Mak 6

Iri lau badu kon ta Jises amwenen bwale iri iy

(Metiu 13:53-58; Luk 4:16-30)

1 Eme Jises iu i len ta kon nane iy udu aliy, eme iy iu ili kon tan amwenen, ma hawe oro lau tan ale ala hawen. 2 Eme na bolo len ta amunyau, iy leheya iri lau an asiu ta atukum tiri Juwis. Eme lau solo-an anuhun iy asehek sahou, ma mani iri atur, ma iri ndremenya, “Iy ndramak kede-eh, iy akohok tanan doh badu heh handru? Aden! I buku sah iy amekes lahou tinan na minen! 3 Taha tana taha, iy ndramak kede-eh ta atah asiu, ma iy nadu Mariya, nadu tine Jemis, Joses, Judas hawe Saimon, ya nadu tinen oro badih, are hawe to kada-ah, neh?” Oro asehek i buku doh, ma oro atehei kona oro i tan.

4 Eme Jises tiye i tiri anya, “Iri propet ta atiye boho Kindrei, nyara iri tinan ereu kon mari. Arile ereu kati kon tan amwenen, ma ereu boho kamen tan amwenen, ma ndrokowa oro ndraye oro rabuk, iy asahan buku lau laleyah.”

5 Eme Jises winiyan bamekes ari lahou tinan bareu kon dah bwai, arile iy le edeu minen i bwele-e iri le lau sik udu tiri, eme ma sik tiri iu. 6 Eme Jises manin atur, tasah iri batehei budon tiri handru ba-en tan bwe.

Jises leheya boto-on tan, arile oro lau tan bala tanan iy bala mwasin bwe

(Kalan 6:6–8:21)

Jises suni oro lau tan ala ta amekes lahou

(Metiu 10:5-15; Luk 9:1-6)

Eme ma Jises iu ili kon ari ari ta leheya iri lau. 7 Eme iy luhi oro lau tan ma ronoh la-uh ame hawen, eme iy tiye oro la-uh la-uh a se, ma eme iy suni oro au ala bolo kon mara-ei ta atiye sahou mwasin ili tiri mwan ma badih. Ma iy ale edeu boto-on i toro ta atikah iri malawin ndra-in iu. 8-9 Iy tiye sahou batanau i toro, ta oro winiyan akohok kandro le ta adek hawe oro, arile oro sakohok ari lakou sala hawe oro, lakou i buku jabi ramen, lakou i buku kohei ma luk, ndri-iy labai, ma ale sa-en ndrakali oro. Arile iy tiye i toro kasin le ku-i kati oro ya oro sasin awin la-uh. Oro kasin ari le ka-iy, ma hawe kandro ta lime oro. 10 Iy ale tiye i toro, “I buku none ado ala asahan rakon kon, ma iri lau badu kon doh atehei ado ala bolo ra-em asiu, ya ado ka-en le aliy kado gwek winiya le len ado anya ka-au kala kon rakon ja. 11 Ya, i buku none ado asahan rakon kon, ya iri lau badu kon doh basekesek ta akohok ado ala asiu tiri bwe, ma iri basekesek ta anuhun sahou tado bwe, ya buku ado anya ka-au, ado katuruhi kasu on ma ndren ta kati ado ki-iu, ya ado ka-au. Ya eme ta kalem doh iri kalomondra ta kandriyen ndra-in tiri.”

12 Jises asehek sahou ano, ya oro lau tan au ala atiye sahou tan i tiri lau mwan ma badih. Oro asehek i tiri i buku doh: “Aha katubuni kona aha kili tiri kandriyen ndra-in marakon taha, ma katehei budon taha kili ta Kindrei le ari.” 13 Ya, malawin ndra-in solo-an labai udu bwele-e iri mwan ma badih, eme ma oro lau ta Jises ame, abo gok ta atikah iri malawin ndra-in solo-an iu. Ma oro atah ndrelekei ta kei olip i bada iri lau abo sik ma iri amwenen ja.

Jon ta alomwa imek i buku sah

(Metiu 14:1-12; Luk 3:19-20; 9:7-9)

14 Eme kabin Herot anuhun sahou nyala Jises ndraseker winiya le bolo kon. Eme iri lau ra-on anya, “Jon ta alomwa mene ndramak ja ereu bolo lek tan ndrame loken, eme ma boto-on tan bwena ndrame hamon ja, ya boto-on tan udu ta Jises, eme iy amekes lahou tinan.”

15 Iri ra-on anya ja, “Iy Alaija,” ya iri ra-on anya ja, “Iy propet, i buku none le lau ta tiye boho Kindrei bwena ndra-au o-on.”

16 Herot anuhun, ya iy anya ja, “Kede-eh Jon ta alomwa! Jo mene ndrasani batun, arile iy ndramak ja!” 17 Ya Herot bwena ndra-au o-on tiye iri tawi Jon ta alomwa, ma sawei iy ma atehei iy i bolo asiu lulik. Herot amekes doh, tasah iy mene sudi udu nadu tinen Pilip nyaran Herodiyas. 18 Eme ma Jon tiye Herot anya, “Ou ndrandra-i tasah, ou sudi udu nadu tinem!”

19 Eme Herodiyas badeh, tan losen in ta Jon ma iy anya kidi iy, arile iy udu bahandra tondrok ta Herot, 20 ma Herot ale, inoh Jon, tasah Jon badeh, ndramak mwasin labai ta mada Kindrei, eme ma Herot badai iy bwe. Batun aso ta anuhun Jon, arile iy aso-ok ta anuhun iy labai ja.

21 Ya, madasan ta Herot kidi Jon asahan i buku doh: Eme len ta Herot mene tinen tuwi iy anya kasahan, eme ya iy iwer nyamon i niri lau tan badu bolo asiu hawe iri lau tinan ta bahun ma hawe lau batun badu Galili. 22 Eme budon ndra-in ta Herodiyas asahan i buku doh. Eme nadu Herodiyas badih eme bolon idi mana, eme mesekei ndrine Herot hawe iri lau nane sekesek, ya eme kabin tiye i ta nadu badih bihin dah, “Ou aso-ok sasah handru? Jo winiyan atehei saba lakou i tam i buku ou aso-ok.” 23 Eme iy tiye ja, “Jo tandrakan ou, jo tiye sahou handru en, jo winiyan atehei saba lakou i tam i buku none ou ndremenya ta aliy i buku none ranah lakou jo atondrok jo winiyan atehei i tam.”

24 Ya eme badih bihin dah iu i manan, tiye i ta tinen, “Saba lakou jo katiye?”

Eme tinen anya ja, “Jo aso-ok batu Jon ta alomwa.”

25 Eme badih bihin dah iu i bolon suwi suwi ili hawe kabin ma tiye, “Jo aso-ok na le dah ou adai Jon ta alomwa ma ou atehei batun ki bolo raben bwekei, ya ou bwese-ei keme tek.”

26 Eme sahou doh mesekei kabin tikisiy handru en, iy abudon ta iy nane ndratandrakan ereu mada oro kabin aimon nyamon hawen nane, ya iy bwalen akohok bwilima ta tobolowe sahou tan iy ndrasihidi ta nadu badih nane doh. 27 Eme suwi labai iy suni ndramak ta bahun ari ili bolo asiu lulik mwetehei batu Jon eme. 28 Eme iy andrei batun i bolo bwekei ma atehei i mine badih bihin dah, eme ma badih bihin dah atehei i mine tinen. 29 Eme oro lau ta Jon anuhun, oro ame andrei bada kei, oro su-iy, ma ala ahi iy i lek.

Jises edeu nyamon i niri lau ma lamawa (5,000)

(Metiu 14:13-21; Luk 9:10-17; Jon 6:1-13)

30 Eme oro aposel ame hamon ame hawe Jises, ma oro asehek nyalan ta lakou mari oro amekes. 31 Iri lau solo-an solo-an ame au ame au, eme Jises hawe oro lau tan badeh, ari len ta aimon nyamon bwe. Ya eme Jises tiye i toro, “To ka-au ka kon rasi ja kamunyau op.” 32 Ya eme oro le ala ndron ra-ei, ma oro au ala kon rasi sese len ja, lau aliy bwe.

33 Arile, iri lau ra-on ndratou oro au, ma iri ndratanan, idoh oro le ai, eme iri lau badu kon tinan loboho doh adek a san loke ala mwena ta Jises oro lau tan, a kon nane oro anya ka aliy. 34 Eme oro anya ka amik le badeh, Jises atou iri lau solo-an labai, ma iy tikisi iri, tasah iri badeh, a buku none sipsip, ari ndramak ta atondrok iri bwe, ma eme iy leheya iri ta lakou solo-an. 35 Ya mirihik kon anya keben ai, eme oro lau tan ame tiye i buku doh, “Mirihik kon eben ai, ma loboho dah mundrindriyou. 36 Ou tiye iri lau kede-eh ka-au kala kon mirihik ma ndrahu oro kasih noro nyamon ta aimon.”

37 Arile, Jises tiye toro anya, “Ado kadeu niri nyamon.”

Eme oro anya ja, “Jises, ou aseken aso kala kasilah sihine ndramak ta bun ma ndru la-uh ki se, ma kasih jabi ramen ma kanyohan oro?”

38 Ya eme Jises tiye i toro ja, “Ado kala kondrek. Jabi ramen tado sabe udu aliy?”

Eme oro ala atou, ano oro tiye i tan anya, “Limeh jabi ramen hawe la-uh ni.”

39 Eme Jises tiye oro lau tan kapwai iri lau dah, ma katiye iri kamanyah ka-en andri bada bwidiu. 40 Eme oro apwai iri lau nane dah manyah an se, ra-on rinek (100) ado se ai, ra-on ja lomonoh (50) an se ai, i le buku doh. 41 Eme Jises andrei jabi ramen ma limeh hawe ni ma la-uh dah, iy eme anyolom iu i loken bolo kandrah, ma iy edeu wurah i ta Kindrei. Ano iy boso-ei jabi ramen dah, ma iy edeu ili mine oro lau tan. Eme oro ala adeu ili winiya iri lau mari, ma Jises ale boso-ei ni ma la-uh ma oro adeu i le winiya iri ale. 42 Iri mari aimon nyamon doh ma ndrine iri idih. 43 Ano oro lau tan bwese tikibwah tiri erah i bwak ma ronoh la-uh. 44 Ya kane lau mwan mara-ei aimon jabi ramen nane dah ma lamawa (5,000).

Jises edek bwele-e gwa i hawe oro lau tan

(Metiu 14:22-23; Jon 6:16-21)

45 Suwi suwi Jises tiye oro lau tan kasandroh kala bolo ra-ei ndron, ma oro kasowe kala bwena kala kapa gwa Betsaida bilisiu. Ya iy le kameh udu hamon ta atiye iri lau ka-au. 46 Iy tiye iri lau au, ano iy iu ili bwele-e mandrei ta iy kasolom. 47 Eme kon a beyeh, ya ndron toro lau tan udu le alih ta gwa li, Jises lebai le in ndra amik kahis. 48 Eme iy atou oro lau tan ndrawoyah ta abahau, tasah jor atohou boto-on i bada ndron toro. Mirihik boho len, Jises edek bwele-e gwa ili hawe oro. Iy anya kedek ki bwena toro, 49 arile, oro atou iy edek bwele-e gwa eme oro anya, “Nyam! Nyam!” Eme ma oro anyar, 50 tasah oro mari anyolom iy, ma oro anoh andra-i labai. Arile, Jises aloh i toro suwi i buku doh, “Ndrine ado kamunum! Jo, jo! Ado sanoh!”

51 Eme iy i ndron hawe oro ma jor amondrei, eme oro lau tan badeh, boho oro asak, 52 tasah budon toro baleu ta jabi ramen mene moson i buku sah, bwe, ma budon toro ale ndraso.

Iri atiye lau abo sik ame hawe Jises

(Metiu 14:34-36)

53 Eme oro ala bilisiu, ma oro asos loboho kon Genesaret, eme oro sawei ndron toro i hanai udu ai. 54 Oro are ndron ame loken le badeh, iri lau seleyani Jises. 55 Ya eme iri lau badu loboho doh sakaliye ame ma atiye iri lau abo sik an bada nyahan ame hawen, eme iri anuhun Jises udu heh, iri ala le ai. 56 Eme Jises ili heh ili heh, ili kon bwisik, ili kon tinan, ili kon lokei, eme iri tiyani iri lau sik udu tiri ala ndrahu baen, ya ndremenya Jises boto-on labai ta iy kalelei iri katehei le mine iri kili kiri awin tan. Eme iri lau mari nane ateu awin tan, iri asahan amwenen ja.

<- Mak 5 Mak 7 ->