1 Taha ado mwasin na dah, tasah Krais kuhi taha, ado bahandra batanau malen ame len. Eme ya aha badeh, kabadok aha, ta aha sala bonyo-ou sala baha maha-an ta batanau malen ja.

2 Aha kanuhun, jo Pol amwenen tiye taha dah: I buku ado anya ka-en hamon ta batanau malen tiri Juwis ta asan ku-i ado, badeh, Krais kameh winiyan baseben ado se bwe. 3 Tasah, jo tiye sahou ndraleu ndrawek taha! Buku aha a-en hamon ta ari batanau malen badu Juwis, i buku ta asan ku-i aha, badeh, aha ka-en hamon ta batanau malen mara-ei tiri Juwis ale. 4 Buku aha anya ka-en hamon ta batanau malen, ya, na san doh aha abudon Kindrei winiyan aloh aha mwasin mara-ei ta madan, aha ndrandra-i kede-eh! Aha winiyan bwe! Arile, ta kandriyen doh badeh, aha ndratehei kona aha badeh, ndrala ta tikisiy ta Kindrei, ma ta kandriyen ta Jises Krais mene imek udu ta kei tondreh, ta aseben taha mwan ma badih marakon. 5 Arile, Malawin Ndrabun ta Kindrei badeh, ibo gok ta amekes budon tahi mara-ei kabadok, na len ahi atondrok manyah mwasin ta Kindrei hamon doh. Ma Krais kameh amekes ahi asahan amwenen handru i le buku iy. 6 Ma, Krais badeh, aso-ok taha labai, eme ma taha aso-ok iy ma a-en hamon tan. I buku ari ndramak iy anya kisan ku-in, o bwe, idoh lakou laleyah. Lakou laba tinan badeh, i buku doh: Taha badeh, katehei budon tataha handru ki-in le ta Krais, tasah taha badeh, aso-ok iy tinan labai.

7 Aha mene an hamon ta kandriyen ta Krais ma aha sakaliye mwasin labai. Ya, are lau handru eme sokei san taha, ma tiye aha tebelese i ta sahou handru? I buku sah iy aruwi aha? 8 Kandriyen ta andrek badeh, bare boho Kindrei aloh ado mene bwe. 9 Aha tana aha kandriyen ta andres badeh, i buku yis. Iri atehei sese le, arile winiyan abe-ei jabi ramen mara-ei. 10 Arile, taha badeh, ahas hawe Krais, eme budon tek ndrabadok ndrala ta Laban, ta aha winiyan bakohok budon ari ja bwe. Eme ma, are lau oro wendreya aha kameh bwese maha-an ta aliy.

11 Aha nadu tine, buku jo amekes sahou ta leheya aha lau mwan ma badih ta Kindrei ka-en hamon ta batanau malen tiri Juwis ta asan ku-i aha; iri Juwis kameh winiyan bamekes kandriyen ta bokoro-ei jo bwe. Arile, jo baleheya aha bala buku badeh, bwe. Eme ma iri abo gok ta bokoro-ei jo le ai. Ma ndrine iri badeh, irih tek kahis, tasah jo badeh, asehek ta nyala kei tondreh mene iri tatahi Jises Krais udu aliy. 12 Ya, i buku none iri rayah kandres labai ta kasan ku-i iri, jo anya, mwasin labai ta oro doh, kasani ku-i oro mari ki-iu!

13 Ya, aha nadu tine, aha ndrasahan mwasin, tasah Kindrei ndraluhi aha ndrame len ta batanau malen tiri Juwis. Arile, aha salelei kandriyen mwasin doh samesekei aha sa-en hamon ta budon ta bada aha badu munyak. Arile, kandriyen ta tikisiy badeh, kamesekei aha kaseben aha ari, ari. 14 Tasah, batanau malen mari eme bahandra batanau ari le:

16 Eme ma, jo asehek i buku doh: Aha kalelei Malawin Ndrabun katondrok manyah ma kandriyen taha, ya, i buku aha amekes eh, aha winiyan ba-en hamon ta seken ta kandriyen ta bada aha ja bwe. 17 Tasah, so-ok ma kandriyen ta bada taha i randrah labai, bala buku none so-ok ma kandriyen ta Malawin Ndrabun bwe. Uru ma la-uh doh winiyan badek se bwe. Eme ma, iri lakou aha anya kamekes, aha winiyan bamekes bwe. 18 Arile, i buku none aha a-en hamon ta Malawin Ndrabun eh, badeh, aha ba-en baha batanau malen bwai.

19 Kandriyen ta bada taha badeh, i buku doh: Kandriyen ta karei i buku mwi, kandriyen ndra-in ta sumukok; 20 kandriyen ta adeu budon i ta sukumada kei i nyara Kindrei, ya kandriyen ta kau hawe omor lau; ya kandriyen ta budon ndra-in ta losen hawe sobobo; ya hawe kandriyen ta madalakis; hawe ndramak ndrinen ndra, ma hawe kandriyen ta ndrakok. Ya kandriyen ta amekes iri lau atalan, rayah ka len, ya rayah ka len; 21 Iri kandriyen i buku madalakis ta lakou, ma hawe a-un gwa boto-on ta amekes lau abo lolo-ou, ma ta amekes lakou laleyah. Jo tiye sahou batanau i taha dah, i buku bwena jo ndrasehek taha: Oro are lau amekes kandriyen doh, winiyan bado bahandra tondrok ta Kindrei bwe.

22 Arile, Malawin Ndrabun badeh, edeu kandriyen ta tikisiy, kandriyen ta sekesek, kandriyen ta amekes mondrei, kandriyen ta bohon bwe, kandriyen ta aseben, kandriyen mwasin hawe kandriyen ta amekes lahou mwasin ta budon tan handru, 23 kandriyen ta ou amekes ou batudun ou bwe, ma hawe kandriyen ta budon tam winiyan bandra-i bwe. Ya eme ari batanau malen winiyan baturuki iri kandriyen doh bwe. 24 Eme, are lau oro badu hawe Jises Krais badeh, ndrasani san ta kandriyen ta bada oro satondrok oro. Idoh i le buku oro ndratahi so-ok ndra-in ta bada oro kimek ki-in bada kei tondreh. 25 Malawin Ndrabun edeu kohan handru eme tataha; eme ma taha kalelei iy katondrok bolo tekedek tataha. 26 Taha sabudon anya taha ndra ari ai, bwe. Ma taha sasakalau ndramak ari ari, ma hawe mada taha salikis ndramak ari ja.

<- Galesiya 4Galesiya 6 ->