1 Na len Jekop badeh anuhun, udu Ijip badeh kalom udu aliy, eme Jekop tiye i ta nadun oro, “Ado kede-eh abosah le kede-eh? 2 Jo anuhun badeh, anya Ijip badeh kalom udu aliy; eme ado kala kasih nato rayah, bwe kameh to amak ta son ai.” 3 Eme badeh nadu tine Josep oro ma ronoh badeh ala Ijip ala asih kalom. 4 Arile Jekop badeh batiye nadu tine Josep Benjamin bala hawe oro bala bwe, tasah iy badeh inoh koro-an lakou katok tan.

5 Nadu Jekop oro ala hawe iri lau ame asih kalom, tasah munyak Kenan badeh nyamon bwe. 6 Eme Josep badeh atondrok munyak mari badu Ijip, ya iy badeh edeu kalom ta sisih i tiri lau mari badu kon munyak. Eme nadu tine Josep oro ame badeh aluh andri bada munyak i ta Josep. 7 Eme Josep badeh ndraseleyani nadu tinen oro, arile iy badeh amwekes iy i buku none iy tanan oro bwe. Eme Josep ndremenya oro boto-on, “Ado badu heh ame dah?”

Eme oro anya, “Aso badeh badu Kenan, aso ame dah ta asih nyamon.”

8 Josep badeh ndraseleyani nadu tinen oro, arile nadu tinen oro baseleyani iy bwe. 9 Eme Josep badeh abudon ameh mene iy ameh oro ma iy tiye, “Ado dah badeh ado lalou; ado ame dah ta asilah kon munyak boto-on de bwe.”

10 Eme oro anya, “Bwe Laban, aso ame dah i buku none lohowan ame ta asih nyamon. 11 Aso badeh nadu tinen aso, aso nadu ndramak ari le ya aso badeh lalou bwe, aso badeh ta wasai bwe, aso tiye sahou handru.”

12 Ano Josep tiye, “Bwe! Ado kede-eh ame ta anya kasilah kon munyak dah boto-on tan bwe udu heh.”

13 Ano oro tiye, “Aso nadu tine aso badeh ma ronoh la-uh; aso nadu ndramak ari le udu munyak Kenan. Eme nadu tinen aso ari badeh ndramak, arile iy ari le bahan badeh udu hawe tama aso.”

14 Eme Josep anya, “I buku le jo nane ndrasehek ndra-au eh. Ado kede-eh lalou! 15 I dah kameh asilah tanan ta takaleh ado! Jo badeh tandrakan ta nyara kabin, ta ado kameh winiyan ba-au bwe, ndra ado kandrei nadu tine ado bahan keme. 16 Ado ari kala kandrei iy. Ado mari kameh ado, iri lau ta ndrokei kameh atondrok ado, ndra kasilahei labai, ado tiye sahou handru de bwe. Eme kabin in ndra loke kahis, iy ki tanan ado badeh lalou.” 17 Ano badeh Josep atehei oro a bolo kou len taloh.

18 Ano na len taloh badeh Josep tiye i toro, “Jo badeh ndramak ta inoh Kindrei, ado kamwekes lahou doh ma ado kameh bamak bwe: 19 Ta kasilah ado tiye sahou handru badeh, ari tado kudu bolo kou kudu. Ado mari badeh ka-au kala katiye kalom ado ndrasihinei kede-eh ki na lowa tama ado ameson are kodo-oh. 20-21 Ano ado katiyani nadu tine ado bahan keme hawek. I doh kameh jo i tanan ado tiye sahou handru, ma jo kameh winiyan badai ado bwe ai.”

Eme oro asumon, ma oro tiye i toro ari ari, “Handru labai, na dah to akohok maha tato, ta to mene amwekes i bada nadu tine mene. To badeh anyolom isi ma maha tan mene iy aloh ta seben, arile to banuhun iy bwe. Eme adeh, to are bolo maha dah.”

22 Eme Ruben tiye, “Jo mene tiye anya, ado sadai iy samak, arile ado banuhun bohok bwe. Na i dah to akohok maha ta imek tan ai.” 23 Josep badeh anuhun ma iy tanan sahou mari oro asehek, arile oro baseleyani iy bwe, tasah ndramak ari badeh udu hawe oro ta tobolowe sahou toro i ta Josep. 24 Ano badeh Josep ruwani oro ado, eme iy ili badeh eden. Iy eden ano iy eme hamon badeh tiye sahou i toro ja, ano iy andrei Simiyon ma sawei iy, udu mada oro ma andrei iy iu.

25 Ano Josep eme badeh tiye iri anyuhiy ndrom ta nadu tinen oro na kalom ma tiye iri badeh atehei su-ubek toro ari ari i hamon i bolo ndrom toro, ma edeu noro nyamon ta san. Eme oro lakou doh ano badeh, 26 nadu tinen oro alokou ndrom kalom toro asih nane dah i bwele-e donki toro, ano ma oro au ai. 27 Eme oro adek ala amadin ben ari ado san. Eme na ben doh badeh iy ari toro anya kaseh ndrom tan anya kakohok nyamon kanyohan donki tan. Eme udu mada ndrom badeh iy atou su-ubek tan badeh udu aliy. 28 Eme iy aloh i ta nadu tinen oro, “Su-ubek tek ndrame hamon ja, asah udu mada ndrom tek kada-ah.!” Eme badeh oro abwerei labai, eme oro anya, “Kindrei amwekes sasah eme tato dah?”

29 Eme oro ame asahan hawe tama oro ame Kenan. Ano badeh oro asehek ta tama oro ta lakou mari nane asahan bada oro: 30 “Aso ala badeh ndramak ta atondrok munyak mari badu Ijip badeh asehek sahou nyarahan eme taso ma iy tiye anya aso badeh lalou. 31 Eme aso anya, ‘Aso dah lalou bwe! Aso tiye sahou handru, aso bawasai bwe! 32 Aso badeh ma ronoh la-uh, nadu ndramak ari le. Ya nadu tine aso ari badeh ndramak ya nadu tine aso ari le bahan badeh udu hawe tama aso udu kon.’ 33 Eme ndramak dah tiye, ‘I dah kameh jo kameh takaleh ado kede-eh tiye sahou handru de bwe.’ Eme iy anya, ‘Ari tado kameh kudu hawek kudu; ya ado mari kede-eh le kala katiye kalom ki na tama ado oro.’ 34 Ano iy tiye, ‘Ano ado katiyani nadu tine ado bahan keme hawek. Eme i dah kameh jo kameh i tanan ado badeh tiye sahou handru, ado badeh lalou bwe; ano ja kameh jo atehei nadu tine ado ewek hamon, ya ado kameh ado asih lakou.’ ”

35 Ano oro solowei ndrom toro, eme oro mari badeh atou su-ubek toro mari eme hamon; eme oro atou su-ubek badeh, oro ma hawe tama oro badeh anoh. 36 Ano tama oro tiye i toro, “Ado mari kede-eh anya kamwekes naduk kamai ma iy ki-iu ai? Josep mene ndra-au, ano Simiyon ndra-au ale; ano na dah ado anya kakohok Benjamin ja ai. Jo le kameh akohok maha ma isi ta aliy!”

37 Ano Ruben tiye i ta taman, “Tama, i buku none jo bandrei Benjamin bame hamon bwe, badeh ou adai naduk mwan ma la-uh ki saluwen. Ou atehei iy keme minek, jo kameh winiyan tondrokei iy ma jo kameh winiyan andrei iy eme hamon.”

38 Arile Jekop tiye, “Naduk winiyan bawek hawe ado bwe; nadu tinen mene ndramak, eme iy le ari le udu kada-ah. Koro-an ari lakou katok tan kudu san. Ya jo badeh ndra alon, koro-an ado kameh kamwesekei jo katikisiy ma jo kimek.”

<- Jenesis 41Jenesis 43 ->