1 Pestus eme asahan Sesariya ta akohok kon ta Peliks. Ano, udu hamon ta len taloh iu, iy iu ili loke ili Jerusalem. 2 Udu Jerusalem doh badeh, iri tinan tiri pris ma hawe tinan tiri Juwis ala anyolom Pestus ta amekes sahou ta adeu Pol i ta mada sahou. 3 Iri Juwis badeh, aso-ok Pestus katiyaniy Pol keme Jerusalem suwi suwi, tasah iri ndratehei sahou ndrado aliy. Iri kameh atondrok ado kabede-e san ta adai Pol kimek. 4 Arile, Pestus eme asehek i tiri i buku doh, “Pol badeh, udu ndra bolo asiu lulik udu Sesariya kahis, arile jo amwenen kameh iu ili hamon ja. 5 Mwasin, iri tinan taha rayah kame hawek kala Sesariya, ma katehei iy ndramak doh kili ta mada sahou, buku iy ndrabwidi saba lakou ndrandra-i handru.”

6 Pestus udu hawe iri ere gwek buku len ma ndru la-uh, o len ma ronoh, ano iy iu ili hamon ili Sesariya. Na len ari ja badeh, iy manyah udu bolo asiu ta anuhun sahou ta lau, ma iy atehei sahou ili tiri lau ta bahun katiyani Pol kili kales kudu madan. 7 Pol eme bolon le badeh, iri Juwis nane are Jerusalem ndrame ndrare bolo asiu doh, awudi iy ma asehek sahou boto-on ta kandriyen solo-an ndra-in ta adeu Pol ili ta mada sahou. Arile, sahou tiri bare bada ari lakou handru bwe. 8 Eme, Pol asehek sahou ta aseben iy i tiri i buku doh, “Jo badeh, bamekes ari ndra-in bala ta batanau malen tiri Juwis, o asiu tinan ta Kindrei, o i bada Sisa, bo-oh!”

9 Pestus anya kamekes ndrine iri Juwis kasekesek, iy eme asehek ili ta Pol i buku doh, “Buku sah, ou aso-ok ta ala hamon ala Jerusalem ja, ma jo kamekes sahou dah ja kere loboho tiri amwenen, deh?”

10 Pol anya, “Bwai, jo ndrales ndrare ta sahou mada Sisa kada-ah kabwai, iy kabin ta atondrok kon tataha Rom. Aha winiyan atehei jo i ta sahou udu bolo asiu ta sahou le dah. Ya, ou ndratanam, jo badeh, bamekes ari ndra-in bala bada iri Juwis kede-eh, bwe-en. 11 Buku jo ba-en hamon ta batanau bwe ma jo ndrabwidi ari kandriyen ndra-in, badeh, iri winiyan atehei jo ili ta sahou ma adai jo imek ta aliy, idoh jo ari sahou ta aliy bwe. Arile, buku sahou nane iri asehek ta adeu jo i ta mada sahou kede-eh, buku sahou wendreya, ya ari ndramak tinan ta kon tataha dah winiyan badai jo bamak laleyah bwe. Jo aso-ok ou andrei jo kamwenen kili hawe Sisa, tinan tataha badu Rom, ma iy amwenen kanuhun sahou dah.”

12 Pestus ili asehek ma anuhun sahou hawe iri lau ta gabman tan, ta akohok rayah tanan mwasin tiri. Ano, Pestus eme hamon asehek ili ta Pol i buku doh, “Ou badeh, aso-ok ta ala Rom, ta Sisa kanuhun sahou tam dah. Ya, ou are bahandra tondrok ta Rom, jo kameh tiyani ou ala hawe Sisa.”

13 Len sabe iu, ano kabin Agripa hawe udun Banis, uru ame Sesariya anya kaselesen Pestus. 14 Uru are loboho doh len sabe iu, ano Pestus asehek ta nyala Pol i ta kabin. Iy anya, “Ndramak ari ere bolo asiu lulik kede-eh, nyaran Pol. Peliks badeh, banuhun sahou tan bano bwe, iy ere ndra bolo asiu lulik kede-eh kahis. 15 Jo mene ili Jerusalem badeh, tinan tiri pris hawe tinan ta bwena ta kandriyen tiri Juwis atukum ta atilik nyala iri ta adeu iy ndramak doh, anya kili ta mada sahou. Eme iri tiye tek i buku doh, ‘Ou anuhun sahou ta iy ndramak kede-eh suwi, ma iri lau ta bahun kadai iy ki-iu.’ 16 Eme ma jo anya, ‘Kandriyen ta gapman badu Rom edeu ndramak ili ta sahou i buku doh: Buku rayah lau anya kadeu ari ndramak ki ta sahou, iy ndramak doh badeh, katiye len tan ta asehek sahou hawe oro bwena, op. Gabman winiyan bati-i sahou tan iu laleyah bwe, buku i ndramak nane basehek saba lakou iy amekes bado mada sahou bwe.’ 17 Iri asahan hawek le badeh, jo batondrok ja bwai, na len ari ja badeh, jo ndramanyah ndrado bolo asiu ta anuhun sahou, ma jo atehei sahou ili tiri, katiyani Pol keme ta sahou. 18 Arile, iri Juwis ame loken ta adeu iy i ta sahou badeh, jo abudon iri kameh asehek ta nyala iri kandriyen ndra-in iy ndramekes, arile bwai. 19 Iri atehei iy i ta mada sahou badeh, ta budon ma kandriyen tiri in ta bada kei nane nyaran Jises, Pol asehek ta iy amak ndrame awas ja. 20 Jo badeh, winiyan basilahei ari san ta anuhun sahou doh, bwai; eme, jo lelen buku iy kaso-ok ta ili hamon kili Jerusalem, kales ta sahou tan ja. 21 Arile, Pol bwalen, ma iy ndremenya jo katiyani iy kili kon tinan Rom kandremenya Sisa kanuhun sahou doh ja. Jo eme tiye i tan, ta iy kili hamon kili bolo asiu lulik ja, iri lau ta bahun katondrokei iy, winiya le len ta anya katiye iy kili Rom katou Sisa.”

22 Kabin Agripa tiye Pestus, “Jo le amwenen kameh anuhun boho iy ndramak badeh.”

Eme Pestus anya, “Mwasin, ou kameh anuhun bohon na bi-i.”

23 Udu, na len ari ja badeh, Agripa uru Banis nyosowani uru na awin turu moroyan, ano uru adek ala bolo asiu tinan tiri ta atukum. Uru ala bolon hawe iri lau tinan ta bahun, ma iri kabin badu kon doh. Eme ma Pestus atehei sahou, ma iri lau ta bahun tiyani Pol eme. 24 Pestus anya, “Kabin Agripa, ma hawe aha lau marakon ame ta tukum dah, aha kanyolom iy ndramak dah se, len marakon iri lau badu Juwis arah eme tek ta adai iy ki-iu. Iri amekes udu kon tinan Jerusalem, ma udu dah ale. 25 Arile, jo silahei amwenen badeh, iy bamekes ari kandriyen ndra-in ta adai iy imek bwe. Eme ma iy amwenen ndremenya jo katiyani iy kili Rom, ma Sisa kanuhun sahou tan doh ja. Eme ma jo anya katiyani iy kili. 26 Arile, jo ari lakou ta atorou ta nyalan ili ta tinan tataha Sisa bwe. Eme, kabin Agripa, jo andrei iy eme ales ere madam, ma aha marakon are kede-eh ale. Taha marakon kanuhun sahou tan op. Ano jo baratou saba sahou tan handru barala ta ramen la-ukei barala ta Sisa. 27 Buku jo kandrei ari ndramak badu bolo asiu lulik kili, ano jo batorowenei ramen la-ukei ta tiye tanan ta saba lakou iri atehei iy ili ta mada sahou bwe, jo amwenen anyolom buku kandriyen doh bamwenen bwe.”

<- Aposel 24Aposel 26 ->