Kindrei aloh Abraham ndramak mwasin na budon tan handru
1 Abo, taha kasehek tubu taha Abraham ki buku sah bah? Saba tanan iy ndra aliy, ya ma iy takalahei? 2 I buku none iy kasahan mwasin ta mada Kindrei na lahou iy le amekes, badeh nane iy katudun iy le na aliy. Arile, iy winiyan batudun iy bare mada Kindrei bwe. 3 Tarou ta Kindrei tiye i buku sah?
“Abraham atehei budon tan handru in ta Kindrei, eme ma Kindrei aloh iy ndramak mwasin mara-ei ta madan.” Jenesis 15:6, 21
4 Arile, i buku none ari ndramak amekes lahou badeh, iy bakohok luk bala buku none ndramas tan, bwe. Iy akohok bundruwe lahou tan labai. 5 Arile, i buku none ndramak bamekes ari lahou ta an hamon ta batanau malen ta Moses bwe, arile iy atehei le budon tan handru i ta Kindrei, ndramas tan badeh i buku doh: Kindrei aloh iy ndramak mwasin handru. Handru! Iri lau nane ta amekes karei ma lomondra ndra-in badeh, Kindrei winiyan aloh iri lau mwasin mara-ei ta madan. 6 Idoh i buku Debit mene ndrasehek nyala iy ndramak nane akohok nyosowan ta ndramas mwasin ta Kindrei doh i san ta budon handru, ma bala san ta lahou bwe:
7 “Ou are lau ta karei ma lomondra ndra-in, ou badeh, sekesek,
Handru, iy badeh, ndrasokosowei kandriyen ndra-in tam ndra-au.
8 Sekesek ki tare ndramak Laban ndramaniy ma ndrasokosowei kandriyen ndra-in tan ndra-au.” Wari 32:1-2
9 Ya, sekesek ma ndramas doh i tiri lau le asan ku-i iri deh? Bwe, i tiri lau basan ku-i iri bwe ale? Turu ma la-uh. Taha ndrasehek ndrasehek ndra-au: Kindrei anyolom budon handru ta Abraham, ma eme iy aloh iy ndramak mwasin ta madan. 10 Kindrei aloh iy mwasin ta madan udu mwena ta kandriyen ta asan ku-i taha deh, bwe em, kandriyen ta asan ku-i taha asahan mwena? Bwe, Kindrei aloh iy ndramak mwasin ta madan mwena, ano kandriyen doh udu hamon. 11 Ano badeh, barasan ku-in i nyara kalem ta leheya buku Kindrei ndraloh iy ndramak mwasin ta madan. Tasah, iy atehei budon tan handru bwena, ya kandriyen ta asan ku-i taha badeh, udu hamon labai. Ya eme Abraham asahan tama iri lau mari iri an hamon ta san ta budon handru. Handru, iri basan ku-i iri ba-au bwe, arile Kindrei aloh iri lau mwasin mara-ei ta madan. 12 Iy ale badeh, tama iri lau rayah asan ku-i iri. Iri basani ku-i iri laleyah bwe, iri ale anyolom san tubu iri Abraham edek aliy. Ya iri ka le buku iy katehei budon tiri handru ki ta Kindrei i buku none mene na len basani iy bwe.
Tandrakan ta Kindrei i tiri lau mari atehei budon tiri handru
13 Kindrei tandrakan Abraham ta kon munyak mari kameh i tan, ma i ta lundriyen oro. Arile Kindrei tandrakan Abraham oro badeh, bala san ta oro a-en hamon ta batanau malen, bwe. Iy tandrakan oro kameh akohok munyak mari, tasah Abraham atehei budon tan mara-ei in tan, eme ma Kindrei aloh iy ndramak mwasin mara-ei ta madan. 14 Ya, buku oro are lau a-en hamon ta batanau malen badeh, oro le asahan lundriyen, kandriyen ta atehei budon handru kameh lakou laleyah nyamun bwe, ma tandrakan kameh ari moson bwe. 15 Tasah, taha tanan, lahou ta batanau malen badeh, ta leheya losen, ma ta adeu maha-an i la-u iri mwan ma badih amekes kandriyen ndra-in. Batanau malen winiya baseben taha bakohok tandrakan ta Kindrei bwe. Ya, buku batanau malen aliy bwe eh, iri kandriyen ndra-in ale winiyan basahan ta mada sahou bwe le.
16 Eme ya, Kindrei kameh edeu lakou mene iy tandrakan i ta Abraham kameh i tare lundriyen oro le atehei budon toro handru in tan. Ya eme Kindrei kameh tikisi oro ma edeu lakou tan mari i toro laleyah le. Bala toro le are baha batanau malen, ma hawe bala toro are atehei budon toro handru i buku Abraham le, bwe. I toro ma lubuk. Tasah, iy badeh, tama taha mari. 17 I buku ndratorowenei mene,
“Jo badeh, mesekei ou kameh a tama iri kon munyak mari.” Jenesis 17:5
Iy badeh, i tama taha mari udu mada Kindrei anyolom, tasah iy atehei budon tan handru in ta Kindrei. Iy badeh, Kindrei ta amak lau amak ame loken ja, ma iy ale Kindrei ta tiye sahou le badeh, lakou asahan.
18 Abraham jaha tan solo-an labai ma nadun bwe, arile iy atondrok Kindrei le gwek, ma iy atehei budon handru, ta Kindrei kameh atehei iy i tama iri lau solo-an. I san doh le badeh, iy asahan tama lau solo-an badu kon munyak. I le buku iy mene ndrasehek tan i buku doh,
19 Handru labai, Abraham badeh, ndra bada ndramak, ma jaha tan ndrasahan rinek (100), ma iy abudon udun Sara badan ndrakoreh, ma badan winiyan ta ato-ou nah bwe. Arile, iy baliliy ta budon tan handru i ta Kindrei bwe. 20 Ma budon tan badeh, bala lundra bwe ta tandrakan ta Kindrei bwe. Arile, budon tan handru badeh, irih le gwek ma iy atudun Kindrei. 21 Ma mesekei iy i tanan handru ta Kindrei badeh, boto-on ta amekes tandrakan tan doh kameh asahan ili handru. 22 Eme ta katin doh, iy abudon ta budon handru ta Abraham, “eme ma Kindrei aloh iy ndramak mwasin ta madan.” 23 Sahou nane, “Kindrei aloh iy ndramak mwasin ta madan” badeh, ta Abraham le, bwe. 24 Sahou doh badeh, winiyan eme tataha lau ale. Tasah, taha atehei budon tataha mara-ei ta Kindrei le mete-ei Laban tataha Jises eme loken ta imek. Eme ta katin doh, iy winiyan aloh taha lau mwasin mara-ei ta madan. 25 Iy mene atehei Jises i mine iri lau adai iy imek ta sikine karei ma lomondra ndra-in tataha. Ano Kindrei mete-ei iy eme loken ja ta leheya taha buku iy amekes ndrokowa taha asahan mwasin i hawen ma ta iy winiyan aloh taha lau mwasin mara-ei ta madan.
Taha mene amak hawe Krais, ma taha ale asahan ame awas hawen
