Aposel 5

Ananayas uru Sapira

1 Ya eme ndramak ari nyaran Ananayas uru udun Sapira ale atehei munyak turu i ta sisih. 2 Ya uru tanan, uru badeh, tone luk rayah, ya rayah le uru atehei i mine oro aposel.

3 Ano Pita tiye i ta Ananayas anya, “I buku sah handru tama balik Satan ewek ndrinem ma mesekei ou wasai Malawin Ndrabun. Ya eme ou tone luk ranah mene ta munyak ou atehei i ta sisih. 4 Ou tanam ou basihinei bala ta luk bwe le badeh, idoh tam. Ano ou andrei luk ta aliy i tam le ai. Saba lakou mesekei ou, ya ou amekes kandriyen doh? Ou badeh, bawasai lau bwe, arile ou badeh, wasai Kindrei.”

5 Eme Ananayas anuhun le badeh, iy taku i andri ma imek. Eme iri lau anuhun badeh, iri anoh andra-i labai. 6 Ano iri loweu ame su-i iy ma bwese iy eme len ma iri ala ahi iy.

7 Hamon ta awa taloh ano badeh, udun eme ja, ya iy bala tanan sasah nane ndrasahan bwe. 8 Eme Pita ndremenya iy anya, “Idoh le kabwai, ta sihine munyak mene ah udum andrei ta munyak ta ah ai?”

Eme iy anya, “Ehe, aliy le badeh.”

9 Eme Pita tiye anya, “I buku sah ah udum anya kanone boto-on ta Malawin Ndrabun ta Laban? Ou ndranuhun! Iri lau ta bwese

udum ma a-eh iy asah barame ado madasan kada-ah. Ya iri kameh bwese ou a manan ale.”

10 Eme na le liliy badeh, iy taku i andri udu kati Pita ma imek. Ano iri lau loweu ame anyolom iy ndramak, eme iri bwese-ei iy ili ma ahi iy udu ka-u udun. 11 Eme iri lau ta Kindrei ma hawe iri lau mari anuhun badeh, iri anoh andra-i labai.

Oro aposel amekes iri lau solo-an amwenen ja

12 Eme oro aposel badeh, amekes lahou tinan hawe kalem tinan udu bolo iri lau. Ma hawe iri lau mari ala atehei budon tiri in ta Kindrei badeh, atukum ame bahandra beleheleh ta Solomon udu loboho asiu tinan ta Kindrei. 13 Ya eme iri lau rayah badeh, bala bolo oro lau ta Jises bwe. Iri lau badeh, masiye oro, arile iri anoh ta atukum hawe oro. 14 Arile, bwai, iri lau solo-an labai badeh, atehei budon tiri handru ili le ta Laban, ma andromwei iri hawe iri lau tan nane. 15 Eme ta katin le doh badeh, iri lau bwese iri lau abo sik ala bolo kon tinan. Ma adeu iri an bada sau hawe ndrou ta abe-en i buku none Pita kedek keme badeh, korohan le ki tiri.* 16 Eme iri lau solo-an badu kon tinan mirihik ta Jerusalem atiye iri lau tiri abo sik ma hawe malawin ndra-in udu la-u iri ame le hawe oro. Eme iri mari badeh, amwenen ja.

Iri adai oro aposel

17 Ano, tinan tiri pris hawe oro lau badu hawen, oro badu hawe oro Sadusi, mada oro alikis oro aposel, tasah iri mwan ma badih mara-ei badeh, sekesek labai ta gok toro aposel. 18 Eme ma iri ala tawi oro aposel ma atehei oro ala bolo kou ta ndrahu lau mari. 19 Arile, na ben badeh, angelo ta Laban eme sihi iri madasan ta i bolon asak ma kuhi oro ame len, 20 ya iy tiye oro anya, “Ado kala bolo asiu tinan ta Kindrei katiye nyala lau mari ta sahou mari ta nyala manyah ha-un ta Kindrei.”

21 Eme na mandraben handru badeh, oro ala bolo asiu tinan ta Kindrei i buku le angelo mene ndrasihidiy toro, ma oro leheya iri lau.

Eme tinan tiri pris hawe oro lau badu hawen asahan, eme oro luhi oro kansol ma hawe oro lau-en mari badu Isra-el ame, ya iri atilik nyala iri. Ano oro suni sahou ili bolo kou tiye oro aposel kame kales kado mada oro kansol. 22 Arile, oro lau ta atondrok asiu ta Kindrei ala asos bolo kou, iri batou oro aposel bado bolo kou doh bwe. Eme oro a hamon badeh, asehek nyala oro, 23 “Aso ala asos,

ma anyolom iri kou badeh, ndrahas, se lakou babwidiy bwe, ma hawe oro lau ta ndrokei are aliy atondrok. Arile, aso sihi kou anya kabolon badeh, oro bado aliy bwe.” 24 Eme oro anuhun sahou doh badeh, ya budon ta tinan ta ndrokei ta asiu ta Kindrei, hawe iri tinan tiri pris lomondra anya sasah kameh asahan bah?

25 Ano ndramak ari eme badeh, anya, “Ei! Oro lau mene, ado atehei oro ala bolo kou badeh, ales areu asiu tinan ta Kindrei kodo-oh leheya iri lau mwan ma badih.” 26 Eme oro batun hawe oro tinan ta ndrokei ala badeh, andrei oro aposel dah. Oro badeh, baseheya oro boto-on bwe, tasah oro anoh, kora-on iri lau korowei oro na bek.

27 Eme oro tiyani oro aposel ame atehei oro ales are mada iri kansol, eme ma iri pris ndremenya oro i buku doh, 28 “Aso tiye sahou boto-on boto-on ndrawek tado, ta ado saleheya boto-on ta nyara ndramak badeh, ja ai, ndri-iy labai. Arile, ado badeh, ndramesekei bolo kon Jerusalem na leheya tado, ma ado anya kamekes aso kabwese maha-an ta ndraye ndramak badeh.”

29 Eme ma Pita hawe oro aposel rayah tiye i hamon anya, “Aso badeh, winiyan banuhun ari ndramak bwe, aso anuhun le Kindrei, kabwai! 30 Kindrei ta tama aso mene mete-ei Jises udu ta imek eme loken. Iy mene ado adai iy imek udu bada kei tondreh. 31 Kindrei eme tutuni iy ere loken udu loboho limen salin, ma iy asahan kabin ma ndramak ta seben. Ma iy badeh, leheya madasan ta ado winiyan tubuni ndrine ado, ma iy winiyan sikine karei ma lomondra ndra-in tiri Isra-el. 32 Ya, eme aso dah badeh, anyolom lakou mari doh, na mada aso amwenen. Ma hawe Malawin Ndrabun ta Kindrei ale bwidiy aleu iri lakou doh. Kindrei badeh, winiyan edeu Malawin i tare lau, buku none iy anuhun bohon.”

33 Ya eme oro kansol anuhun sahou doh badeh, ma bwidi ndrine oro irih mara-ei, ma oro anya kadai oro aposel kamak. 34 Arile, ndramak ari nyaran Gamaliyel,†Pol basahan lau ta Kindrei bwe le badeh, Gamaliyel doh ndramak ta leheya ta Pol. Ou anyolom udu bolo Lahou toro Aposel kalan 22:3. iy tinan tiri, iy badu Parasi, iri beleben iy tinan labai. Iy badeh, ndramak ari ta leheya bolo kandriyen malen, iy ales ere loken bolo iri kansol, ma iy asehek sahou boto-on, ta iri badeh, karuwani mine iri ma oro ka manan sese op. 35 Ano iy tiye sahou i toro kansol anya, “Ado lau badu Isra-el, ado anya kamekes sasah ki toro lau doh badeh, ado kabudon kamwenen bwena op. 36 Len sabe mene

ndra-au Tudas asahan, iy amekes iy i buku ndramak ari handru, ya lau ma hanek (400) badeh, a-en hamon tan. Eme iri adai iy imek badeh, iri lau tan aseker, eme ma ari lakou basahan se bwe. 37 Ano, udu hamon tan ja badeh, ndramak ari badu Galili nyaran Judas asahan kabatana len ta ndromondrom kane lau; iy ale aluwi lau solo-an an hamon tan ale. Eme iri adai iy imek ale, ma iri lau tan aseker. 38 Ya, jo katiye tado kamwenen: Oro lau dah badeh, ado karuwani mine ado ki-iu toro! Ya oro ka-au! Ki buku none budon dah i buku none tiri lau laleyah, badeh kameh winiyan bala bala bwe. 39 Arile, buku none budon doh ta Kindrei handru eh, idah kameh ado winiyan batobohei oro bwe; ya ado kameh amekes bahun i bada Kindrei le.”

40 Eme ma sahou tan badeh, tubuni budon toro. Eme iri luhi oro aposel ame bolon, ma ubwi oro na malou sakabuk i bek. Ano iri tiye sahou i toro, hamon oro sasehek sahou na nyara Jises ja ai, ndri-iy, ma eme iri tiye oro au.

41 Eme oro aposel ame len ta mada iri kansol ma sekesek tinan labai ta Kindrei badeh, ndranyulumwi oro badeh, mwasin labai ta bwese maha-an ta nyara Jises. 42 Eme len ari buku ari udu bolo asiu lohalak ta Kindrei ma i asiu ra-em i ra-em, oro badeh, baruwani ta leheya ma ta tiye sahou mwasin ta nyala Jises bwe. Oro asehek boto-on labai ta Jises badeh, Mesaya.

<- Aposel 4 Aposel 6 ->