1 Jo Pol, jo ta amekes lahou ta Krais Jises, eme ma jo udu bolo asiu lulik kada-ah. Tasah, jo badeh, atiye sahou i buku doh: Aha mwan ma badih badu leheleh, aha ale are bolo iri lau ta Kindrei. 2 Sebwe, aha ndranuhun buku, Kindrei badeh, tikisi jo, ma atehei jo ta amekes gok dah; iy amekes ta tikisi aha ale. 3 Sahou dah, ta lakou Kindrei amekes, bwena mene aton kahis, arile Kindrei le amwenen ndraleheyani ndrame tek, eme ma jo ndratorowenei sese ndrawek taha.*Ou anyolom ili ta 1:9-10. 4 Na dah, aha anyolom sahou dah, ano aha kameh atanan buku, jo badeh, ndratanan handru ta sahou mene aton ta gok ta Krais amekes. 5 Bolo len marakon bwena badeh, Kindrei batiye baleu bame lewan ta sahou mene aton doh bwe. Arile, idah na Malawin Ndrabun, Kindrei asehek sahou dah aleu eme tahi aposel hawe iri propet tan. 6 Ma sahou i buku doh: Na le sahou mwasin, aha mwan ma badih badu leheleh winiyan asahan rabuk le, ma aha a le se hawe ahi lau badu Isra-el. Eme ma taha marakon kameh winiyan akohok iri lakou Kindrei ndratandrakan ta edeu eme tataha mwan ma badih ahis hawe Jises Krais. 7 Kindrei atehei jo, ya jo asahan lau ta atiye sahou mwasin dah. Kindrei amekes i buku doh, tasah iy tikisi jo, ma na boto-on tan amwenen, iy atehei ndramas eme tek ta atadau budon handru tiri mwan ma badih. Eme ma, gok doh badeh, jo amekes. 8 Jo lau laleyah†Sebwe Pol asehek i buku doh, tasah iy mene idi iri mwan ma badih a-en hamon ta sahou ta Jises. udu ndrokowa iri mwan ma badih ta Kindrei, arile iy tikisi jo, ma iy atehei jo ta atiye sahou mwasin ili tiri mwan ma badih badu leheleh. Sahou mwasin doh ta iri lakou marakon iri mwan ma badih winiyan akohok ta koha iri, buku iri a-en hamon ta Krais. Ma lakou doh kameh winiyan bano bwe. 9 Bwena mene, Kindrei bwidi iri lakou marakon, ma na len doh badeh, iy tone iri budon tan ta iri kandriyen marakon hamon iy anya kamekes. Ya, budon doh mene aton udu bwena, eme ano dah. Arile, na dah, iy atehei jo ta asehek aleu eme lewan iri budon tan dah. 10 Budon ta Kindrei i buku doh: Na bolo len idah iri mwan ma badih badu Juwis, ma iri mwan ma badih badu leheleh, ndramanyah mwasin ma ndrasahan lau tan. Kindrei aseken iri angelo ma lau tinan tiri ado kandrah, iri kanyolom iri tanan mwasin ta Kindrei doh. 11 Idoh asahan ma in hamon ta budon bwena Kindrei tawiy ma abudon ta amekes na gok ta Jises Krais, Laban tataha mari. 12 Taha ndrahis hawe Krais na budon tataha. Jises badeh, san tataha ta ili asahan hawe Kindrei. Eme ma, taha winiyan banoh ta ame hawen bwe. Tasah, taha tanan iy kameh sekesek labai ta taha ame hawen. 13 Eme ma, jo kasehek taha ai: Sisi-in jo bwese dah, aha sabudon ta aliy ma ndrine aha sandra-i ta aliy. Tasah, iri maha-an doh leheya buku Kindrei tikisiy ma aseken aha mwan ma badih badu leheleh tinan labai, ma iri kameh aseben aha asahan buku Krais.

14 Jo abudon ta tanan ta Kindrei ma lakou laba tinan iy mene amekes, ma bwidi jo atehei bwili ndru-uk i andri ma asolom ili ta tama taha Kindrei. 15 Iy le amwenen tondrohon nyara taha lau tan marakon nane atehei budon handru in tan le, iri mwan ma badih ndramak bwena, ma ado kandrah, ma taha mwan ma badih ado ndra awas are kon munyak kahis. 16 Ya, jo atehei bwili ndru-uk i andri, ma jo asolom i buku doh: Kindrei tan lakou solo-an labai, ma hawe iri boto-on. Eme ma, jo aso-ok iy kamekes ndrine aha kabadok na boto-on ta Malawin Ndrabun tan. 17 Ma aha winiyan atehei budon boto-on in ta Krais, ma iy kameh winiyan manyah hawe aha udu le buku doh. Jo asolom ale ta tikisiy ta Kindrei katadau aha ta amekes kandriyen ta aso-ok lau rayah ja, eme ma aha winiyan ales boto-on buku, kandro kei ateu ndren ta kei ales boto-on. 18 Ya jo aso-ok Kindrei kaseben aha ma hawe iri mwan ma badih marakon tan, ta aha mari winiyan atanan ta sabe handru Krais aso-ok aha. Ma tikisiy tan doh ili lawe-en labai, ma ili loken labai, ma ili andri labai. Ya, ari apus tan bwe! 19 Ya, jo aso-ok aha katanan handru ta tikisiy ta Krais, iy udu bwele-e iri budon tiri mwan ma badih mari. Ma jo aso-ok Kindrei kanyuhi aha na iri lakou iy winiyan atehei ewek ta koha aha, ma aha kameh winiyan arek handru ta aliy.

20 Boto-on tan ibo gok ta koha taha. Boto-on doh winiyan tubuluhi salom ma budon tataha, ma winiyan amekes gok tinan handru. 21 Iri mwan ma badih ta Kindrei amwenen katudun nyaran. Iri kamekes na le nyara Krais Jises, ya lomadan kudu le ta lau rebesem, ano rebesem ja, kudu le buku doh. Handru!