Aposel 13

Iri suni Banabas uru Sol au

1 Udu bolo iri lau atehei budon tiri handru in ta Kindrei badu Antiyok badeh, iri propet rayah, ma hawe iri lau ta leheya rayah ale ado aliy. Nyara oro badeh, Banabas, Simiyon iri aloh iy Nijer,* Lusiyus badu Sairini, hawe Mana-en iy mene asahan kawas ta kabin Herot na len iy atondrok kon, ma hawe Sol. 2 Ya eme oro atudun Laban hawe abeles oro ta nyamon ili badeh, ma Malawin Ndrabun anya, “Ado katehei Banabas uru Sol badeh, kare len ta amekes lahou tek mene jo aloh uru kamekes.” 3 Ya oro abeles oro ta nyamon ma salom ano, oro adeu lim i la-u uru, ano suni uru ma la-uh au.

Udu kon Saipres

4 Eme Malawin Ndrabun suni uru lau ma la-uh doh au ala andri ala kon Selusiya, akohok ndron, ma alakak au ala busu Saipres. 5 Uru ala asos kon Salamis badeh, oro asehek sahou ta nyala Kindrei udu ndrahu tukum tiri Juwis. Ya Jon udu hawe uru, buku ta aseben uru.

6-8 Oro badeh, adek awudi busu udu ranah ili taku ranah, ma oro asos kon iri aloh Papos. Eme udu loboho doh badeh, oro ndruni ndramak ari badu Juwis, iy tan balik udu aliy, ma iy wasai iri lau anya, iy propet, nyaran Bajises.†Bajises moson Nadu Josuwa. I boho Grik badeh, iri aloh iy Elimas, moson, iy ndramak ta balahak. Iy badeh, kawas ta Sejiyus Polus ndramak ta atondrok busu doh. Ma Sejiyus badeh, tanan tan ili labai. Eme iy tiye Banabas uru Sol ame, tasah iy anya kanuhun sahou ta Kindrei. Arile, Elimas badeh, tebelese hawe Sol uru Banabas, tasah iy anya kamekes Sejiyus satehei budon tan handru sala ta Jises. 9 Arile, nyara Sol ari ja badeh, Pol,‡Nyaran Sol badeh, boho iri Hiburu, ma nyaran Pol badeh, boho iri Grik. Iri lau ta tanan abudon anya Sol aloh iy amwenen i nyaran Pol na len dah, tasah Pol baramekes gok ta atiye sahou ta Kindrei ili tiri Grik ai. iy idih na boto-on ta Malawin Ndrabun, anyolom boto-on i ta Elimas, ma iy tiye i tan anya, 10 “Ou badeh, nadu balik amwenen, ma ou badeh, baseken kandriyen mwasin mari bwe! Ou adah labai na kandriyen ta wasai ta balik. Ya, ma saba len kameh ou aruwe ta tobolowe sahou handru ta Laban kasahan wasai? 11 Na le dah kameh, boto-on ta Laban kameh edeu maha-an ewek la-um, ya idah kameh, ou winiyan banyolom kon bwe, winiya le len ta aliy barasahan.” Eme na le liliy badeh, Elimas atona lakou bokodon eme tubuluhi madan ilik, ma iy sokorokar lau ta sariye iy na lim. 12 Eme ndramak ta atondrok busu anyolom badeh, ma bohon asak ta leheya turu ta nyala Jises, ma iy atehei budon tan handru i ta Laban.

Udu kon Antiyok udu bolo Pisidiya

13 Eme Pol hawe uru lau badu hawen ruwani Papos, ya oro alakak au ala kon Pega. Pega doh udu bolo kon munyak tinan Pampiliya. Udu doh badeh, Jon ruwani uru ma iy iu i hamon ili Jerusalem. 14 Ano Banabas uru Sol ado Pega ala Antiyok, kon udu loboho Pisidiya. Eme na len ta amunyau, uru ala ndrahu atukum tiri Juwis, ma uru manyah ado aliy. 15 Udu hamon ta iri anuhun sahou aloh badu bolo batanau malen, hawe boho iri propet ano badeh, iri lau ta atondrok ndrahu atukum, suni sahou i turu anya, “Nadu tine ahi, i buku none ah sahou ta batanau ahi badeh, ah kasehek ai.”

16 Eme Pol ales udu loken edeu minen i loken amunum le ma anya, “Ado lau badu Isra-el, hawe ado lau badu leheleh, ado ta atudun Kindrei, ado kanuhun bohok! 17 Kindrei tiri lau badu Isra-el badeh, tiye tama taha iri ma mesekei iri asahan tinan labai, udu bolo len mene iri manyah ado Ijip, ano na le boto-on ta Kindrei, iy andrei iri ado bolo kon Ijip ame len. 18 Ma na bolo jaha hanoh (40) badeh, iy bwese maha-an ta kandriyen tiri ado kon lomale an.§Lau rayah ta tanan anya sahou udu ta kalan 13:18 asehek i buku doh, Ma na bolo jaha hanoh (40) badeh, iy tondrokei iri ado kon lomale an. 19 Kindrei badeh, tikahei oro kon tinan ma ndro taloh ado munyak Kenan au, ma iy atehei munyak toro i tiri lau tan amwenen. 20 Iri lakou doh asahan udu bolo jaha ma hanek lomonoh (450).

“Ano udu hamon ta idoh badeh, Kindrei atehei tiri, iri batun ta atondrok iri eme eme taku, ta Samuwel asahan propet tiri. 21 Ano iri aseken tiri ari kabin, ya eme iy atehei Sol asahan kabin tiri. Iy badeh, nadu Kis, asahan ta lundriye Benjamin. Iy atondrok kon badeh, jaha ma hanoh (40). 22 Eme Kindrei bwidi Sol ano ta kabin, iy atehei Debit i kabin tiri. Eme iy tiye i buku doh ta nyalan, ‘Jo badeh, ndrasilahei nadu Jesi ari, nyaran Debit, ndramak adek handru in tan labai, iy kameh winiyan in hamon ta sasah jo aseken iy ta amekes.’ 23 Edek ta lundriyen kameh, Kindrei atehei ndramak ari ta seben iri Isra-el, nyaran Jises. I buku mene iy ndratandrakan ta aliy. 24 Jises basahan bwe le badeh, Jon tiye sahou i tiri lau badu Isra-el katubuni ndrine iri ta kandriyen ta karei ma lomondra ndra-in, ma kalomwa iri. 25 Ya eme suniya lahou ta Jon anya kano badeh, iy anya, ‘Ya, ado anya jo are lau handru? Jo badeh, iy bwe! Arile, are lau iy in hamon tek eme kameh, jo ndramak mwasin bwe, ta talou ku-i katin iu bwe!’

26 “Ya ado nadu tine, lundriye Abraham hawe ado lau badu leheleh ala an hamon ta Kindrei. Sahou ta nyala seben badeh, ndrame tataha. 27 Iri lau badu Jerusalem, ma hawe lau ta atondrok iri badeh, maliye seben tiri Jises, Kindrei nane suni iy eme ta aseben taha, bwe. Iri babudon sahou tiri propet, iri anuhun na bolo len ta amunyau mari bamwenen bwe. Eme ma iri tiye iy kimek. Ya, ta sahou doh, iri amekes sahou mene tiri propet asehek asahan handru. 28 Iri badeh, winiyan basilahei ari kati lakou ta amekes imek i badan bwe, eme ma, iri ndremenya Pailat kidi iy kimek. 29 Ano, udu hamon ta iri amekes sasah i tan, i buku none iri propet mene asehek, eme iri kuhi iy udu bada kei tondreh eme andri ma atehei iy i lek amekes na bek. 30 Arile, Kindrei suri iy udu lek amak eme loken ja. 31 Ma udu bolo len solo-an badeh, oro lau mene ta adek hawen ado Galili ili Jerusalem anyolom iy. Oro badeh, anyolom iy na mada oro amwenen, ma iri asehek sahou tan ili tiri lau badu Isra-el ai.

32 “Eme aso asehek nyala sahou mwasin dah ewek taha: Sasah mene Kindrei tandrakan i ta tubu taha iri badeh, 33 iy ndramesekei ndrasahan handru, ndrame tato nadu oro, i san ta iy suri Jises amak eme loken ja ta imek tan. I buku none ndratorowenei mene udu bolo wari la-uh ta Buk Wari tiye i buku doh:

‘Ou badeh naduk handru.

Na dah jo ndrasahan tamam kabwe.’ Wari 2:7

34 “Eme Kindrei suri iy eme loken ta imek ja, ma iy winiyan bamak ma babola ja bwe. Sahou doh handru, eme ma Kindrei tiye i buku doh:

‘Jo kameh edeu ewek taha iri nyosowan turuwen mene jo tandrakan Debit ta aliy. Idoh kameh asahan handru buku jo ndratiye.’ Aisaya 55:3

35 “Ma, buk ndrabun ndrasehek udu bolo sahou rayah ja anya:

‘Ou kameh winiyan baruwani ndramak ndrabun tam bala bolo sisi-in bolo-an ta imek bwai.’ Wari 16:10

36 “Ya Debit mene amekes lahou ta Kindrei; ano iy imek ma ahi iy udu ka-u tubun oro, ma badan ndrabola ndra-au. 37 Arile, iy ndramak ala Kindrei suri iy eme loken ta imek tan badeh, babola bwe. 38-39 Eme ma, aha nadu tine, jo badeh, anya aha ki tana aha, i san ta Jises, Kindrei winiyan mani kandriyen ta karei ma lomondra ndra-in. Sahou dah badeh, aso asehek ndrawek taha. Na iy le badeh, are lau atehei budon handru in tan winiyan bala bolo maha-an ta kandriyen ta karei ma lomondra ndra-in mari bwe. Ya, na iy le, Kindrei winiyan aloh ari ndramak mwasin labai ta madan. Iri batanau malen mari ta Moses badeh, winiyan basebenei ou bwe, ma iri winiyan babwidi ou bala mwasin ta madan bwe le. 40 Aha badeh, katondrok aha kudu mwasin, ta sasah iri propet mene ndrasehek, sasahan bada aha. Iri asehek i buku doh:

41 ‘Aha kanyolom, aha lau ta tebelese! Lahou laba tinan tek doh, jo kameh amekes udu bolo ndrokowa aha, arile sebwe aha baso-ok ta anuhun sahou doh bwe, ma aha winiyan batehei budon taha ba-en ta aliy bwe. Aha badeh, anya kasondrokonya, eme ma lakou tado le kameh mani ado atur, ma ado akohok maha-an laba tinan ta aliy.’ ” Habakuk 1:5

42 Ya eme Pol uru Banabas anya kame len ta ndrahu tukum tiri Juwis badeh, iri lau ndremenya uru badeh, kame hamon ja na len ta amunyau ari ja, kasehek nyala iri ma sola. 43 Eme ma, iri lau au, arile iri Juwis hawe iri lau badu leheleh mene ndra-en hamon ta kandriyen tiri Juwis badeh, a-en hamon ta Pol uru Banabas. Uru aposel ame batanau iri i buku doh, “Aha badeh, kabadok ta bolo manyah mwasin ma tikisiy nane Kindrei ndratehei ndrame tataha.”

44 Ano, na len ta amunyau ari ja badeh, mirihik iri lau mari badu bolo kon tinan mari ame anuhun sahou ta Laban. 45 Eme iri Juwis anyolom iri lau solo-an labai ame badeh, ma mada iri alikis ma bwidi iri asehek sahou ndra-in labai i bada sahou ta Pol nane asehek.

46 Arile, Pol uru Banabas asehek sahou nyarahan labai i tiri anya, “Aru badeh, kasehek sahou ta Kindrei ki taha Juwis bwena op. Arile, aha badeh, baseken bwe, ma sahou taha badeh, leheya i buku, aha kameh winiyan bakohok manyah mwasin ta Kindrei ta udu le buku doh bwai. Eme ma aru kameh ruwani aha kon dah areu, ya, aru kameh ala aseben iri lau badu kon leheleh ai. 47 Tasah, idoh badeh, sahou ta Kindrei batanau aru ta aliy, i buku doh:

‘Jo badeh, atehei ou i buku sun anya lomada iri lau badu leheleh, ma ou ki nyara bohok kaseben iri lau badu bolo munyak mari.’ ” Aisaya 49:6

48 Eme na len doh iri lau badu leheleh anuhun sahou doh badeh, iri sekesek ma atudun sahou ta Laban. Eme oro lau le Kindrei ndralebelei oro ta akohok koha oro ta udu le buku doh badeh, atehei budon toro handru i ta Kindrei.

49 Eme ya sahou ta Laban badeh, aseker udu loboho kon doh. 50 Arile, iri Juwis ala badeh, sosokei oro lau ta bwena ta kon tinan nane doh, ma hawe sosokei oro badih rayah tinan ta budon. Eme ma budon toro andra-i ta anya kadai Pol uru Banabas ma mesekei uru au ta loboho doh. 51 Eme uru atoroh kasu ndren ta bada kati uru iu ta leheya budon turu i tiri, ma uru ruwani Antiyok ma au ala Ikoniyum. 52 Ma iri lau atehei budon tiri handru in ta Laban ado Antiyok badeh, adah na sekesek ma na Malawin Ndrabun.

<- Aposel 12 Aposel 14 ->