Aposel 12

Iri lau ta Kindrei bwese isi tinan le gwek

1 Na len doh badeh, kabin Herot ateu lau rayah badu hawe iri lau ta budon handru in ta Kindrei anya kidi oro kamak. 2 Iy badeh, tiye ndramak tan ari ta bahun ili mwetehei Jemis, nadu tine Jon, imek na samen gwak iri aloh bainat. 3 Eme iy anyolom, buku iri Juwis badeh, sekesek ta aliy, iy ili abwiyeh ta aseu Pita ale. Idoh badeh, udu bolo len ta nyamon tinan ta jabi ramen yis bala bolon bwe. 4 Iy tawi iy ano badeh, iy atehei Pita i bolo kou, i mine oro lau ma hahuw, badu bolo oro lau ma habuk ta bahun badeh, tondrokei iy. Oro ndrokei ta Pita badeh hahuw, hahuw ta bolo awa onoh onoh, ben ma len. Budon ta Herot badeh, anya iy keme lewan mada lau mari ta sahou, kudu hamon ta len ta Pasoba.

5 Ya eme iri atehei Pita udu bolo kou udu gwek, arile iri lau atehei budon tiri handru i ta Kindrei badeh, amekes salom boto-on tan, ili ta Kindrei.

6 Na ben ano kon kaleu doh badeh, Herot kameh edeu iy i ta sahou. Ya Pita badeh, amadin ndrokowa uru lau ta bahun ma la-uh. Sawei iy badeh, na sen ma la-uh. Ya, oro lau ta bahun rayah ja badeh, ado ta ndrokei ado madasan tinan, loboho manan. 7 Eme nawin bwe badeh, angelo ta Laban ari asahan, ma lomadan lomatani bolo kou dah. Iy tukuhi kabede Pita ma mete-ei iy amak anya, “Ou suri ou suwi!” Eme badeh, sen asoh laleyah bada bobwan tan.

8 Ano angelo tiye i tan anya, “Ou asini awin tam hawe ku-i katim kili.” Eme Pita mesekei i le buku aliy. Ano iy anya, “Ou atehei kolau tam ta bwele-em kili, ya ou an hamon tek.” 9 Ya eme Pita in hamon ta angelo dah eme manan ta bolo kou. Arile, iy badeh, bala tanan sasah angelo amekes doh bwe. Iy anya badeh, iy amekes lele. 10 Uru adek ame sakalawi ndramak ari ta ndrokei i hamon, ano uru ame sakalawi iy ari ja, ma uru ame asahan madasan amekes na hayen, madan i kon tinan. Eme madasan dah asak laleyah turu, ma uru ame manan.

Uru adek san kakan lawe-en sese, ma se nawin bwe angelo doh amai iu laleyah.

11 Ano Pita baraseleyani ai, ta sasah nane asahan ma eme iy anya, “Jo ndratanan ndramwenen handru ai. Laban badeh, suni angelo tan eme sebenei jo ta bolo mine Herot boto-on, ma hawe ta mine iri Juwis mari anya kamekes keme badak.”

12 Eme iy anyolom tanan doh badeh, ma iy iu ili asiu ta Mariya tine Jon Mak. Iri lau solo-an badeh, atukum ala aliy asolom. 13 Eme Pita udu manan atukoh kou, ya eme lohowan badih ari nyaran Roda ili madasan anya katou are lau handru. 14 Eme iy anuhun nyaro bale Pita badeh, iy abasa, ma iy basulu-i kou bwe, ma iy sakaliye i hamon ja tiye anya, “Pita asah udu madasan kodo-oh!”

15 Eme iri anya, “Ou kede-eh budon tam ndra-au oh!” Bwai, iy asehek le ili anya, “Ado kanuhun jo. Ndrakan en! Iy asah udu manan kodo-oh.”

Eme iri anya, “Sebwe, malawin eme ales nadeh.”

16 Arile, bwai, Pita atukoh kou

udu le gwek, ya eme iri anya kasulu-i kou, oro atou iy. Eme mani iri atur handru. 17 Eme Pita atehei minen i loken amunum le ma iy tiye i toro kandru-uk, ma iy asehek i toro ta nyala Laban kuhi iy udu bolo kou eme len. Ano iy anya, “Ado badeh, kasehek nyala Jemis ma hawe oro nadu tine to oro rayah ja ta aliy. Ano ma iy ruwani oro, ya iy iu ili kon rakon ja.”

18 Eme ya na mandraben badeh, oro lau ta bahun lomondra solo-an ta aliy. Eme oro anya, “Sasah handru ndrasahan ta Pita doh?” 19 Ya eme Herot takaleh ili badeh, iy batakahei bwe, eme iy ndremenya oro lau ta ndrokei ma tiye ta kadai oro kamak. Udu hamon ta idoh badeh, Herot udu Judiya iu ili udu Sesariya winiya ben sabe.

Herot imek

20 Herot badeh, mene andra-i hawe iri lau badu kon Tair hawe Saidon; eme uru atukum ase asahan solo-an badeh, ta ala atou iy. Arile, ma mwena badeh, iri ala anyolom kawas tiri ari op, iy doh badeh, ndramak tinan ari ta asiu ta kabin, nyaran Blastus. Iri badeh, atamar iy, ta iy kati-i losen ta kabin Herot kimek ki-iu laleyah, tasah iri amwenen asih niri nyamon badeh, badu kon ta kabin Herot.

21 Eme na len ta Herot ndratiye, iy asini awin tan ta kabin, ma iy manyah udu bada koyeu asehek sahou i tiri lau. 22 Eme ya iri lau sarakau anya, “Idoh badeh, boho kindrei ari ai, asehek sahou doh, boho ndramak bwe!” 23 Eme nawin bwe, angelo ta Laban mesekei iy ibo sik ma atarah i andri, ma iri nadu un ani iy, ma iy imek, tasah iy batudun Kindrei bwe.

24 Arile, na bolo len doh badeh, sahou ta Laban asahan i tinan ma aseker ili bolo kon mara-ei, ma lau solo-an a-en hamon tan. 25 Ano, na bolo len doh ale gok ta amekes lahou ta Kindrei udu bolo Jerusalem badeh, Banabas uru Sol ndrabwidiy mari ndrano, eme ma, uru kuhi Jon Mak i hawe uru ili hamon ili Antiyok.

Pol atiye sahou ta Jises ili bolo kon munyak solo-an labai

(Kalan 13:1–21:1)

<- Aposel 11 Aposel 13 ->