Metiu 2

Tekedek toro lau ta tanan badu loboho an eme loke

1 Hamon ta Jises ndrasahan udu Betlehem udu bolo kon tinan Judiya, udu bada len ta kabin Herot,[a] oro lau ta tanan badu loboho an eme loke[b] ame Jerusalem, 2 ma oro ndremenya, “Iy nah nane ndrasahan ma iy kameh asahan kabin tiri Juwis, iy ndraheh? Aso anyolom ndrau tan anya udu loboho mada an eme loken, eme ma aso ame dah ta atudun iy.”

3 Kabin Herot anuhun, eme ma manin atur labai, ma mani iri lau mari badu Jerusalem atur ale. 4 Eme iy aloh iri lau ado batu tinan tiri pris ma iri lau tanan ta leheya batanau malen mari ame le se ma iy lelen oro, “Mesaya[c] kameh asahan heh?” 5 Eme oro lau nane dah tiye anya, “Udu Betlehem bolo kon tinan Judiya. Tasah propet, lau ta atiye sahou ta Kindrei ndratorowenei:

6 Arile ou Betlehem ado bolo munyak Judiya, ou basahan hamon toro kon ale nyara oro tinan udu bolo munyak Judiya bwe handru. Idah kameh ndramak ari badu hawe aha amwenen kameh asahan, ma iy kameh asahan ndramak ta atondrok iri lau tek Isra-el.” Maika 5:2

7 Ano Herot aloh oro lau ta tanan nane amunum le ame, ma iy ndremenya oro ta len amwenen ta ndrau asahan. 8 Ano iy suni oro ala Betlehem, ma iy tiye i toro i buku doh, “Ado kala kasilah kamwenen ta iy nah badeh. I buku none ado ala silahei iy, sahou keme tek ja. Ya jo ale, anya kewek katudun iy.”

9 Oro anuhun sahou ta kabin Herot, ano ma oro au, ya ndrau mene anya udu loboho an eme loke, ili ja anya udu bwena toro ili udu bwele-e kon amwenen iy nah dah asahan udu aliy. 10 Na len oro atou ndrau anya, oro sekesek handru. 11 Oro ame asos asiu, oro atou nah dah udu hawe tinen Mariya, eme ya oro atehei bwili ndru-u oro i andri, ma atudun nadun. Ano oro aseh kohei kohoya luk toro, ma adeu gol hawe suluw ta amekes kasu-er ili manahun mwasin, ma hawe kei ta suluw aloh mer.[d] 12 Na ben oro amadin ma oro ameh Kindrei batanau oro sala hamon ja sala hawe kabin Herot, oro kala hamon kala kon toro kala san rasan ja.

Oro atobwak au ala Ijip

13 Udu bada len oro anya ka-au le badeh, angelo ta Kindrei ari eme tiye ta Josep udu bolo ameh na ben. Iy tiye i buku doh, “Ou amak! Ou andrei iy nah hawe tinen, ma ado katobwak ka-au kala Ijip. Ado kado gwek winiya jo le baratiye ou, tasah Herot kameh asilah iy nah dah ta idi iy kimek.”

14 Josep amak eme loken iy andrei iy nah dah hawe tinen ma oro atobwak na le ben au ala Ijip. 15 Iy udu gwek winiya le kabin Herot imek, ma idah mesekei sahou asahan handru ma amwenen le i buku Laban ndrasihidiy i ta propet:

“Jo aloh naduk eme len ta Ijip.” Hoseya 11:1

16 Herot i tanan oro lau ta tanan badeh, ndrawendreyani iy. Eme ma iy ibolosen handru ma iy atehei sahou boto-on i tiri lau ta bahun tan ta kadai iri nah mwan mari badu Betlehem. Iri nah doh ala jaha tiri udu kalama jaha la-uh eme andri. Iy atehei sahou ta adai nah mwan mari kamak, amwenen ta len iy i tanan ma iy seleyani oro lau ta tanan. 17 Eme ma, sahou mene propet Jeremaya asehek badeh, asahan handru ma amwenen le:

18 “Bohon aloh udu kon Rama,

ndrelen tinan ma hawe tikisiy tinan.

Resel eden ndranye nadun oro,

eme ma iy bwalen lau samekes ndrinen samwenen ja ai,

tasah nadun oro ndrano ndra-au.” Jeremaya 31:15

Oro ame hamon ame Nasaret ja

19 Hamon ta Herot imek, angelo ari ta Kindrei asahan ta Josep udu bolo ameh udu Ijip, 20 ma iy tiye i buku doh: “Ou amak, ou andrei iy nah kede-eh hawe tinen, ado ka-u kala hamon kamanyah kado munyak Isra-el. Oro lau mene anya kanone kadai iy nah dah kimek, oro ndramak.” 21 Eme ya Josep amak iy andrei iy nah dah ma hawe tinen oro au ala hamon ala munyak Isra-el.

22 Arile Josep anuhun Akela-us ja badeh, atondrok Judiya, ma iy akohok ndrahune taman Herot. Eme ma bwidi iy inoh ta ili loboho doh. Arile, udu bolo ameh ta Josep, Kindrei batanau iy ta oro ka-au kala loboho Galili. 23 Eme ma iy ili manyah udu kon ari aloh Nasaret. Ya sahou dah asahan ma amwenen le i buku le iri propet ndrasihidiy: “Idah kameh iri aloh iy lau badu Nasaret.”

<- Metiu 1 Metiu 3 ->