1 Angelo nane leheya jo ale ta gwa ari doh, kohan handru udu aliy, ta adeu ili wa-i iri lau. Lewen mara-ei, i buku torowe. Bare gwa doh badeh, udu loboho bada koyeu ta Kindrei uru Nadu Sipsip tan, arorou eme len. 2 Ma gwa doh badeh, arorou amwenen lawe-e le bolo san ta kon tinan nane doh. Udu kapa gwa bilisiu ma bilisiu badeh, iri kei ta adeu kohan handru ili tiri lau, ateh udu aliy. Iri kei doh, ato-ou sali iri badeh, san ma ronoh la-uh udu bolo jaha ari, ma san rasan ta bolo bun ari, ari. La-u iri badeh, ta amekes iri mwan ma badih badu kon munyak tinan mara-ei amwenen. 3 Ya, iri lakou marakon Kindrei anya kakeh ki-iu, kameh winiyan bado bolo kon tinan doh ja bwai. Kindrei kameh akahei marakon iu. Kindrei

6 Ano angelo asehek eme tek ja i buku doh, “Iri sahou marakon ou ndranuhun ma ndratou ta iri lakou doh badeh, ndra handru le ai, ma iri kameh asahan. Ma iri mwan ma badih kameh winiyan atehei budon tiri handru in ta aliy. Ma Laban Kindrei badeh, ta atadau malawin mwasin tiri propet, ta atiye sahou tan. Ya, iy don adeh, ndrasuni angelo tan ari eme leheya iri lohowan tan ta saba lakou kameh mirihik asahan.”

7 Jises anya, “Aha kanuhun! Se nawin bwe kameh, jo asahan hawe aha. Buku are mwan o badih, iy in hamon handru ta sahou propet ta Kindrei udu bolo buk dah, badeh, nyosowan ta Kindrei udu la-un ma iy winiyan sekesek handru!”

8 Jo Jon, jo amwenen anuhun ma anyolom iri lakou marakon doh. Jo anuhun iri lakou doh ano le badeh, jo eme atehei bwili ndru-uk i andri ili ta angelo nane leheya iri lakou eme tek, ma jo anya katudun iy. 9 Arile, iy anya, “Ndri-iy, ou samekes! Jo Kindrei bwe! Jo ale amekes gok i buku le ou, ma hawe nadu tinem oro, iri propet, ma hawe iri lau anuhun sahou badu bolo buk dah ma a-en hamon ta aliy. Aha marakon katudun Kindrei le ari!” 10 Ma iy asehek eme tek ja i buku doh, “Ou satone iri sahou ta Kindrei badu bolo buk dah, tasah len ndrame mirihik ai, ta iri lakou marakon doh, kameh asahan. 11 Eme ma, buku are mwan o badih ale ta amekes kandriyen ndra-in, iri badeh, kamekes kili le ai, ma buku are ale ta amekes kandriyen abola labai, mwasin ta iy saruwaniy, iy kamekes kili le. Ya, buku iri mwan ma badih ta amekes kandriyen mwasin labai, iri kamekes kili le ai. Ya, iri mwan ma badih, Kindrei ndratehei kalem ndrala tiri ta ado ndrabun, iri badeh, saruwaniy, iri kabadok.”

12 Eme Jises anya, “Aha marakon kanuhun! Jo kameh asahan nawin bwe. Jo kameh andrei iri ndramas ewek, ta adeu ewek taha mwan ma badih. Jo kameh edeu saluwe ndramas ili tiri mwan ma badih ari, ari ta bundruwe kandriyen iri mene amekes. 13 Jo le ari badeh, asahan mwena handru, ta iri lakou marakon, jo kameh udu le kahis, buku iri lakou marakon ano. Ya, jo ma bwena handru, ma jo in ndrobek mara-ei. Jo ale badeh, kati iri lakou marakon ta asahan, ma jo in hamon ndrobek badeh, ta amekes gok mara-ei ano.

14 “Iri mwan ma badih ale sikine awin tiri asahan belen mara-ei, badeh, nyosowan ta Kindrei udu la-u iri, ma iri winiyan sekesek handru, ma iri kameh winiyan aimon buwa kei, badu ta kei kohan handru udu aliy, ma iri ale winiyan adek ala madasan ta ili bolo kon tinan. 15 Arile, iri lau ta amekes kandriyen ndra-in labai i buku iri mwi amekes, iri ta amekes balahak, iri ta amekes karei, iri ta adai lau amak, iri ta atehei bwili ndru-u iri i andri ili ta kindrei ta wendreya, ma iri mwan ma badih ale aso-ok kandriyen ta wasai, ma a-en hamon ta aliy; iri lau marakon doh kameh are ndra manan ta kon tinan nane, iri winiyan bala bolo kon tinan ta Kindrei doh bwe.

16 “Jo Jises, jo mene tiye angelo tek amwenen ewek bolo aha ta asehek nyala iri lakou marakon doh i taha lau ta Kindrei. Jo badeh, i buku nyabun asahan boho kamen ta Debit. Ya, lomadak badeh, anya i buku lomada ndrau ta boho len.”

17 Malawin Ndrabun hawe udu Nadu Sipsip anya, “Ou ame.” Eme ma iri lau marakon anuhun boho uru, iri ale kasehek sahou anya, “Ou ame.” Buku ou are mwan o badih, balem amar ta gwa kohan handru udu aliy, ou ame akohok wa-im gwa ta edeu kohan handru, na so-ok tam, i buku ndramas Kindrei edeu laleyah.

18 Jo Jon, jo batanau aha mwan ma badih marakon, anuhun sahou propet ta Kindrei udu bolo buk dah. I buku ou are mwan o badih, amekes sahou na le budon tam amwenen ili bolo iri sahou dah, ya iri lakou ndra-in handru nane, Kindrei asehek ta aliy udu bolo buk dah, Kindrei kameh edeu ili bwele-e iri mwan o badih nane amekes sahou ta balen le amwenen. 19 Ma, i buku are ale bahana sahou propet badu bolo buk dah iu, Kindrei ale, kameh andrei iri lakou mwasin nane, iy ndraleheyaniy ndrala tan, badu ta buwa kei kohan handru udu aliy, badu kon tinan ndrabun labai, ma iri asehek badu bolo buk dah, marakon doh kameh iu. 20 Iy lau doh asehek sahou ta nyala iri lakou marakon nane anya, “Ehe, jo kameh ewek, nawin bwe!”

Handru! Laban Jises, ou ame!

21 Tikisiy ta Laban Jises kudu hawe aha lau marakon ta Kindrei, kudu le buku don ai. Handru.

<- Rebelesen 21