1 ᤀᤠᤸᤗ ᤛᤣᤛᤣᤔᤠᤱᤅᤡᤸᤗᤧ ᤏᤢ᤺ᤖᤡᤰᤁᤠᤱ ᤀᤠᤏᤡ᤹ ᤀᤰᤂᤣ ᤀᤠᤔᤧᤳᤋᤧᤀᤠᤱ ᤀᤠᤘᤠ᤹ᤖᤥ. ᤋᤠ᤺ᤴᤍᤡ ᤁᤧᤍᤠ᤺ᤒᤠ ᤕᤧᤶᤔᤥ ᤁᤢᤓᤠ ᤔᤏᤠᤜᤠ᤹ᤖᤧ ᤏᤛᤠ᤺ᤴᤏᤡᤴ ᤔᤧᤗᤧᤖᤢᤀᤠᤱ ᤀᤡᤱᤗᤧᤰᤁᤣᤒᤠ ᤑᤧᤴᤛᤠᤶᤜᤠ᤹ᤖᤧ ᤔᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤒᤢᤱᤅᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ᤹ᤖᤥ॥ 2 ᤁᤴ ᤏᤡᤛᤠᤶᤜᤠ᤹ᤃ ᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤋᤠ᤺ᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤠᤛᤡᤱᤅᤡᤱᤃ ᤁᤧᤃᤥ᤺ᤒᤠ ᤑᤧᤴᤈᤣ᤹ᤀᤡᤸᤗᤧ ᤕᤧᤶᤔᤠᤀᤠᤱ ᤁᤧᤎ᤺ᤵᤐᤠ ᤁᤧᤒᤥ᤺ᤱᤒᤠ ᤁᤢᤀᤡᤛᤡ᤺ᤰ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤄᤥ᤺ᤔᤏᤠᤒᤠ ᤐᤥ᤺ᤱᤗᤥ॥ 3 ᤂᤧᤱᤜᤠ᤹ᤖᤧᤃ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤏᤢ ᤁᤢᤓᤠ ᤁᤢᤈᤠ ᤁᤢᤎᤡ ᤆᤠᤔᤠ ᤌᤢᤱᤔᤠᤀᤠᤱ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤔᤏᤠᤜᤠ᤹ ᤔᤧᤜᤢ᤹ᤖᤢᤛᤡᤖᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤠᤔᤠ ᤑᤠ᤹ᤀᤠᤱ ᤆᤥᤃᤢᤒᤠ ᤆᤠᤔᤠ ᤌᤢᤱᤔᤠᤜᤠ᤹ ᤏᤛᤠ᤺ᤴᤛᤠᤒᤠ ᤏᤢ ᤛᤧᤰᤂᤠ ᤐᤠ᤺ᤴ ᤁᤧᤏᤡ᤺ᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤔᤠᤀᤠᤱ ᤆᤠᤔᤠ ᤏᤢ᤹ᤖᤥ॥ 4 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤢ᤺ᤒᤠ ᤆᤥ᤺ᤰᤗᤥ॥ ᤜᤧᤰᤁᤩᤠᤱ ᤀᤵᤔᤠ ᤔᤧᤏᤢ᤹ᤏᤧᤴᤗᤥ. ᤁᤖ ᤏᤥᤃᤧᤴ ᤐᤡᤔᤠᤀᤠᤱ ᤋᤧᤴᤍᤡᤱᤃᤧᤴ ᤛᤢᤍᤠ᤺ᤰᤔᤠ ᤏᤢ᤹ᤖᤥ॥ 5 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤢ ᤐᤣᤗᤡᤃᤧᤴ ᤋᤢᤘᤠ᤺ᤸᤗᤧ ᤁᤠᤰ ᤛᤣᤛᤣ ᤆᤥᤃᤢ᤹ᤖᤥ॥

6 ᤁᤴ ᤐᤠ᤺ᤴᤜᤠ᤹ ᤂᤧᤏᤧ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤁᤧᤜᤢ᤹ᤖᤢᤛᤡ ᤜᤧᤰᤁᤩᤠᤱ ᤁᤧᤏᤠ᤺ᤳᤋᤢ ᤁᤧᤀᤡ᤺ᤳᤋᤢᤒᤠ ᤛᤧᤰᤂᤠ ᤏᤡᤛᤠᤶ ᤏᤢ ᤏᤛᤠ᤺ᤴᤃᤧᤴ ᤐᤠ᤺ᤴᤈᤠᤰᤁᤥ ᤁᤧᤜᤢ᤹ᤛᤡᤱᤗ ᤁᤧᤎᤠᤱᤏᤧ ᤑᤠ᤹ᤃᤪ ᤂᤧᤏᤧ᤹ᤃ ᤂᤪᤡᤛ᤻ᤋ ᤕᤧᤛᤢᤖᤧ ᤏᤢ᤺ᤒᤠ ᤁᤢᤛᤣᤘᤠᤖᤥᤒᤠ ᤁᤧᤒᤥ᤺ᤱᤗᤥ॥ 7 ᤁᤖ ᤂᤧᤏᤧ᤹ ᤁᤢᤒᤢᤱᤏᤠ ᤁᤢᤛᤶᤒᤠ ᤜᤏᤧᤒᤠ ᤂᤧᤍᤠ᤹ᤜᤠ᤹ᤗᤠᤶ ᤔᤠ᤺ᤱᤄᤠᤀᤣ ᤘᤕᤧ᤹ᤀᤥ॥ ᤂᤧᤴᤏᤢ᤺ᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥ᤺ᤰᤔᤠ ᤛᤎᤠᤛᤡᤱᤅᤧ᤹ᤀᤥ॥ 8 ᤏᤠᤛᤡᤱᤃᤧᤴ ᤌᤰ ᤛᤎᤠᤛᤡᤱᤔᤠᤸᤗᤧ ᤁᤢᤓᤠᤖᤰ ᤀᤡᤴᤎᤠ᤺ᤱ ᤀᤠᤒᤡ᤹. ᤁᤖ ᤕᤠᤶᤛᤠᤶᤃᤧᤴ ᤛᤎᤠᤛᤡᤱᤔᤠᤗᤠᤶ ᤁᤠᤰ ᤐᤖᤡᤰᤗᤧᤴ ᤀᤡᤴᤎᤠ᤺ᤱ ᤀᤠᤄᤥ᤺ᤛᤢᤶ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥ ᤜᤡᤱᤔᤴᤗᤧᤴ ᤔᤠᤱᤜᤧᤰᤁᤡᤴ ᤁᤴ ᤕᤧᤶᤔᤥᤒᤠ ᤏᤢ ᤋᤠᤕᤧᤶᤔᤥᤒᤠ ᤜᤡᤱᤔᤴᤏᤥ ᤀᤠᤄᤥ᤺ᤛᤢᤶᤗᤥ॥ 9 ᤁᤱᤃ ᤏᤛᤠ᤺ᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤏᤢ ᤁᤧᤖᤧᤰᤗᤧ ᤋᤧᤶᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤗᤥ॥ 10 ᤒᤠ ᤁᤴ ᤏᤡᤱᤘᤠ᤹ᤛᤥ᤺ᤰᤁᤥ ᤕᤠᤶᤒᤢᤎᤡᤰ ᤏᤢ ᤋᤶᤛᤡᤴ ᤀᤠᤈᤥᤃᤢᤶ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤏᤡᤱᤛᤠᤱᤅᤡᤴ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤏᤧᤛ᤻ᤛᤢᤶᤔᤠᤱ ᤀᤠᤘᤠ᤹ᤖᤥ॥ ᤂᤢᤏᤧ᤹ᤃ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤛᤧᤴᤗᤵᤍᤠᤱᤒᤠ. ᤜᤧᤰᤁᤩᤠᤱ ᤁᤢᤏᤥ-ᤁᤢᤒᤡ᤹ᤀᤥᤃ ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧᤴᤗᤥ॥

11 ᤁᤴ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤈᤠ᤺ᤱ ᤐᤡᤖᤧᤛᤧ᤹ᤀᤠᤱ ᤜᤢ᤹ᤖᤧᤛᤧ᤹ᤀᤥ॥ 12 ᤂᤧᤏᤧ᤹ ᤏᤠᤗᤡᤱᤃᤧᤴ ᤌᤠᤱᤒᤧᤴ ᤁᤧᤘᤠ᤹ᤒᤠᤸᤗᤧ ᤀᤠᤳᤋᤡᤸᤗᤧᤀᤠᤱ ᤂᤧᤏᤧ᤹ ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤳᤏᤧᤴᤗᤖᤥ. ᤁᤖ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤒᤠ᤺ᤴ ᤛᤢᤳᤗᤠᤀᤥ. ᤕᤧᤵᤗᤧᤰᤁᤥ. ᤔᤡ᤺ᤶᤈᤡᤀᤥ. ᤏᤛᤠ᤺ᤴᤏᤥ. ᤜᤧᤰᤁᤩᤠᤱ ᤛᤣᤛᤣᤒᤠ ᤜᤡᤱᤔᤴᤏᤥ ᤁᤢᤒᤡ ᤐᤥ᤺ᤰᤂᤧ᤹ᤀᤥ॥ 13 ᤀᤡᤱᤃᤠ᤹ ᤔᤧᤴᤍᤠᤀᤣ ᤌᤠᤖᤡᤰ ᤛᤣᤛᤣᤜᤢᤵᤗᤰᤁᤥ ᤛᤠᤶᤕᤥᤛᤠᤵᤗᤠ ᤏᤡ᤺ᤵᤔᤥ. ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠᤀᤥ ᤏᤢ ᤏᤡᤛᤠᤶ ᤜᤢ᤹ᤔᤠ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ॥ 14 ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤁᤧᤛᤶᤍᤠᤱ ᤂᤢᤏᤡ᤹ ᤜᤢᤰ ᤔᤧᤏᤧᤛ᤻ᤛᤢᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴᤗᤠᤶ ᤁᤧᤄᤥ᤺ᤛᤢᤒᤠ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤔᤡᤴ ᤜᤏᤧᤒᤠ ᤔᤧᤀᤡ᤺ᤳᤋᤧᤴᤏᤧ᤹ᤀᤥ॥ 15 ᤂᤧᤏᤧ᤹ ᤁᤴ ᤔᤢᤖᤠ ᤔᤧᤳᤏᤧᤒᤠ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤀᤡ᤺ᤳᤋᤧ ᤏᤠ᤺ᤳᤋᤧ᤹ᤀᤠᤱ ᤆᤰᤔᤧᤸᤗ᤹ᤀᤣ ᤂᤧᤵᤔᤥ ᤐᤳᤇᤧ᤹ᤀᤥ॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤘᤣ᤹ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤈᤥᤃᤢᤒᤠ ᤌᤥᤒᤥ᤺ᤴ ᤔᤧᤏᤡ᤺ᤛᤢᤖᤖᤥ॥ 16 ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤵᤑᤣ᤺ᤰ ᤏᤢ ᤁᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤔᤥ ᤛᤡᤱᤛᤡᤱ ᤗ᤹ᤖᤧ᤹ᤀᤥ॥ ᤆᤰᤔᤧᤸᤗ᤹ᤀᤣ ᤂᤧᤵᤔᤥ ᤐᤳᤇᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤧᤰᤁᤣ ᤁᤧᤈᤥᤃᤢᤏᤧ ᤑᤠ᤹ᤃᤪ ᤂᤧᤏᤧ᤹ ᤀᤠᤵᤑᤣ᤺ᤰ ᤏᤢ ᤂᤧᤏᤧ᤹ ᤁᤧᤒᤠ᤺ᤴ ᤁᤧᤄᤧᤶᤒᤠᤜᤠ᤹ ᤋᤠᤱᤃᤧᤛᤧ᤺ᤵᤋᤢᤛᤡ᤹ᤖᤥ॥

<- ᥇ ᤋᤡᤔᤥᤌᤡ 3᥇ ᤋᤡᤔᤥᤌᤡ 5 ->