15 ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤁᤢᤒᤷᤎᤠᤶᤔᤡᤸᤗᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ᥄

<- ᥈ ᤁᤥᤖᤴᤌᤡ 8 ᥈ ᤁᤥᤖᤴᤌᤡ 10 ->