Luk 20

Ndremenya ta boto-on ta Jises

(Metiu 21:23-27; Mak 11:27-33)

1 Ano na len ari, Jises leheya iri lau ta bolo sahou mwasin udu bolo asiu tinan ta Kindrei. Eme iri lau tinan tiri pris, hawe iri lau ta leheya kandriyen tiri Juwis, ma hawe iri lau ta batun tiri lau badu Isra-el ame hawen. 2 Eme iri tiye i tan anya, “Ou tiye keme taso, ou akohok boto-on badu heh handru, ma ou amekes iri lakou kede-eh? Are lau atehei nyaran tinan ewek tam ma tiye ou ta amekes iri lahou dah?”

3 Eme Jises asumon boho oro i buku doh, “Jo anya kandremenya ado ta lakou ari. Ano ado katiye keme tek ja. 4 Kala Jon mene alomwa iri lau, iy akohok boto-on badu heh? Lakou doh badu kandrah deh, badu kon munyak le?”

5 Eme oro asehek nyala aliy udu ndrokowa oro ari ari anya, “Buku none to katiye anya, ‘Idoh lakou badu kandrah,’ idah kameh iy ndremenya to ja anya, ‘Buku sah ado batehei budon tado bala ta aliy bwe?’ 6 Arile, i buku none to katiye anya, ‘Idoh kandriyen tiri lau le,’ idah kameh, iri lau korowei to na bek, tasah budon tiri lau ndrahas anya, Jon badeh, propet ta Kindrei handru.”

7 Eme iri asumon bohon i buku doh, “Ahi tana ahi bwe.”

8 Eme Jises tiye tiri i buku doh, “Jo ale, jo winiyan batiye bawek taha are lau handru atehei nyaran tinan eme tek ya jo amekes iri gok dah.”

Sahou sokek ta lau ta lahou ado bilin ta waen

(Metiu 21:33-46; Mak 12:1-12)

9 Ano Jises asehek sahou sokek ari ili tiri lau anya, “Ndramak ari bwidi bilin ta waen ari. Eme iy atehei bilin ili mine iri salibah ta atondrok, ma iy iu i kon rakon ja, ma udu gwek luluwen labai. 10 Eme na len ta abwe-eh buwan asahan, iy suni lohowan tan ari ili hawe oro salibah atondrok bilin waen nane dah, anya kakohok rayah buwa waen ki minen. Eme oro salibah adai iy ma tikahei iy iu na luka minen ma luka katin. 11 Ano ja, tama bilin dah, suni lohowan tan ari ili ja. Iy ili i le buku aliy le, oro adai iy ma abolei iy andra-i labai, ma tikahei iy iu na luka minen ma luka katin. 12 Ano ja, iy suni lohowan tan ari ili ja san tulusin ai. Eme oro adai iy, ma iy akohok andra-i labai, ma oro akahei iy eme len.

13 “Ano tama bilin anya, ‘Ki buku sah bah? I buku none jo kasuni naduk amwenen ala jo aseken iy labai kede-eh, sebwe oro kameh anuhun boho naduk.’

14 “Arile, oro salibah ta bilin atou iy edek eme, oro asehek nyala oro anya, ‘Ei, nadun eme, to kadai iy, ma to kakuhi iri lakou tan mari.’ 15 Eme oro kuhi iy eme len ta bilin, ma oro adai iy imek.

“Ya ado abudon i buku sah? Tama bilin kameh amekes saba lakou handru kili toro salibah nane abo gok an bolo bilin nane? 16 Iy kameh idi oro lau doh amak, ma iy kameh atehei bilin ili mine iri lau rayah ja kabo gok ta aliy.”

Ya iri lau anuhun sahou sokek doh aleu labai, eme iri anya, “Sasahan ai, ma ndri-iy ai!”

17 Arile, Jises anyolom boto-on i toro ma i lelen, “Sahou mene ndratorowenei ndra-au, saba moson ta aliy handru? Sahou i buku doh,

‘Bek ale iri lau ta atah asiu bwale iri, na dah, iy ndrasahan kati ndru ta ka-u asiu bek.’ Wari 118:22

18 Are lau oro taku a bada bek doh kameh, ndruwi oro kameh ibok i le bwisik, arile are lau oro i buku none bek doh, taku i la-u oro, idah kameh ati-i oro abwesek.”

19 Eme iri lau ta leheya kandriyen tiri Juwis hawe iri tinan tiri pris nane anya ja Jises asehek sahou sokek doh i bada iri. Eme ma iri anya katakaleh madasan ta ateu iy na le liliy. Arile, oro winiyan bwe, tasah oro anoh iri lau.

Kadeu luk ta takis ki ta Sisa

(Metiu 22:15-22; Mak 12:13-17)

20 Eme oro atehei mada oro udu ta Jises, ma oro suni iri lalou rayah atehei mada iri udu ta Jises. Oro amekes oro i buku none lau ta tandra-un sahou handru, ala, anya kasan Jises na sahou. Ya eme oro anya katehei iy ki mine iri lau ta atondrok hawe kili baha boto-on ta tondrok tiri Rom. 21 Eme ya oro lalou lelen Jises anya, “Ndramak ta leheya, aso badeh, tanan sasah ou leheya kede-eh, ndra handru le ai, ma ou badeh, banoh are ndramak bwe. Ou badeh are le alih turu. Tasah, ou badeh, leheya san ta Kindrei handru i tiri lau. 22 Ou abudon i buku sah? Mwasin ta taha kadeu takis ki ta Sisa, deh ndri-iy?”

23 Arile, Jises anyolom ili mada oro ta wasai ma tiye toro anya, 24 “Ado kaleheya keme tek ari luk bororoh. Malawi ndramak ma nyaran kede-eh are lau handru?”

25 Eme oro anya, “Ta Sisa.”

Ya eme Jises tiye i toro, “Mwasin, saba lakou ta Sisa, ado kadeu ki ta Sisa. Ya saba lakou ta Kindrei, ado kadeu ki ta Kindrei.”

26 Eme oro anya kawasai iy kasehek sahou ndra-in kudu mada iri lau, ma oro kateu iy. Arile, oro winiyan batawi iy bwe. Eme ya boho oro asak ta sahou tan i toro, ma oro andru-uk.

Nyala ndramak amak ame awas ja hawe nyala tasou

(Metiu 22:23-33; Mak 12:18-27)

27 Eme oro Sadusi rayah ame hawe Jises anya kanone iy. Oro anya, iri lau ale ndramak bwena mene, iri kameh winiyan bamak ja bwe. 28 Eme oro ndremenyani Jises i buku doh, “Ndramak ta leheya, Moses bwena mene torowenei nyala taha anya,

‘Buku none ari ndramak imek, ya udun erah ya iy nadun bwe, nadu tinen kameh kandrei nyau tan ki udun, ya iy katehei nah ki tan, ma nah doh ki nyara nadu tinen, ya nyara nadu tinen sa-au, ndri-iy.’ Dutoronomi 25:5

29 Ya, len ari bwena, oro lau ma ndro taloh, oro badeh, nadu tine oro. Eme kadok toro i tasou ta badih ari, eme ya iy imek ma iy nadun bwe. 30 Ano iy bwaneh sudi nyawe nadu tinen i tan, eme iy imek, ma nadun bwe le. 31 Ano ja silih sudi nyawe nadu tinen uru ja, eme iy imek ale, nadun bwe le. Eme amekes i buku doh, ili ano ta kalai. Oro mari badeh, amak ari nadu oro bwe. 32 Ano udu hamon badeh, badih imek ale. 33 Ya, ou tiye taso. Na len hamon ta iri lau mari amak ame loken ja, badih doh kameh ili udu are lau handru? Ou tanam, iy i tasou ili toro ma ndro taloh nane doh.”

34 Eme Jises tiye i toro anya, “Lau mwan hawe badih are munyak dah, asoh iri a tasou. 35 Arile, iri mwan hawe iri badih mwasin ta mada Kindrei kameh, na len eme kameh iri amak ame awas ja, iri winiyan bala tasou ja bwe. 36 Iri kameh asahan buku iri angelo, ya iri badeh, nadu Kindrei labai, tasah iri amak ame awas ja. 37 Handru labai. Iri lau ndramak bwena, hamon kameh iri amak ja. Moses ale leheya i buku aliy le. Idoh asehek nyala len mene Moses atou jih anya udu ta kei. Tasah, Moses mene tiye nyala Laban i buku doh:

‘Ou badeh, Kindrei ta Abraham, ta Aisik, ma ta Jekop.’ Eksodus 3:6

38 Sahou doh leheya taha i buku doh: Kindrei atondrok koha oro ma taloh, ma oro ado awas ado hawen kahis le. Eme ma, Kindrei batiye anya iy mene Kindrei tiri lau ndramak, arile na dah, bwe. Bwe! Iy badeh, Kindrei tiri lau koha iri udu aliy kahis le. Handru labai. Iri lau mari mene ndramak ndrasu-u, ma hawe iri lau mari ado loken kahis le, iri mara-ei a buku awas kahis le, tasah Kindrei atondrok iri.”

39 Eme oro lau rayah ta leheya kandriyen tiri Juwis anya, “Ndramak ta leheya, ou tiye sahou badeh, amwenen handru.” 40 Ya eme ma iri anoh, ma iri bandremenya iy ja bwe.

Krais badeh nadu are lau

(Metiu 22:41-46; Mak 12:35-37)

41 Ano Jises ndremenya oro anya, “I buku sah handru iri mwan ma badih anya ja, Krais badeh, nadu Debit? 42 Tasah, udu bolo buk Wari ta Debit tiye i buku doh,

‘Laban Kindrei tiye i ta Laban tek i buku doh:

“Ou ame manyah ado loboho minek salin,

43 winiya jo le, baratehei iri lau ta amekes budon ndra-in ewek tam, barabwesek barado bahandra katim.” ’ Wari 110:1

44 Ado kanuhun. Debit amwenen aloh ndramak nane Laban tan. Ya ki buku sah handru kameh iy ndramak nane ja ki nadu Debit?”

Mada ado kaleu toro lau ta leheya kandriyen tiri Juwis

(Metiu 23:1-36; Mak 12:38-40; Luk 11:37-54)

45 Eme iri lau anuhun kahis le badeh, Jises tiye i toro lau tan anya, 46 “Mada ado kaleu toro lau ta leheya kandriyen tiri Juwis. Oro badeh, aseken adek ala ame na kolau moroyan lawe toro, eme oro anya lau mari kasumon oro na len ta baen. Ya oro anya kamanyah kareu le bwabwai mwasin badu ndrahu tukum tiri Juwis, ma ndrahu kon ta atudun ta nyamon tinan. 47 Oro bene-ei asiu tiri badih nyau, ya iri wendreya ta aliu salom lawe-en lawe-en. Oro lau buku doh kameh akohok maha-an laba tinan labai.”

<- Luk 19 Luk 21 ->