Aposel 27

Iri atehei Pol i bolo ndron ra-ei ta ili Rom

1 Iri atilik nyala iri ano, eme ma nyala iri ndra le randra, ta aso* kakohok ndron ta ala kon tinan Rom udu bolo munyak tinan Itali. Iri ame atehei Pol ili hawe iri lau rayah ja nane badu bolo asiu lulik, i mine tinan ari nyaran Juliyus. Iy ta atondrok iri lau ta bahun, kane iri ma rinek (100). Iy badu hawe iri lau ta bahun ta Sisa amwenen. 2 Ahi sandroh ala ndron ra-ei badu kon tinan Adramitiyum. Ndron doh anya kalakak lawe-e le bada kon tinan mara-ei loboho Esiya. Eme ma ahi alakak au a len. Ndramak ari nyaran Aristakus, badu Tesalonaika udu bolo kon munyak tinan Masadoniya badeh, udu bolo ahi ale. 3 Na len ari ja badeh, ahi asahan Saidon. Juliyus badeh, amekes kandriyen mwasin labai handru ili ta Pol, eme iy tiye Pol kili loken kanyolom iri kawas tan, ma iri winiyan adeu nan nyamon. 4 Ahi ado Saidon, alakak au a len bolo ndras, kona busu badu Saipres, tasah jor atohou udu no-o ndron tahi. 5 Ahi ame apou bayau ala bilisiu mirihik ta kon munyak tinan Silisiya, ma Pampiliya, ano ahi asahan Maira udu loboho kon tinan Lisiya. 6 Ahi are doh badeh, tinan ta atondrok lau ta bahun ili atou ndron ra-ei badu Aleksandriya anya kili Itali. Eme ma iy atehei ahi ala bolo ndron doh ja.

7 Len sabe kolek ahi alakak amunum le ai, tasah jor ma bayau laba tinan labai soroya ahi. Iri lau badu bolo ndron doh boto-on labai, ma ahi ala asahan mirihik ta kon tinan Nidus. Arile, jor sokei ahi ma ahi winiyan balakak bala doh ja bwe. Eme ma ahi tubuni ahi ja ala are busu Krit. Mirihik ta no-o sabon Salmone, ma ahi au ala bilisiu mara-ei ta busu. 8 Iri lau badu ndron badeh, boto-on, ma ahi atas Krit le ai. Ma ahi ame asahan kon ari, iri aloh Salan Korohan, bado len ta kon tinan Laseya bwe.

9 Len solo-an iu ma ahi manyah laleyah are loboho doh, ma len ndrabun tiri Juwis ta abeles iri ta nyamon badeh, ndrano ndra-au.†Na len ndrabun doh, iri Juwis abudon ta len Kindrei mani kandriyen ndra-in tiri lau mwan ma badih. Ou anyolom in ta Lebitikus kalan 25:9. Na len doh iri tine jor asahan ma bwidi ndras tinan iri aloh Medetereniyen andra-i labai. Ma bayau atohou a tinan le gwek, eme ma Pol tiye sahou batanau ili tiri i buku doh, 10 “Aha lau marakon, aha kanuhun, jo ndratanan buku taha au nadah, taha kameh ndruni len ndra-in labai, ma lakou solo-an kameh iu. Iri sanuw hawe ndron kameh iu. Taha marakon kameh amak ale.” 11 Arile, tinan ta atondrok lau ta bahun banuhun sahou ta Pol bwai. Iy in hamon le ta budon ta ndramak ta atondrok ndron, ma tama ndron doh amwenen. 12 Sala kon nane doh ari korohan mwasin ta ndron aton ta jor tinan ere aliy bwe. Eme ma iri lau solo-an are bolo ndron nane doh, atehei sahou tiri i le randra ta ahi ka-au le ai. Buku ahi winiyan, asahan Piniks, ma kado aliy katondrok

jor tinan nane doh kamondrei. Kon Piniks doh badeh, salan ari le udu bilisiu ili kum, ma loboho an i andri ta busu Krit.

Jor ma bayau atohou i tinan le gwek

13 Nadu yayah sese le atohou eme loboho kum, iy batohou boto-on handru bwe. Eme ma iri anya, ahi winiyan alakak ala bolo salan ari nane iri asehek ta aliy. Eme ma iri aruwi hanai eme loken, ma ahi alakak lawe-e le bada kon badu Krit au ai. 14 Arile, se nawin bwe, jor tolau laba tinan atohou udu busu eme tahi. 15 Jor eme atok ta ndron badeh, ma ndron mara-ei totoreh, ma winiyan batas bamwenen ja bwe. Oro lau badu ndron anya katobolowe, tobolowe labwe, eme ma oro tubuni ndron in le bwele-e bayau, ma jor atuw ahi le ai. 16 Ahi alakak au ala koroha nadu busu ari, iri aloh Kauda. Oro lau badu bolo ndron badeh, anyolom bwalu bameles bwe, oro ame aluwiy ma boto-on eme bwele-e ndron tinan. 17 Oro aruwiy eme bwele-e ndron tinan, ma oro tabuwi ndron mara-ei ihis na le ndriliki. Oro anoh, kora-on oro katas kala kahis ta kababi udu loboho kiri Libiya. Eme oro lukumwi balei mari eme andri, boto-on ta jor ma bayau le badeh, teheya ndron ma oro. 18 Na len ari ja badeh, jor ma bayau i tinan le gwek. Eme ma iri lau badu ndron badeh, akeh sanuw rayah iu i ndras. 19 Atoha, ano atoha ja badeh, iri lau badu bolo ndron akahei ndriliki ma liwiliu ta balei, mara-ei i bolo ndras. 20 Len sabe buruwen badeh, ahi banyolom an ma ndrau bwai. Jor atohou boto-on ma bwidi bayau a tinan mara-ei, ma bwidi ahi kameh ta amak le ai.

21 Len sabe buruwen badeh, ahi baimon se nyamon bwai. Eme Pol suri iy ales udu bwena tiri lau badu ndron, ma asehek anya, “Buku taha nane ado ndra Krit, aha kanuhun bohok badeh, jor ma bayau dah winiyan basahan tataha bwe, ma ado winiyan bakeh iri sanuw bala ndras bwe. 22 Arile, nadah aha sabwerei, ndrine aha mara-ei kasekesek, tasah taha mara-ei winiyan bamak bwe; ndron le kameh atahan ma atuh iu. 23 Jo badeh, lau ta Kindrei ma jo badeh, lohowan tan; len marakon jo atehei bwili ndru-uk i andri i tan. Na ben nane iy suni angelo tan ari eme ales ere mirihik tek, 24 ma iy tiye tek i buku doh, ‘Pol, ou sanoh! Ou kameh ala ales are mada Sisa. Ou anuhun, Kindrei ndranuhun sahou tam, ma iri lau marakon are bolo ndron hawem kede-eh kameh winiyan bamak bwe.’ 25 Ya, aha marakon sanoh! Jo atehei budon tek mara-ei in ta Kindrei, iy kameh winiyan bwidi lakou marakon i buku le iy asehek tek na ben.

26 Arile, taha kameh alakak ala amar ado bwele-e busu rayah.”

27 Winiya ben ronoh hahuw jor teheya ahi ma ndron au ala andri bolo ndras tinan laleyah, iri aloh Medetereniyen. I buku ben alih badeh, oro lau badu ndron atona, buku ahi ndrame mirihik ta kon. 28 Eme ma oro akahei malou i gwa ta tumundroh gwa, buku gwa lawe-en, o, bwe. Oro aruwiy eme loken tomondrohei lawe ta gwa i buku nyahan lunoh‡Nyahan lunoh badeh, i buku mita tonoh ndro taloh (37). (20). Ahi atas ala sese, ano oro tumundroh gwa ja. Oro tomondrohei lawe ta gwa ja doh asahan nyahan ronoh limeh§Nyahan ronoh limeh badeh, i buku mita lunoh ndro taloh (27). (15). 29 Ma bwidi oro anoh labai, kora-on ndron tahi katas kili bwele-e bek, eme ma oro akahei hanai ma hahuw badu hamon i gwa ta ateu ndron kere rasi. Iri ame asolom ta kon kaleu suwi. 30 Oro lau ta ndron badeh, none ta atobwak, oro tolowei bwalu bwisik ili gwa, ta wendreya ta ala apeu rayah hanai ja ta no-o ndron. 31 Arile, Pol asehek ili tiri tinan ta tondrok lau ta bahun ma iri lau ta bahun i buku doh, “Buku oro lau doh bado ndron bwe, aha kameh winiyan bado bwe.” 32 Oro lau ta bahun ame sani iri ndriliki ta ateu nadu bwalu nane doh, ma ateheh iu ili bolo ndras laleyah.

33 Kon ndraleu, an anya kasahan keme loken ai, Pol eme asehek sahou ili ta lau marakon nane are bolo ndron badeh, kaimon nyamon. Iy tiye i buku doh, “Idah, buku wik la-uh amwenen ai, aha tikisiy tinan labai, ma aha baimon se nyamon bwe. 34 Jo anya kasehek taha marakon i buku doh, aha kaimon nyamon nadah, tasah nyamon kameh amekes ndrine aha abadok, ma udu mwasin. Aha kanuhun, taha marakon kameh are mwasin, ma ari tataha winiyan bamai bwe.” 35 Pol asehek sahou i tiri ano, iy andrei jabi ramen rayah udu minen, iy edeu salom i ta Kindrei udu mada iri, ano iy boso-ei ma iy aimon. 36 Sahou doh ili bwidi ndrine iri lau mari sekesek, ma iri aimon nyamon. 37 Kane ahi lau marakon are bolo ndron nane doh i se badeh, ma lunek ndro tonoh onoh (276). 38 Iri aimon nyamon ano, iri ame akeh lakou rayah buku ndrom wit iu i gwa ta amekes ndron kapek keme loken.

39 Kon aleu amwenen badeh, ahi anyolom bada babi, arile iri lau badu ndron ja badeh, tana iri kon doh ja bwe. Iri ame anyolom salan ari iu ili bolon ma bada babi mwasin ere aliy. Ma oro ame abudon ta akohok ndron kili salan nane doh. 40 Oro ame sani ndriliki ta hanai ma hahuw nane doh atuh iu ili andri bolo ndras. Na le liliy, oro tolowei ndriliki oro nane

bawei bos tinan ta kulik na aliy iu. Ano oro sihi balei badu no-o ndron i loken ta jor katuw ndron katas ki-iu kili salan. 41 Arile, ndron atas ili bwele-e kababi ma amar ili bwele-e mek; no-o ndron ili ihis ta kababi udu gwek. Goi atohou eme tabasi mwe-e ndron, ma ndron atahan i le munya-un ndra-in.

42 Iri lau ta bahun amekes budon ta adai iri lau ta bolo kou kamak, iri abudon anya kora-on iri kaya kala amik ma iri katobwak ka-au. 43 Arile, tinan ta atondrok iri lau ta bahun badeh, anya kaseben Pol, ma iy tiye tiri lau tan samekes kandriyen doh. Iy eme tiye tiri lau nane, tana iri ta aya, kasandroh kala gwa, ma kaya kala amik. 44 Ya iri rayah ja a-en hamon tiri, aya a-en bwele-e iri sabar ta ndron tahi nane atahan, ma lakou rayah ja badu ndron atahan ili bwisik. Ahi amekes i buku doh, ma ari tahi bamak bwe.

<- Aposel 26 Aposel 28 ->