GALESIYA

Sahou Tanan

Iri lau ma mwena a-en hamon ta Jises badeh, iri le Juwis amwenen. Arile udu hamon ja, Jises eme suni aposel Pol ili ta atiye sahou mwasin ili tiri lau mwan ma badih badu bolo kon rakon ja ale. Eme ma, udu bolo len doh, iri lau solo-an ale ame a-en hamon ta Jises, ma lakou ari maha-an asahan. Bwena mene iri lau doh ba-en hamon ta batanau ta Moses, bala buku iri Juwis amekes bwe. Na len iri asahan lau ta Kindrei, iri ale ka-en hamon ta iri batanau ta Moses, o bwe?

Lau rayah badeh, anya katiye iri lau nane doh kasan ku-i iri ta kandriyen tiri Juwis, ma ka-en hamon tiri batanau rayah ta Moses. Arile Pol anya bwe. Iy anya, taha katehei budon tataha kili le ta Jises Krais, ma idoh le kameh winiyan bwidi taha asahan lau mwasin handru ta mada Kindrei, ma taha akohok koha taha ha-un.

Nyolom ta aliy i buku iri Juwis rayah nane doh mene ndrala loboho kon tinan Galesiya, ma iri anya kanone kamekes iri lau ta Kindrei ka-en hamon ta iri batanau ta Moses. Pol anuhun sahou ta lakou doh asahan, iy eme torowenei la-ukei dah ili tiri Galesiya ta amekes budon ma kandriyen tiri kudu mwasin ja.

Ma bwena badeh, Pol asehek i buku doh: Kindrei le amwenen atehei iy ta amekes gok buku aposel. Iy ba-en ta budon tan amwenen le bwe, ma iy ale ba-en hamon ta sahou ta ndramak ari le bwe. Kindrei mene aloh iy, ma atehei gok i tan ta atiye sahou mwasin ili tiri lau tana iri Kindrei bwe. Udu ja, Pol asehek i buku doh: Iri lau atehei budon tiri handru in ta Jises Krais, iri le winiyan asahan lau mwasin ta are mada Kindrei. Sahou ta la-ukei dah anya kano, i buku doh: Krais mene amekes taha ame len asahan mwasin; Malawin Ndrabun badeh, edek in mwena ta leheya san tataha, ma taha winiyan amekes kandriyen mwasin ili tiri lau rayah ja.

Iri Sahou Tinan

Aposel handru ma sahou tan handru (1:1-10)

Kindrei atehei Pol asahan aposel (1:11-24)

Pol ales boto-on ta sahou tan (2:1-21)

San ari le ta ou bwalem amak, badeh, budon le (3:1–4:31)

Malawin Ndrabun ta tikisiy in mwena tataha (5:1–6:10)

Batanau boto-on (6:11-18)

1-2 Jo Pol: Jo badeh, aposel tiri lau ta Kindrei. Jo atorou la-ukei dah ewek taha lau mwan ma badih ta Kindrei ale are bolo kon munyak tinan Galesiya. Iri lau nane ahi amekes lahou se badeh, ale are hawek, ma iri ale anya, bada-an mwasin tiri ewek taha. Jo aposel ari, eme ma jo badeh, edek ma atiye sahou ta Kindrei. Idoh badeh, basahan na seken ta ari ndramak, bwe. Idoh badeh, asahan na seken ta Jises Krais hawe taman Kindrei le amwenen. Uru le amwenen badeh, atehei gok dah eme tek ma suni jo ta atiye sahou mwasin ewek taha. Jises mene imek, arile Kindrei ndramete-ei iy udu ta imek tan badeh, ndrame awas ja.

3 Jo anya kedeu bada-an mwasin kewek taha ale. Tikisiy ma mondrei ta tama taha Kindrei hawe Laban tataha Jises Krais ewek taha. 4 Kindrei mene suni Jises eme andri kon munyak, iy le amwenen imek ta sikine karei ma lomondra ndra-in tataha. Iy bwalen iri kandriyen ndra-in badu munyak dah kabokoro-ei taha. Eme ma, iy eme dah badeh, ta aseben taha, ta iri kandriyen doh kameh winiyan baluwi taha bwe. Idoh, in hamon ta seken ta tama taha Kindrei le. 5 Iy badeh, udu bwele-en labai tiri lakou mara-ei. Boto-on tan hawe lomadan badeh, winiyan bano bwe. Eme ma taha kamasiye ma katudun iy kudu le buku doh! Handru.

6 Aden! Manik badeh, atur labai ta kandriyen aha amekes. Tasah, aha badeh, a-en hamon ta kandriyen mwasin ta Jises nane dah, ma se nawin bwe, aha anya karuwani Kindrei, ta a-en hamon ta kandriyen randrah ja. Ta tikisiy ta Krais le badeh, Kindrei luhi aha ame asahan lau tan. Arile, kandriyen nane aha abudon ta a-en hamon ta aliy badeh, bado se hawe sahou mwasin tan handru bwe. 7 Ya, kandriyen ha-un nane badeh, mwasin handru bwe. Kandriyen ari le doh badeh, mwasin mara-ei. Idoh badeh, kandriyen ta Krais. Iri lau nane ndrasahan hawe aha badeh, iri anya katobolowe kandriyen ta Krais kasahan randrah ja. Ma iri ale anya kabolowa budon ma manyah taha sasahan samwenen. 8 Sahou mwasin ta Krais doh badeh, aso mene leheyani aha ta aliy badeh, mwasin labai. Eme ya, ki buku none aso deh, bwe-em, ari angelo badu kandrah, karuwani sahou mwasin ta Krais doh, ma katiye sahou mwasin ki randrah labai ja, ta aha sa-en hamon ta sahou mene aso atiye dah, badeh, jo aseken ta iy ndramak doh badeh, kakohok maha-an hawe sisi-in ndra-in, ta udu le buku doh! 9 Aso mene ndrasehek ndra-au, ya, na dah badeh, jo anya kasehek ja: Ki buku are lau katiye sahou randrah ja, ta sahou mwasin ta Krais mene aha ndranuhun badeh, jo aso-ok iy ndramak doh badeh, kakohok maha-an ma sisi-in ndra-in labai kudu le buku doh!

10 Jo babudon solo-an ta budon tiri mwan ma badih bwe. Buku iri baso-ok jo bwe, jo ari sahou ta aliy bwe le. Jo ndramak ari ta atiye sahou handru, ma jo aso-ok Kindrei le amwenen kasekesek ta gok tek. Buku iri basekesek ta sahou nane jo asehek bwe, ndri-iy ai. Buku jo ndramak ari ta atamar le iri lau, jo winiyan basahan lohowan ta Krais bwe.

11 Aha nadu tine, jo anya katiye kamwenen ki taha, ta aha katanan ta sahou mwasin jo atiye mene ewek taha badeh, basahan ta budon ta ari ndramak bwe. 12 Jo badeh, bakohok ma banuhun sahou mwasin dah badu boho ari ndramak bwe. Ma ari ndramak baleheya sahou mwasin dah bame tek bwe. Jises Krais le amwenen badeh, leheyani jo ta iri sahou mwasin mara-ei doh.

13 Aha mene ndranuhun ma ndratanan kandriyen ta bolo tekedek tek ma loweu udu bolo iri Juwis. Jo badeh, in hamon ta kandriyen tiri. Jo udu buku doh badeh, ma jo baso-ok iri lau ta Kindrei bwe. Ma jo anya kidi iri lau ta Kindrei kamak kano ka-au. 14 Ya, oro Juwis rebesem badu hawek badeh, jo sakalau oro ja ta kandriyen ta batanau. Jo sakalau oro ta bolo kandriyen ta tubu ahi, iri asehek eme tahi Juwis. Ma eme, budon tek irih labai ta in hamon ta kandriyen ta tubu ahi iri.

15 Jo badeh, in hamon ta kandriyen doh, arile Kindrei baso-ok lakou doh bwe. Arile, jo basahan bwe le, Kindrei badeh, ndratanan jo ai, ma iy ndratehei jo ta amekes lahou tan. Eme ma, na tikisiy tan le badeh, iy atehei jo amekes lahou tan. 16 Iy le amwenen leheyani nadun asahan eme madak, ta jo kameh katiye sahou tan mwasin kili tiri lau badu leheleh. Ya jo bala hawe ari ndramak bakohok tanan tan bwe. 17 Oro aposel ado Jerusalem badeh, bwena tek labai. Arile, jo bala hawe oro bakohok tanan toro bwe. Jo badeh, ili kon ari doh, lau solo-an bado aliy bwe, iri aloh Arabiya. Jo ili ere aliy ano badeh, jo eme hamon eme kon tinan Damaskus. 18 Udu bolo jaha ma taloh ano badeh, jo ili kon tinan Jerusalem ta atou aposel ari, nyaran Pita.*Udu bolo la-ukei dah Pol aloh Pita Sepas. Idoh nyaran i boho kon tiri Aramek. Jo udu hawen badeh, len ma ronoh limeh (15) le. 19 Jo badeh, batou oro aposel marakon bwe. Jo badeh, atou le Pita hawe Jemis, nadu tine Laban tataha Jises.

20 Sahou marakon jo atorou ewek taha dah badeh, ndra handru le ai. Jo bawendreya aha bwe. Kindrei tanan saba lakou jo asehek. 21 Ano jo udu Jerusalem iu ili loboho munyak tinan Siriya hawe Silisiya. 22 Na len doh, iri lau ta Kindrei badu Judiya bala tanan jo bwe le. 23 Arile, iri anuhun le, lau asehek anya, “Iy ndramak mene ta idi taha. Arile, nadah ja badeh, iy ndraruwani kandriyen ndra-in doh ndra-au. Bwena badeh, iy bwalen labai ta sahou mwasin ta Krais, arile, nadah ja badeh, iy ndratiye ndrala ta lau ja ai.” 24 Eme ma, iri sekesek ma atudun nyara Kindrei. Tasah, jo badeh, ndra-en hamon ta Jises.

Galesiya 2 ->