1 Na len doh Sol badeh, udu aliy anyolom ale ma iy tiye iri ta kadai Stiben kimek.
Iri lau budon tiri handru in ta Kindrei bwese isi ma iri aseker
Eme na le bolo len doh badeh, iri lau mwan ma badih nane manyah ado bolo kon tinan Jerusalem amekes ndra-in labai, ili tiri lau nane atehei budon tiri handru in ta Jises, eme ma iri akohok sisi-in laba tinan labai. Eme ma iri atobwak au ala loboho kon munyak tinan Judiya hawe Samariya. Arile, oro aposel le badeh, batobwak bwai. 2 Eme iri lau ta Kindrei rayah ame aden ndranye Stiben. Ano iri ala ahi iy. 3 Iy ndramak Sol doh badeh, edek ta idi iri lau nane atehei budon tiri handru i ta Kindrei. Iy edek ili asiu ra-em ili ra-em takaleh ma aliu iri mwan hawe iri badih ame, ma adeu iri ala bolo kou.
Oro aposel atiye sahou ta Jises ili Judiya ma hawe Samariya
(Kalan 8:4–12:25)
Pilip udu kon Samariya
4 Iri lau mwan ma badih nane atehei budon tiri handru in ta Jises badeh, atobwak ala ado bolo kon mara-ei, ma iri atiye sahou mwasin ta nyala Jises ili loboho heh iri adek ma ala ado aliy. 5 Pilip badeh, ili andri bolo kon tinan ari badu loboho Samariya, atiye sahou ili tiri lau ta nyala Jises, ta iy ndramak doh Krais, iy mene Kindrei ndraleheyani iy eme ta aseben taha mari. 6 Eme na len iri lau anuhun sahou ta Pilip asehek ma anyolom kalem iy amekes badeh, ma iri atehei ndranye iri irih labai ta anuhun sahou iy asehek. 7 Ma hawe iri malawin ndra-in badeh, anyar ma ame len ta ndramak, ma hawe lau kati iri imek, ma bada iri imek badeh, mara-ei amwenen ja. 8 Ya iri lahou tinan ta Kindrei eme bolo kon tinan doh badeh, ma bwidi iri lau mara-ei sekesek laba tinan labai.
Saimon ndramak ta amekes balahak
9 Ya ndramak ari nyaran Saimon udu kon tinan doh ale badeh, amekes balahak san solo-an solo-an ndra-au, ya amekes iri lau mari badu loboho Samariya, boho iri asak ta aliy. Iy badeh, atudun iy anya, iy le kabwai. 10 Ya eme iri lau mari ma tinan ma bwisik badeh, atehei budon tiri i tan anya, “Iy ndramak dah badeh, iy Kindrei, ma boto-on tan ili labai.” 11 Iri lau badeh, an hamon tan, tasah iy badeh, bwidi boho iri asak san solo-an labai, ma amekes kalem luluwen labai. 12 Arile, na len Pilip tiye tiri ta sahou mwasin ta nyala tondrok ta Kindrei ma hawe nyara Jises Krais, iri mwan hawe iri badih badeh, atehei budon tiri in ta sahou ta Pilip, ma alomwa iri. 13 Ma Saimon ale atehei budon tan handru in tiri sahou doh, ya eme alomwa iy ale. Eme ma iy in hamon ta Pilip ili kon rakon, rakon, ma anyolom iri kalem tinan Pilip amekes ma bohon asak.
14 Eme na len oro aposel ado Jerusalem anuhun iri lau badu Samariya badeh, ndrandrei sahou ta Kindrei, eme oro suni Pita uru Jon ala anyolom oro. 15 Eme uru ala asahan hawe oro lau mwan ma badih nane, uru asolom oro ta oro kakohok Malawin Ndrabun, 16 tasah Malawin Ndrabun badeh, bala la-u oro ari bwe le; oro badeh, alomwa oro na nyara Laban Jises le. 17 Ano Pita uru Jon atehei mine uru i la-u oro, ma oro adah na Malawin Ndrabun.
18 Eme na len doh Saimon anyolom oro akohok Malawin Ndrabun i san ta oro aposel adeu lim i la-u oro badeh, iy anya kedeu luk ki ta Pita uru Jon ta asih boto-on turu nane doh. 19 Eme ma iy tiye turu i buku doh, “Ah katehei boto-on badeh, keme tek ale, ya i buku none jo kedeu minek ki la-u are ki la-u are, iri kakohok Malawin Ndrabun ale.”
20 Eme Pita anya, “Ou ndrandra-i kede-eh, ou abudon anya, ou winiyan sihinei ndramas ta Kindrei dah na luk tam badeh? Arile, bwe! Ou ma luk tam badeh, kameh amak. 21 Ou badeh, balem bahas ta lahou dah bwe, tasah ndrinem badeh, bamwenen ta mada Kindrei bwe. 22 Ou tubuni ndrinem ta kandriyen ndra-in badeh, ya ou amekes salom ki ta Laban. Sebwe iy winiyan mani budon ndra-in marakon udu ndrinem badeh ano iu. 23 Tasah, jo anyolom ou badeh, ndradah na iri madalakis hawe kandriyen ndra-in ndrasebete-ei ou.”
24 Ano Saimon anya, “Ndri-iy! Ah kamekes salom kili ta Laban ta aseben jo, ya eme sasah nane ah ndrasehek badeh, kameh sasahan tek.”
25 Ya uru asehek sasah uru tanan ma ndranyolom udu bada Jises amekes ma asehek sahou ta nyala Laban ano badeh, Pita uru Jon au a hamon ja ala Jerusalem. Ya udu bolo tekedek turu au a hamon badeh, uru atiye sahou mwasin ili kon solo-an badu loboho Samariya.
Pilip hawe ndramak ari badu kon Itiyopiya
26 Eme angelo ari ta Laban eme tiye Pilip anya, “Ou ala san ili loboho kum, kon lomale an ala udu Jerusalem i andri ili kon tinan Gasa.” 27 Eme iy edek ili badeh, ndruni ndramak ari badu Itiyopiya. Iy badeh, ndramak ari tinan ta atondrok lakou mwasin mwasin ta kabin badih badu Itiyopiya nyaran Kandasi. Iy badeh, mene ili Jerusalem ta atudun Kindrei. 28 Ano, iy udu san ta ki-iu ki kon ja ai. Ya iy badeh, udu bwele-e sau, ya iri hos aliu iy. Eme iy manyah udu bwele-en badeh, anyolom sahou propet Aisaya mene atorou. 29 Eme Malawin Ndrabun tiye Pilip anya, “Ou ala mirihik ta sau ale iri hos aliu kodo-on.”
30 Ano, Pilip sakaliye ili mirihik ta bada sau nane anuhun ndramak dah aloh sahou badu bolo tarou ta propet Aisaya. Eme Pilip ndremenya iy anya, “Batum aleu ta sahou ou aloh badeh, deh bwe?”
31 Eme iy anya, “Batuk kaleu ta aliy ki buku sah? Ki buku none ari ndramak keme kaleheya keme tek.” Ya eme iy tiye Pilip anya, “Ou ame loke manyah ado hawek, ma aseben jo.”
32 Eme ma, Pilip ili loke hawe
ndramak doh, anyolom tarou ta buk ndrabun ranah nane, atorou i buku doh,
“Iy badeh, i buku none ari sipsip andrei iy eme len ta adai iy;
Iy badeh, i buku none ari sipsip nadu bwisik se balohou bwe na len anya kasan lamin;
Iy badeh, randra sahou bwe.
33 Iri atehei iy i andri labai, ma iri atehei iy i ta mada sahou, arile iri balelei iy, ta mada sahou tan bwe,
Are lau handru barasihidi saren barala ta lundriyen oro?
Tasah iri ndradai iy ndramak.” Aisaya 53:7-8
34 Eme ma ndramak tinan badu Itiyopiya ndremenya Pilip anya, “Abo, ou tiye tek, are propet handru asehek nyalan dah? Iy asehek iy le deh? Bwe-em iy asehek nyala ndramak ari ja?” 35 Ano Pilip asehek nyalan ta sahou nane iy aloh, ma asehek sahou mwasin ta nyala Jises i tan.
36-37 Eme uru sakaliye ado san ala badeh, asahan ta gwa rayah,
*8:36-37:Iri lau rayah ta tanan abudon anya sahou ari ja asahan bolo tarou dah. Sahou doh asehek i buku doh, (37) Ma Pilip tiye, “Buku ou atehei budon tam handru in ta Jises, badeh, kameh jo winiyan anyuwi ou ai.” Eme iy anya, “Jo atehei budon tek handru, buku Jises badeh, Nadu Kindrei handru.”
