Aposel 23

1 Pol anyolom amwenen mada iri kansol mara-ei, ma iy anya, “Aha nadu tine, Kindrei badeh, ndranyolom iri kandriyen tek mari na bolo len mara-ei, ndrabwena eme asahan dah. Jo batona ari kandriyen ndra-in jo amekes bwe.” 2 Pol asehek sahou doh ili ma tinan tiri pris nyaran Ananayas eme tiye oro lau rayah ales are mirihik ta Pol i buku doh, “Ado katabasi lim ki boho iy ndramak badeh.”

3 Pol tiye ili ta Ananayas i buku doh, “Kindrei kameh a-um ou. Buku ou badeh, atehei awin tiri tinan, arile bahandran ta aliy badeh, ou ndramak ndra-in, ma budon tam ndrandra-i. Ou anya ou ndramak ari handru ta a-en hamon ta kandriyen malen ta Moses, ma aseben ta amekes sahou tek, ya i buku sah, nadah ja ou ndrasakalawi kandriyen malen, ma ou tiye iri lau are kada-ah ta a-um jo laleyah?”*Lebitikus kalan 19:15 asehek i buku doh: Iri lau ta anuhun sahou badeh, kamekes kandriyen mwasin le udu mada sahou tiri. Sebwe Pol abudon sahou dah, eme iy tiye tinan tiri pris doh ndrasakalawi kandriyen malen.

4 Ya, oro lau nane ales are mirihik ta Pol asehek i tan i buku doh, “Hei, Kindrei atehei i ndramak kodo-oh tinan tiri Juwis. Ya, ou sondrokonya iy na sahou badeh, tasah handru?”

5 Eme ma Pol anya, “Ado nadu tine, jo bala tanan buku iy ndramak kodo-oh tinan tiri pris badu Juwis bwe. Buku jo ki tanan badeh, jo winiyan basehek sahou doh bala tan bwe, tasah sahou randra udu bolo buk ndrabun, asehek i buku doh,

‘Aha sasondrokonya iri lau nane atondrok aha.’ ” Eksodus 22:28

6 Pol ndranyolom buku lau lubuk are bolo tukum nane doh, rabuk Sadusi ya rabuk Parasi. Pol eme aloh i buku doh, “Aha nadu tine! Jo Parasi ari ai, jo nadu iri Parasi amwenen. Ya, nadah ja jo ales udu hawe aha ta aha atehei jo ili ta mada sahou, tasah jo in hamon ta budon tiri Parasi amwenen, ma ahi atehei budon tahi boto-on labai, buku len hamon eme, Kindrei kameh mete-ei iri lau ndramak are bolo lek tiri, amak ame awas ja.”

7 Pol atehei sahou doh ili badeh, ma bwidi losen asahan bolo ndrokowa iri Sadusi ma iri Parasi, ma apwai iri a lubuk. 8 Iri Sadusi anya iri lau ndramak badeh, winiyan bamak bame awas ja bwe, ma iri anya iri malawin mwasin ma angelo bwe, arile iri Parasi badeh, atehei budon tiri mara-ei in toro lakou mari doh, handru. 9 Eme ma bwidi iri arah i tinan labai, eme lau rayah ta leheya kandriyen ta batanau malen ta Moses, iri badu hawe iri Parasi ales are loke, asehek sahou nyarahan labai i buku doh, “Ahi winiyan basilahei ari kandriyen ndra-in ta iy ndramak kede-eh amekes bwe. Buku sah? Buku ari malawin mwasin, o, ari angelo ndradeu sahou ndrala tan!”

10 Losen toro ma lubuk badeh, i tinan le gwek ai. Eme ma, tinan ta atondrok iri lau ta bahun anya, se luwen bwe, iri kameh tarani Pol. Eme ma iy tiye oro lau ta bahun tan rayah anya, “Ado kala bolo tukum kodo-oh, karuwi Pol udu mine iri lau keme len, ma kandrei iy keme, bolo asiu tato boto-on.”

11 Udu, i ben ari ja badeh, Laban eme ales ere mirihik ta Pol, ma iy asehek sahou i tan anya, “Ou abadok ma ou sanoh, ou badeh, ndraleheyani nyarak ndrala bolo kon tinan Jerusalem, ma ou kameh winiyan amekes i buku le aliy kameh, udu kon tinan Rom ale.”

Iri Juwis amekes sa-oh ta adai Pol

12 Na mandraben ari ja badeh, iri lau rayah badu Juwis atukum ja, ta amekes sahou tandrakan ta adai Pol. Iri badeh, abeles iri winiyan bakohok nyamon, ma gwa bwe, winiya le iri kandrei batu Pol ki-iu labai. 13 Kane iri Juwis nane atilik sahou ta adi Pol badeh, udu bwele-e hanoh (40) ja. 14 Ano iri au ala atou iri tinan tiri pris hawe iri lau tinan ta atondrok iri, ma asehek sahou ili tiri i buku doh, “Ahi marakon ndratandrakan, ta ahi winiyan baimon nyamon ma ba-un gwa bwai, winiya le ahi kandrei batu Pol ki-iu labai. 15 Buku na dah ado hawe iri kansol katehei sahou kili ta tinan ta atondrok iri lau ta bahun badu Rom badeh, katiye tan ki buku doh, ‘Ahi aso-ok aha lau tam katiyani Pol keme andri ja, ma ahi anya kandremenya iy ta lakou rayah ja. Ahi anya katanan kamwenen ta saba lakou handru iy amekes.’ Ya, na len iri tiyani iy, iy edek san kahis le, ahi kameh awe-ek iy, ma adi iy imek.”

16 Arile, nadu kali Pol ari badeh, anuhun ta iri anya kadi Pol kimek. Eme ma iy ili suwi, suwi ili asiu boto-on tiri lau ta bahun, ma iy edek ili bolon anyolom Pol ma tiye sahou nane doh i tan. 17 Eme ma Pol aloh tinan ta lau ta bahun ari eme hawen, ma iy asehek i tan i buku doh, “Ou andrei iy loweu kede-eh kili hawe tinan ta atondrok aha. Iy anya kasehek sahou ari kili tan ta iy kanuhun.” 18 Eme lau ta bahun doh andrei iy, ma sirini iy ili hawe tinan ta atondrok iri mara-ei, ma iy asehek i ta ndramak tinan doh anya, “Iy ndramak udu bolo asiu lulik kodo-oh nyaran Pol aloh jo ili ta jo kandrei iy loweu dah keme katou ou, tasah iy tan sahou ta asehek ewek tam.”

19 Ndramak tinan ta atondrok iri lau ta bahun eme tawi minen, ma sirini iy, uru ala ales are loboho bolo asiu sese doh, ari lau bwe. Iy eme ndremenya iy loweu nane dah, “Ya, ou anya asehek tek ta nyala saba lakou handru?”

20 Iy loweu dah anya, “Iri tinan tiri lau badu Juwis badeh, ndrasehek nyala iri ndra le ari, iri anya, buku bi-i badeh, ou tiyani Pol kili andri kanyolom iri, iri anya katukum, kasehek nyala iri ja, ma iri anya kawendreya, buku iri kanuhun rayah sahou ta Pol ja. 21 Arile, ou sanuhun iri labai, tasah kane iri lau badeh, udu bwele-e kane lau ma hanoh (40), iri kameh are san atondrok ta adai Pol. Ma iri ndratandrakan ndrala ta Kindrei, i buku doh, iri kameh adi Pol imek labai, ano iri barakohok nyamon ma gwa ja ai. Eme ma iri atondrok ou, buku ou aso-ok ta atiye Pol ili hawe iri.”

22 Eme tinan ta atondrok iri lau ta bahun tiye i ta iy loweu i buku doh, “Ou anuhun, ou sasehek labai sala ta ari ndramak ja, ta ou nane ndrasehek nyalak ta sahou dah.” Ma iy tiye iy iu ili hamon ili ndrahunen ja.

Iri tiyani Pol iu ili hawe Peliks

23 Eme, tinan ta atondrok iri lau ta bahun luhi uru tinan la-uh ja badu bahandran ame, ma iy asehek i turu anya, “Ya, ah kandrei lau ta bahun ma lunek (200) kawek hawe ah ta ala Sesariya na ben kameh, hawe oro ndro tonoh (70) lau ta bahun, oro winiyan sakaliye ta hos, ma hawe lunek (200) lau ta bahun ja ta orou nyah. Ah katiye iri kado le katondrok mada an kili buku ndro-ari na ben dah. 24 Aha kandrei ari hos ale ta bwese Pol, ma ah katiyani iy kamwenen kili kisos hawe kabin Peliks.” 25 Ano, ndramak tinan ta atondrok iri lau ta bahun mara-ei dah, torowenei la-ukei ramen, sahou udu bolon asehek i buku doh:

26 “Peliks, jo Klodiyas Lisiyas, jo atorou la-ukei ramen dah ewek tam. Ou ndramak tinan labai, ou atondrok kon mara-ei udu loboho badeh. Bada-an tam mwasin ai. 27 Jo tiye oro lau tek tiyani iy ndramak dah ewek hawem, tasah iri Juwis are kada-ah mene tawi iy, ma seheyani iy ili eme, mirihik iri kadi iy kimek. Eme ahi anuhun buku nyaran badeh, udu bolo buk tinan tataha badu Rom. Eme, jo ma hawe iri lau tek ta bahun ala andrei iy ere mine iri Juwis eme len. 28 Eme jo badeh anya ki tanan ta saba katin handru iri amekes kandriyen buku doh i tan. Eme ma jo tiyani iy ili hawe iri kansol badu Juwis. 29 Ma jo badeh, ndranuhun sahou, iri amekes ili ta Pol. Iri atehei iy ili ta mada sahou doh badeh, ta sahou rayah ta kandriyen ta batanau tiri Juwis. Ma iy ale, bamekes ari kandriyen ta iri kadai iy, ma katehei iy kili bolo kou, bwe. 30 Jo anuhun sahou i buku doh, eme ma jo tiye iri lau tek ta bahun tiyani iy kewek hawem suwi, tasah jo ndranuhun sahou ta lau rayah, atukum a le se ta adi iy ndramak dah. Eme jo tiye iri lau nane amekes i buku doh, ta awek hawem, ma ou kameh winiyan lebelei sahou tiri. Ya, sahou tek idoh le, kabwai.”

31 Ya, iri lau ta bahun andrei la-ukei doh, ma a-en hamon ta sahou ta tinan tiri. Iri tondrokei Pol, ma tiyani iy na le ben doh ili isos kon tinan Antipatris. 32 Na len ari ja badeh, iri lau ta bahun nane adek na kati iri ame hamon ame asiu tiri ta bahun ere Jerusalem ja. Arile, iri rayah nane ta hos badeh, tiyani Pol iu isos kon tinan Sesariya. 33 Oro ala asahan kon tinan Sesariya, eme oro lau ta bahun nane tiyani Pol amwenen iu ili hawe kabin ta kon doh. Ma oro atehei la-ukei nane ili minen. 34 Kabin eme anyolom la-ukei doh, ma iy ndremenya Pol, “Ya, ou badu saba kon handru udu loboho Rom?”

Pol asehek i tan i buku doh, “Jo badeh, badu kon Silisiya.”

35 Kabin eme tiye Pol, “Mwasin jo winiyan anuhun sahou tam, buku iri lau nane anya kadeu ou ala ta mada sahou, asahan.” Ano iy aloh oro lau tan ta bahun ame, “Ya, ado katiyani Pol kili asiu tinan ta kabin Herot mene tutuniy, ma ado katondrokei iy.”

<- Aposel 22 Aposel 24 ->