Jenesis 28

1 Eme badeh Aisik luhi Jekop eme ano iy batanau iy ma atehei nyosowan i tan: “Ou badeh sasoh badih badu Kenan, ndri-i. 2 Ou badeh ales ala Padan Aram, ala asiu ta tama tinem Betu-el. Ou ala sudi ari badih badu bolo nadu Leban nadu tine tinem oro badeh. 3 Ma Kindrei badeh kudu hawem ma katehei nyosowan ki la-um ma lundriyem ki sola ma kasahan lau rakon buruwen. 4 Hawe iy badeh katehei nyosowan ki ta lundriyem oro, i buku none iy atehei nyosowan i ta Abraham. Ma hawe ou andrei lakou mari badu munyak ou manyah ado aliy dah, lakou mene Kindrei atehei i ta Abraham.” 5 Ano Aisik badeh tiye Jekop ili Padan Aram i hawe Leban iu ndrine Betu-el. Leban badeh nadu tine Rebeka ya Rebeka badeh tine Jekop uru Iso.

6 Eme Iso badeh ndratanan Aisik badeh ndratehei nyosowan ndra ta Jekop ma tiye iy ndra-au ndrala Padan Aram ta kasoh badih badu doh, na len iy edeu nyosowan i tan ma batanau iy badeh sasoh badih badu Kenan. 7 Eme Iso ale tanan taman uru badeh ndratiye iy ndra-au ndrala kon Padan Aram. 8 Ano badeh Iso badeh i tanan ai, ta Aisik badeh baseken badih badu Kenan bwe; 9 Eme Iso ili hawe Isma-el edek ndrine Abraham. Ya Isma-el badeh nadun badih la-uh udu aliy. Uru badeh nyara uru Mahalat hawe Nebayot. Eme badeh Iso sudi Mahalat i tan.

Jekop Ameh Udu Betel

10 Eme Jekop udu Bersiba eme len ma iy iu ili Haran. 11 Iy edek ili kon ari, an i andri ma iy amadin. eme iy andrei bek ari i nyara kason tan badeh ma iy amadin. 12 Eme badeh iy ameh ma iy atou kandren udu andri i kandrah ma atou iri angelo ta Kindrei badeh adek andri loken bada kandren dah. 13 Eme udu bwele-e kandren badeh Laban udu aliy tiye, “Jo dah jo Laban Kindrei ta tamam Abraham ma Kindrei ta Aisik. Jo kameh edeu munyak ou amadin ado aliy dah kameh i ta lundriyem oro. 14 Lundriyem oro kameh a sola i buku none kasu ndren badu munyak ma oro kameh aseker ala kum, ala lan, ma loboho an i andri. Iri lau mari badu munyak kameh jo edeu nyosowan i la-u iri tasah na ou hawe lundriyem oro. 15 Ou kameh heh a heh jo kameh udu hawem ma madak kameh udu tam ano jo le kameh, tiyaniy ou ame hamon ja ame munyak dah. Jo kameh winiyan bakahei ou bwe, winiyan le lakou jo mene tandrakan ou barasahan.”

16 Ano Jekop amak badeh iy lomondra, “Handru labai jo ndratanan, Laban kede-eh udu kon dah.” 17 Eme iy inoh labai ma iy anya, “Kon dah i buku sah handru! Handru labai i dah asiu ta Kindrei, i dah badeh mada san ta i bolo kandrah labai.”

18 Eme na mandraben badeh Jekop andrei kason ta batun dah tutuni udu loken i buku bek ta salom ano iy solowei ndrelekei i bwele-en ta kalem hawe ta ndrahu salom ta Kindrei. 19 Kon doh bwena aloh Lus arile iy aloh ja badeh Betel, moson, “Asiu ta Kindrei.”

20 Ano badeh Jekop tandrakan, “I buku none Kindrei udu hawek ma madan udu tek, udu bolo tekedek tek dah badeh iy kedeu nek nyamon ma kalawik kolau. 21 Eme ya jo kedek kili asiu ta tama ma mwasin le, ano badeh Laban barasahan Kindrei tek. 22 Ma bek jo tutuni udu loken kodo-oh badeh kameh asahan asiu ta Kindrei. Ma udu bolo lakou mari ou adeu eme tek badeh kameh jo edeu sese ja i hamon i tam, i buku none ronoh, badeh kameh jo edeu ari ewek tam.”

<- Jenesis 27 Jenesis 29 ->