1 Ou tiye ki tiri lau ta Kindrei kare bahandra tondrok tiri lau ta atondrok iri, ma kanuhun boho iri. Ma oro lowosa oro kado le ta kamekes lahou mwasin le. 2 Oro saluhe ndra-in sala tiri lau, ma oro sasobobo. Arile, oro kaseken seken tiri lau ari ari kudu bwena ta budon toro. Ma oro kaleheya kandriyen ta satudun oro le ki ta lau mari.

3 Na len ndra-au bwena mene, taha ale i buku aliy. Taha badeh, bale taha bwe. Taha banuhun sahou bwe, ma taha atehei budon tataha i ta sahou wasai. Bolo manyah tataha badeh, ta amekes bada taha sekesek ta kandriyen ndra-in le. Eme taha mene amekes kandriyen ndra-in na len mari. Ma taha ale badeh, mada taha alikis ta lakou tiri lau, ya taha aseken. Ma idoh amekes budon tiri lau badeh, andra-i eme tataha, ma hawe amekes budon tataha andra-i i ta ndramak ari ari. 4 Arile, na len ta tikisiy ta Kindrei, ndramak ta aseben taha asahan kameh, 5 iy sebenei taha badeh, ba-en hamon ta kandriyen mwasin tataha mene bwe. Arile, na tikisiy tan le badeh, iy konohei taha, ma sikine taha asahan randrah labai, asahan lau tan na boto-on ta Malawin Ndrabun. 6 Eme jo katiye kaleu ki tado ta sahou jo asehek dah: Kindrei badeh, tiye Jises Krais, ndramak ta akohok to ado bolo kandriyen ta karei ma lomondra ndra-in ame hamon, ma suni Malawin Ndrabun eme la-u to. Eme ta katin doh, Kindrei le mesekei Malawin Ndrabun tan amekes lahou boto-on udu bolo to. 7 Ya eme, to badeh, kamekes budon ta to kirih ma kabadok, ta bolo manyah tato udu le buku doh hawe Kindrei. Ki buku none ari nah abe-en lakou mwasin badu mine taman. Tasah, na kandriyen ta tikisiy tan le badeh, mesekei to ado mwasin labai ta madan.

8 Eme sahou, jo tiye tam dah badeh, handru. Ou ales ya asehek sahou boto-on ki toro lau ala ndratehei budon toro handru ndra ta Kindrei badeh. Eme ma oro katehei budon toro ki ta amekes kandriyen mwasin. Eme ya leheya dah badeh, mwasin labai ta aseben lau mari.

9 Arile, ou badeh, teleya ou ta tebelese ta sahou laleyah ta sare iri Juwis. Ya, i buku none iri kandres ou ta kandriyen malen tiri Juwis, ou sala ta aliy. Tasah, iri sahou doh, ari moson ta aliy bwe, ma ba-en badan bwe. 10 I buku none are lau leheya tanan randrah labai bamwenen ta leheya handru bwe, ya aliu budon tiri lau iu i len, ou abarah iy kandru-uk ta leheya doh. Ya, i buku none iy amekes le kili badeh, ou abarah iy san rasan ja. Ya, i buku none iy banuhun bwe le, ou teleya iy. 11 Tasah, ou badeh, ndratanam ai, ndramak i buku doh ndratubuni konan ndra ta leheya handru. Ma iy amekes lakou ndra ndra-in le. Buku iy tanan lakou doh bamwenen bwe, arile iy amekes le ili, ma iy le kameh amekes iy udu bolo sahou ta Kindrei.

12 Jo kameh tiye ari turu lau ma la-uh doh awek akohok kon tam, Atemas deh Titikus kameh ewek hawem. Ya, i buku none ari turu asahan le badeh, jo aseken ou ame hawek ame kon tinan Nikopolis. Katin ta jo anya ou ame badeh, i buku doh: Tasah, jo ndratehei budon tek ta ili udu doh, na len ta jor ma ur. 13 Ya, i buku none ndramak ta tanan labai ta batanau nyaran Senas ma hawe Apolos, uru anya kado Krit ka-au badeh, ou aseben uru ta lakou mari uru aseken, ta aseben uru ta bolo tekedek turu. 14 Ma laba tinan ta aliy badeh, iri lau tataha ta Kindrei badu hawe to katanan ta kandriyen mwasin ta aseben ta lakou i buku none iri ado ndra-in ta bolo manyah tiri. Oro ka-en hamon ta kandriyen doh, ya oro samanyah laleyah.

15 Oro are lau ado hawek kada-ah tiye sahou sekesek toro ewek tam. Ma ou badeh, tiye sahou sekesek tek ki toro lau mari aseken aso ado Krit badeh. Ma oro atehei budon handru toro i le buku taso are kada-ah. Ya salom tek i ta Laban Jises Krais ta iy badeh, katehei tikisiy tan ki tado mari ado badeh.

<- Taitus 2