Luk 9

Jises suni oro lau tan ma ronoh la-uh au ala ta amekes gok

(Metiu 10:5-15; Mak 6:7-13)

1 Ano, Jises luhi oro lau tan ma ronoh la-uh ame hawen, ano iy edeu boto-on i toro, ta atikah iri malawin ndra-in ka-au hawe edeu boto-on i toro, ta amekes iri lau sik udu tiri kamwenen. 2 Ano, iy tiye oro au ala atiye sahou mwasin, ta nyala tondrok ta Kindrei, ma kamekes iri sik kamwenen. 3 Eme iy tiye i toro anya: “Ado sakohok kandro, ya ado sakohok kohei, ya ado sakohok jabi ramen, ya ado sakohok luk, ma hawe ado sakohok ari kolau ja, sawek hawe ado, na len ta tekedek tado. 4 Ya, i buku none ado kala kon tinan, ya buku ari lau kasumon ado badeh, ado kare asiu tan le kado gwek, winiya le ado barame len ta kon tinan badeh; 5 Ya, i buku none ado kala, ya iri lau basekesek ta akohok ado ala asiu tiri bwe, ya buku ado anya ka-au, ado katuruhi kasu on ma ndren ta kati ado ki-iu, ma ado ka-au. Ya eme ta kalem doh iri kalomondra ta kandriyen ndra-in tiri.” 6 Eme oro ala kon ari ari, ala aliy atiye sahou mwasin, ma amekes sik tiri lau badu heh, badu heh, iu.

7 Eme ya Herot Antipas ndramak ta atondrok Galili badeh, anuhun nyala lahou mari doh. Eme ndrinen badeh, amaha ta aliy, tasah lau rayah asehek anya, Jon ndramak ja ereu bolo lek ndrame loken, 8 ya iri rayah anya ja, Alaija ndrasahan ja, ma hawe iri rayah anya ja, ari propet badu bolo oro bwena mene ndramak ja. 9 Arile bwe, Herot anya, “Jo mene ndramwetehei batu Jon o! Ya are lau handru ja asahan dah?” Eme iy badeh, anya kanyolom ndramak doh.

Jises anyohan iri lau ma lamawa (5,000)

(Metiu 14:13-21; Mak 6:30-44)

10 Ano, oro lau tan ame hamon, ya oro asehek nyala Jises ta lakou mari oro amekes. Ano iy kuhi oro ala hawen ma oro ala kon tinan ari aloh Betsaida. 11 Arile, iri lau badeh, ndrandrei budon tan, eme iri an hamon tan ala. Eme iy tiye sahou sekesek i tiri, ano iy asehek sahou ta nyala tondrok ta Kindrei, ma amekes iri lau sik udu tiri amwenen.

12 Ano kon abeyeh, oro lau tan ma ronoh la-uh ame tiye i ta Jises i buku doh, “Ou tiye iri lau kede-eh ka-au kala kon mirihik ma ndrahu iri kasilah niri nyamon, ma kasilah ndrahu iri ta matinou. Tasah, to dah bare kon bwe, to dah are kon laleyah!”

13 Eme Jises tiye i toro, “Ado kadeu niri nyamon.”

Eme oro anya, “Aso badeh, nyamon bwe, udu kada-ah badeh, limeh jabi ramen le, hawe la-uh ni. Ki buku none to kala kasih sola ja, keme hawen badeh, winiya iri ai.” 14 Iri lau badeh, i buku lamawa (5,000). Arile, Jises tiye i toro lau tan, “Ado badeh, katukumwi iri lau kase, lomonoh (50) kase, lomonoh (50) kase, ki le buku doh.” 15 Eme oro lau tan mesekei i le buku bohon, ya eme oro tiye iri lau badeh, kamanyah ka-en andri. 16 Ano iy andrei jabi ramen ma limeh, hawe ni ma la-uh nane dah eme, ano iy anyolom iu i loken bolo kandrah, ma iy edeu wurah i ta Kindrei. Ano iy boso-ei jabi ramen dah. Ya eme iy edeu ili mine oro lau tan. Eme oro ala adeu ili winiya iri lau mari. 17 Eme iri aimon ma ndrine iri idih. Ya tikibwah tiri erah, eme oro lau tan anyuhiy i bwak badeh, asahan ronoh la-uh.

Pita asehek ndrinen handru ta Krais

(Metiu 16:13-19; Mak 8:27-29)

18 Ano na len ari ja badeh, Jises hawe oro lau tan le ala rasi ja asolom. Eme iy ndremenya oro lau tan, “Iri lau anya jo are lau handru?”

19 Eme oro anya, “Iri rayah anya ou Jon ta alomwa, ya iri rayah anya ja, ou Alaija; ma iri rayah anya ja, ou badeh, oro ari propet mene ndramak ndrame loke ja.” 20 Eme Jises ndremenya oro, “Ya ado amwenen anya jo are lau?”

Eme Pita asumon iy i buku doh, “Ou badeh, Krais, Kindrei suni ou ame dah.”

Jises asehek nyala imek ma amak tan

(Metiu 16:20-28; Mak 8:30–9:1)

21 Ma eme Jises batanau oro boto-on ta oro badeh, sasehek ta ari lau ndri-iy. 22 Ano iy tiye, “Nadu Ndramak Awas kameh akohok sisi-in solo-an labai, ma iri lau tinan areu bwena, hawe iri lau tinan tiri pris, ma hawe iri lau ta leheya kandriyen tiri Juwis kameh baseken iy bwe. Ma idah kameh, iri adai iy imek, ya len taloh ano iy kameh amak ja.”

23 Ano iy tiye i toro mari: “Buku none ari ndramak anya ki-in hamon tek, mwasin, iy kamani so-ok tan mari, ya iy kabwese-ei kei tondreh tan na len mari. Ya iy ki-in hamon tek. 24 Tasah, buku none ari ndramak anya katawi kohan kudu, kohan kameh ano. Arile, buku none ari ndramak abudon jo ya kohan ano, iy kameh winiyan andrei kohan ja. 25 Ya, buku none ari ndramak kuhi lakou mari badu kon munyak, ya iy kimek, iri lakou doh kameh sebenei iy i buku sah handru? 26 Ou are lau bwilim ama jo ma ta sahou tek, Nadu Ndramak Awas kameh bwilin ama tan ale, i buku none len hamon kameh, iy eme ma lomadan tan, hawe lomadan ta taman, ma hawe lomadan tiri angelo, lau ndrabun badu loken. 27 Jo asehek sahou handru ewek tado. Lau ra-on ales ereu bolo to dah kameh winiyan bamak bwe, ya iri kameh anyolom tondrok ta Kindrei.”

Bada Jises asahan i randrah labai ja

(Metiu 17:1-13; Mak 9:2-13)

28 Jises asehek sahou tan ano badeh, udu, ben ndru la-uh ano, iy kuhi Pita, Jon ma hawe Jemis a hawen, ma oro ala bwele-e mandrei ala asolom. 29 Eme iy asolom le badeh, badan asahan i randrah labai, bwilin anya ma awin tan badeh, nyikadin tinan labai, anya i buku kalik. 30-31 Eme oro atou Moses uru Alaija asahan ma lomadan badu loken ame, asehek sahou hawen ta nyala imek kameh iy bwese udu Jerusalem. 32 Ya Pita hawe Jon uru Jemis badeh, ndramadin tuk, eme oro amak badeh, oro anyolom lomada Jises hawe lomada uru lau nane ales are hawen dah. 33 Eme ya uru lau nane are hawe Jises anya ka-au le badeh, Pita tiye i ta Jises i buku doh, “Laban, mwasin handru ta aso are ndra kada-ah, ya aso katahi taloh mandron kudu dah, ra-em tam, ra-em ta Moses, ma ra-em ta Alaija.” Arile, Pita bala tanan sasah iy asehek doh, bwe.

34 Ya sahou ta Pita udu ndra bohon kahis le badeh, asi kandrah seselek eme anya katubuluhi oro, ma oro anoh. 35 Eme ya sahou ari asahan bolo asi kandrah nane asehek i buku doh, “Idah naduk handru, jo suni iy ewek; ya ado kanuhun sahou tan.” 36 Eme sahou doh ano le badeh, oro atou Jises le ari udu ndrahun. Ya eme oro badeh, tawi le udu budon toro, oro basehek nyala lakou nane udu bolo len doh mene oro atou, bwe.

Nah ari malawin ndra-in udu la-un

(Metiu 17:14-21; Mak 9:14-29)

37 Ben ari oro are bwele-e mandrei, ano oro are mandrei ame andri, ano len ari ja badeh, lau solo-an labai ame hawe Jises. 38 Eme ndramak ari udu bolo iri aloh, “Ndramak ta leheya, jo naduk ari le dah, jo aseken ou ame anyolom iy se. 39 Iy nah doh, malawin ndra-in udu la-un, ya i le mani tur malawin ndra-in kameh amekes iy arah. Ano, iy totoreh hawe bubusi bohon kameh atau; ma amekes badan kameh isi udu gwek, luluwen labai. 40 Eme jo badeh, tiye oro lau tam rayah ta katikahei malawin ndra-in udu la-un doh ki-iu, arile oro winiyan bwe.”

41 Eme Jises asehek sahou i buku doh, “Ado lau mwan ma badih batehei budon handru bwe, budon ma kandriyen tado bamwenen bwe. Len sabe kameh jo kereu hawe ado, ano ado barala tanan boto-on ta Kindrei? Ou tiyani nadum keme dah.”

42 Ano nah dah, edek eme hawe Jises le badeh, malawin ndra-in mudi iy i andri bwidi iy totoreh, ma bubusi bohon atau. Eme Jises ibolosen i ta malawin ndra-in udu la-un iu, ma iy amwenen ja. Eme iy atehei nah dah, i hawe taman. 43 Eme mani iri lau mari atur labai, ta boto-on ta Kindrei.

Jises asehek nyala imek ma amak tan san rasan ja

(Metiu 17:22-23; Mak 9:30-32)

Ya eme iri lau boho iri asak kahis le ta lakou nane Jises amekes, eme ma Jises tiye i toro lau tan, 44 “Ado badeh, katehei ndranye ado kamwenen ki-in ta sahou jo anya kasehek tado: Iri kameh atehei Nadu Ndramak Awas ili mine iri lau ta atondrok.” 45 Arile, budon toro baleu ta sahou tan nane bwe. Tasah, sahou dah badeh, ndraton ma oro bandrei bwe, ma oro ale badeh, anoh ta ndremenya Jises ta aliy.

Are udu bwele-en labai

(Metiu 18:1-5; Mak 9:33-37)

46 Ano, oro lau ta Jises andres oro, ta are kudu bwele-en toro. 47 Eme Jises badeh, ndratanan budon toro, eme iy andrei nadu nah ari nadu bwisik eme, ales udu kabeden. 48 Ano iy tiye i toro, “Ya buku none ari ndramak abudon jo, ya iy aseben ari nadu nah bwisik buku nah le dah, badeh iy aseben jo. Ma are lau oro aseben jo, badeh oro aseben Kindrei iy nane suni jo eme dah. Tasah, are lau nyaran bwe udu bolo ado kameh, iy doh kameh nyaran i tinan labai.”

Are lau tan bahun tado bwe, iy badeh, kawas tado

(Mak 9:38-40)

49 Eme Jon anya, “Ndramak ta leheya, aso atou ndramak ari atikah malawin ndra-in eme len na boto-on ta nyaram, ya eme aso anya kabarah iy, tasah iy badeh, ari taso bwe.”

50 Eme Jises anya, “Ado sabarah iy, tasah are lau tan bahun tado bwe, iy badeh, kawas tado ma badu hawe ado.”

Jises edek ili Jerusalem hawe oro lau tan

(Kalan 9:51–19:28)

Iri lau badu kon Samariya bwale iri Jises

51 Jises badeh, tanan, mirihik kameh Kindrei akohok iy udu Jerusalem iu i kandrah. Eme ya mesekei budon tan badeh, abadok ta ili Jerusalem. 52 Eme iy suni iri lau rayah ta tiye sahou ala bwena, ala kon Samariya ta lowosa lakou mari lewan; 53 Iy ili, arile iri lau badeh, baseken iy bwe, tasah tekedek tan doh nane ta ili Jerusalem labai. 54 Eme Jemis uru Jon anuhun kandriyen doh badeh, eme uru ndremenya Jises, “Laban, ou aseken to kaloh jih udu kandrah keme andri kasulumwi iri?” 55 Arile, Jises tubuni iy eme, iy tiye boto-on i toro anya, “Bwe.” 56 Eme oro au a kon ari ja.

Ndramak bwese maha-an buku iy ki-in hamon ta Jises

(Metiu 8:19-22)

57 Eme oro adek san ala badeh, ndramak ari tiye i tan anya, “Jises, loboho heh, ou ala aliy, jo kameh in le hamon tam.”

58 Eme Jises tiye i tan i buku doh, “Iri mwi badu lokei, munu iri udu aliy, ya iri sirih ale awi iri ta matinou udu aliy. Arile, jo Nadu Ndramak Awas badeh, ari ndrahu matinou tek, bwe.”

59 Ano, Jises tiye sahou i ta ndramak ari ja anya, “Ou ame an hamon tek.”

Eme ndramak dah anya ja, “Laban, jo kili kihi tama op. Ano jo barawek bara-en hamon tam.”

60 Arile Jises tiye i tan ja, “Iri lau amak badeh, kado gwek. Idah kameh, iri lau badu hawe iri barala bara-eh iri. Arile, ou badeh, adek ala atiye sahou ta nyala tondrok ta Kindrei.”

61 Ano ja, ndramak ari ja tiye anya, “Laban, jo kameh in hamon tam; arile jo kili katiye tanan ta lowak oro op.”

62 Eme ya Jises tiye i tan, “I buku none are lau kapou ndren ta bilin, ya iy bamesekei bano bwe, badeh, iy atalei labai, ta amekes lahou badu baha tondrok ta Kindrei.”

<- Luk 8 Luk 10 ->