1 Nadu Sipsip sudi tobwe ma ndro taloh nane tobo-ei buk mara-ei iu le badeh, kandrah mundrindriyou kakan luluwen sese buku awa ranah. 2 Ano le badeh, jo anyolom oro angelo ma ndro taloh ales are mada Kindrei, ma iy atehei ndrah ma ndro taloh ili mine oro.

3 Angelo ari ja, tawi bwekei raben nyikilikin labai udu minen, iy eme ales udu mirihik ta mada koto-ok. Iri atehei eh manahu buburen solo-an labai ili bolo bwekei tan ta adeu ili hawe salom tiri lau ta Kindrei mara-ei, ma atehei i ta salom ili bwele-e mada koto-ok nyikilikin nane ales udu mwena ta koyeu ta Kindrei. 4 Kasu-er ta eh manahu buburen nane ma hawe salom tiri mwan ma badih ta Kindrei mara-ei ruwani mine angelo nane, ma ales amwenen iu ili loken mada Kindrei. 5 Ano angelo andrei bwekei nane kasu-er ta eh manahu buburen udu aliy, ma iy andrei jih badu mada koto-ok, anyuhi ili bolo bwekei, ano iy akahei ili andri bwele-e kon munyak. Iy akahei ano le badeh, kuruh atohou, ma nyaro boho iri lakou marakon asahan, ma kalik takamek ili eme, ma ndroi asahan kon munyak.

6 Ano oro angelo ma ndro taloh nane tawi ndrah ma ndro taloh udu mine oro ta anya koloh ai.

7 Angelo ari ma mwena nane doh aluhi ndrah tan, eme ma gwa, bek hawe jih tubuniy hawe ndra, ma iy akahei iu ili andri bwele-e kon munyak. Jih nane doh badeh, anya ili sulumwi kon munyak ranah ma buruwen ano iu. Idoh, buku none apou kon munyak mara-ei i taloh, badeh, ranah badu bolo taloh doh andrakak ano iu. Ma hawe iri kei mara-ei nane badu loboho doh badeh, andrakak ano iu, hawe iri bwidiu nyorowan mwasin nane ateh udu loboho doh.

8 Iy angelo ma mwena nane doh ano, iy ari ja udu hamon tan eme len oloh ndrah tan ja. Eme ma lakou ari i buku mandrei laba tinan anya buku jih ma atohou ales iu ili bolo ndras. Eme ma, buku ndras mara-ei apou i taloh, ndras ranah ma buruwen asahan i ndra. 9 Eme ma iri lakou mara-ei nane koha iri udu aliy, udu bolo ndras doh, mara-ei amak, ma hawe iri ndron mara-ei nane atas bolo ndras doh, andrakak ma mara-ei atuh ano labai.

10-11 Iy angelo doh ano le badeh, iy ari in hamon tan eme len ja oloh ndrah tan. Idoh ili asahan taloh ai. Eme ma ndrau laba tinan lomadan anya tinan labai buku sun udu kandrah badeh, taku eme andri bwele-e gwa lakon ma gwa kaloh ranah ma buruwen. Nyara ndrau laba tinan nane doh badeh, iri aloh “Lakou Nyakadan.” Ya, i buku gwa doh ma tonoh (30) are bwele-e munyak mari, ronoh badeh, akohok andra-i. Gwa lakon ma gwa kaloh ranah ma buruwen doh badeh, asahan nyakadan, ma iri lau solo-an a-un gwa doh, ma nyekedei iri, ma iri mara-ei amak, tasah gwa mara-ei doh ndra nyakadan le ai.

12 Iy nane doh ano le badeh, iy ari eme len oloh ndrah tan ja. Idoh ili asahan hahuw ai. Eme ma bwidi mada an, ma mada bun ma hawe mada ndrau andra-i; eme ma bwidi lomada oro banya bamwenen bwe; eme ma awa hahuw ta bolo len ma awa hahuw ta bolo ben badeh, asahan lulik le ai.

13 Idoh ano le badeh, jo anyolom laba manyuwe ari atah bolo kandrah, ma jo anuhun iy eden i buku doh, “Tikisiy, tikisiy, tikisiy tinan labai tiri lau mara-ei are kon munyak. Oro angelo ma taloh anya koloh ndrah toro ja. Ma idah kameh sisi-in laba tinan ma ndra-in labai kameh asahan tiri mwan ma badih mara-ei are kon munyak.”

<- Rebelesen 7Rebelesen 9 ->