1 Bwena mene aha mwan ma badih ado buku iri lau ndramak. Tasah, aha tebelese sahou ta Kindrei, ma amekes iri kandriyen solo-an ndra-in. 2 Ya, kala len doh badeh, aha an ndra hamon ta kandriyen ndra-in badu kon munyak. Aha an ndra hamon ta tinan tiri malawin ndra-in balik. Na bolo len dah, malawin ndra-in doh edek ili bolo ndrine iri mwan ma badih ale, ta tebelese sahou ta Kindrei, ma iy atondrok iri. 3 Taha marakon mene badeh, asahan buku iri mwan ma badih doh, ma taha an ndra hamon ta so-ok ndra-in ta budon tataha malen. Ya, taha ndra-en hamon tiri lakou marakon, bada taha ma budon tataha anya kamekes. Taha ado buku le aliy, ma taha kameh winiyan akohok ndramas ndra-in doh, buku iri mwan ma badih rayah ba-en hamon ta Kindrei bwe.

4 Ya, taha amekes kandriyen ndra-in solo-an labai, ma taha a buku iri lau ndramak ta budon ta Kindrei. Arile, iy aso-ok ma tikisi taha tinan labai. 5 Eme ma, iy mete-ei taha asahan ame awas hawe Krais. Ya, Kindrei bwidi kandriyen mwasin eme tataha, ma iy andrei taha ame hamon. 6 Kindrei mene mete-ei taha ame awas ja hawe Krais Jises. Ma ta Krais le badeh, Kindrei aso-ok taha katondrok iri lakou marakon udu kandrah, hawe Krais. 7 Iy amekes iri lakou marakon doh, ta leheya iri mwan ma badih ta len hamon, kandriyen mwasin ma tikisiy tan badeh, laba tinan labai. Ya, Krais Jises amekes ta akunoh taha ame hamon, eme ma, ta gok doh, Kindrei ndraleheyani taha, iy aso-ok iri mwan ma badih labai. 8 Lakou doh, aha amwenen mene bamekes bwe. Kindrei edeu laleyah ewek taha. Aha mene atehei le budon handru in ta Krais, ma na so-ok ta Kindrei le amwenen, iy andrei aha ame hamon ja. 9 Idoh winiyan basahan bala buku ndramas ta gok nane aha amekes, bwe. Eme ma, ari mwan o badih winiyan batudun nyara iri amwenen bwe, ma anya, “Jo le amwenen ibo gok, ma jo asahan mwasin ta budon ta Kindrei, ma iy andrei jo eme hamon ja.” Idoh sahou ta wasai! 10 Tasah, Kindrei le amwenen amekes taha, ma ta gok mene Krais Jises amekes, Kindrei bwidi taha asahan ha-un ja, eme ma taha winiyan amekes kandriyen mwasin buku bwena mene iy lowosa taha, ma aseken taha kamekes, ma ka-en hamon ta aliy.

11 Aha ndratanan, na mine iri le amwenen, iri lau badu Isra-el mene asan ku-i iri. Ma iri aloh aha lau tiri bwe. Eme ma, aha kabudon kili hamon ja, aha mene are buku sah handru. 12 Bolo len doh badeh, aha bahis hawe Krais bwe le. Aha are ndra len labai tiri lau badu Isra-el, iri lau mene Kindrei atehei iri kasahan lau tan amwenen. Iy edeu sahou randra le ili tiri, ta iy kameh nyosowani iri, buku bwena mene iy ndrasehek. Arile, aha are ndra manan ta lakou doh. Handru, aha ado ndra kon munyak dah, arile aha batondrok Kindrei ta akohok aha bwe. Tasah, aha bala tanan sahou randra le ta Kindrei ma tandrakan tan bwe. 13 Ma, aha are ndra len labai ta Kindrei, arile na dah, ndraye Krais badeh, tiyani aha ame, na Krais Jises le, aha are mirihik labai ta Kindrei. 14 Krais le ari bwidi iri mwan ma badih marakon asahan amwenen. Buku sah handru? Bwena mene iri lau badu Isra-el amekes bahun hawe iri lau badu leheleh, ma budon tiri doh asahan i buku kowah udu ndrokowa taha. Arile, na badan amwenen, Krais ndratohowei kowah doh ndra-au, ma iy tukumwi iri lau tataha marakon ala le rabuk. 15 Ma iy ndrakahei kandriyen malen mene ta Moses hawe iri sahou batanau badu hawen badeh ndra-au. Iy amekes i buku doh ta atukum iri mwan ma badih badu Isra-el amwenen, ma iri mwan ma badih badu kon leheleh. Ma iri asahan lau rabuk ha-un ja ahis le hawe Krais. Ta kandriyen doh le, bwidi ndrine taha udu mwasin labai. 16 Ehe, Krais imek udu bada kei tondreh, ma ta gok doh, iy ndrasani kandriyen ta adai lau laleyah udu ndrokowa iri mwan ma badih badu Isra-el amwenen, ma iri mwan ma badih badu kon leheleh, kasahan rabuk le. Eme ma, iy ndradai kandriyen ta bahun laleyah ndra-au. 17 Iy mene eme kon munyak ta atiye sahou mwasin i buku doh: “Na dah aha mwan ma badih marakon, ndrine aha winiyan udu mwasin.” Ya, iy ndratiye sahou mwasin doh ndrawek taha lau nane tanan batanau ta Kindrei bwe, ma iri lau badu Isra-el doh tawi batanau ta Kindrei ma tanan ta aliy. 18 Sahou doh handru. Tasah, na Krais le ari, taha lau marakon akohok Malawin ari le nane doh, ndrasihi san, ta taha winiyan asahan hawe tama taha Kindrei.

19 Eme ma, aha mwan ma badih badu kon leheleh, aha bare buku lau leheleh ja bwe. Idoh ndrano. Na dah aha ndrala le hawe iri lau ta Kindrei, ma ndrasahan lau tan amwenen. 20 Aha asahan buku asiu, Kindrei amekes. Iy mene atah ahi aposel hawe iri propet bwena; ahi asahan buku ndru ta asiu doh. Ya, Krais Jises asahan buku ndru alih ta bwese maha-a asiu marakon doh. 21 Iri ka-e asiu doh badeh, ihis hawe Krais, ma udu boto-on labai. Kindrei le amekes kahis, ma anya kasahan ki tinan handru, ma kasahan asiu ndrabun ta atudun Laban. 22 Ma aha ale ndrahis hawe Krais. Ma Kindrei ndratukumwi taha hawe iri lau ta Kindrei rayah, ma aha ndrasahan asiu tan handru. Eme ma, Kindrei badeh, na Malawin Ndrabun tan, winiyan ere bolo aha.

<- Epesus 1Epesus 3 ->