1 Ou atanam ta lakou doh: Len badeh, ndra mirihik ta Jises kameh eme hamon, iri lau ndra-in kameh amekes maha-an solo-an asahan, ma amekes i ndra-in mara-ei ja ili tiri mwan ma badih anya ka-en hamon ta kandriyen mwasin. 2 Idah kameh i ndra-in mara-ei, tasah iri lau ndra-in kameh aso-ok iri le amwenen. Ma iri aso-ok luk tinan ale. Iri kameh atudun nyara iri le amwenen, ma iri kameh aluhe iri lau, ma bobose Kindrei. Iri ale kameh tebelese sahou ta tama hawe tine iri amwenen, ma iri tanan sekesek bwe, ma badeu wurah bwe, ma iri winiyan babudon ari lakou laba tinan bwe. 3 Iri ale kameh winiyan bamekes kawas hawe iri lau rayah ja bwe. Ma iri winiyan batehei ndrine iri bamunum bala hawe ari ndramak bwe. Iri kameh andra-i, udu le buku doh! Iri kameh asehek lau laleyah, ma iri winiyan batondrok ndrine iri ma bada iri bamwenen bwe. Iri kameh amekes ndra-in i tiri lau laleyah, ma iri ateu kaliu ta kandriyen mwasin. 4 Iri kameh atehei iri kawas tiri ili mine iri lau ndra-in ta bahun, ma a-en hamon ta budon tiri ndra-in. Iri kameh abudon iri le, ma iri aso-ok, ta amekes bada iri kasekesek, ma iri baso-ok Kindrei bwe. 5 Iri kameh atukum ta salom hawe iri mwan ma badih, ma tiye iri ka-en hamon ta budon tiri lau ta Kindrei. Arile, ta ndrine iri, iri adeu kona iri ili ta kandriyen ta Kindrei nane tubuni koha iri mwan ma badih. Handru, ou are ndra len labai tiri lau doh! 6 Tasah, rayah ado ndrokowa iri atamar iri mwasin labai, ma ala bolo asiu tiri lau, ma iri wasai iri badih budon mwasin bwe, ma iri badih kede-eh atehei budon in ta sahou tiri. Iri badih buku doh, kandriyen ndra-in tiri badeh, solo-an labai. Ma ndrine iri maha-an labai ta kandriyen iri a-en hamon ta aliy, ma aruwi iri sandroh ala ame. 7 Iri a-en hamon ta sahou solo-an, arile iri winiyan ba-en hamon ta sahou handru bwe. 8 Iri lau ta leheya wasai badeh, a buku le Janes hawe Jambres*Janes hawe Jambres; uru lau ma la-uh badu Ijip mene abo gok ta aturuk sahou ta Moses mene ili anyolom Parou. Uru amekes kalem rayah buku Kindrei amekes udu mine Moses. bwena mene. Uru badeh, ta tebelese sahou handru Moses mene asehek. Ya, iri lau ta leheya wasai doh a buku le aliy. Iri abudon, arile, ta lakou rayah ndra-in le, ma Kindrei atehei konan ili tiri, tasah iri batehei budon tiri ba-en ta sahou handru bwe. 9 Arile, kandriyen tiri ta atamar lau ka-en hamon tiri, winiyan basahan tinan bwe. Tasah, iri mwan ma badih kameh atanan kandriyen lolo-ou iri amekes, ma idah kameh iri adeu kona iri, i buku iri mwan ma badih mene badu Ijip anyolom kandriyen ta Janes uru Jambres, ma bar tiri aleu handru ta kandriyen lolo-ou turu.

10 Arile, Timoti, ou badeh, basahan buku iri lau ta leheya wasai bwe. Ou mene are hawek, ma ou ndratanam iri sahou marakon jo leheya, ma ou tanam iri tekedek tek. Ma ou tanam ndrinek, jo atehei budon tek mara-ei in ta Kindrei, ma jo atadau ndrinek, ma ales boto-on ta lakou ndra-in asahan tek. Ma ndrinek ale winiyan barih suwi bala tiri lau bwe. Jo aso-ok iri labai. 11 Ou ndratanam ale ta iri kandriyen iri lau amekes eme tek, ma ta iri sisi-in ndra-in handru jo akohok udu kon Antiyok, Aikoniyam ma Listra. Ou ndratanam iri maha-an solo-an iri adeu eme bwele-ek, arile jo bwese-ei. Laban ndratalawei maha-an marakon udu bwele-ek doh ndra-au ndrala len, ma jo udu mwasin ja. 12 Ehe, sahou dah handru. Iri lau marakon anya kahis hawe Krais Jises, ma ka-en hamon ta kandriyen ta Kindrei, idah kameh iri lau ta adi lau laleyah amekes ndra-in ili tiri. 13 Ma iri lau ndra-in ale kameh amekes kandriyen ndra-in mara-ei ja. Eme ma iri lau ta wasai kameh wendreya iri lau. Balik ale kameh wendreya iri lau ta wasai doh, ma kandriyen tiri kameh asahan ndra-in mara-ei ja.

14 Arile, Timoti, ou tawiy kihis sahou mene ou ndrandrei, ma ou atehei budon tam ki-in aliy. Tasah, ou ndratanam ta ahi lau mene leheya ou. Ahi leheya ou amwenen ta sahou dah. 15 Eme ma, ou ale tanam lakou doh: Ou mene ma nadu nah bwisik kahis, tinem mene leheya ou, ma ou akohok tanan ma bwena ta buk ndrabun. Ou tanam, buk ndrabun dah winiyan ta edeu budon mwasin ewek tam, ma Kindrei kameh andrei ou ame hamon. Tasah, ou atehei budon tam mara-ei in ta Krais Jises. 16 Malawin Mwasin ta Kindrei atehei budon ili tiri lau, ma iri torowenei sahou tan ili bolo buk ndrabun. Eme ma, iri tarou marakon udu bolo buk dah, iri mwasin, ma iri adeu tanan eme tataha ta sahou handru. Ma iri leheya taha ta kandriyen ndra-in tataha, ma lowosa tekedek tataha kamwenen, ma leheya taha ta kandriyen mwasin ma amwenen. 17 Na san doh, Kindrei lowosani iri lohowan tan, kamekes iri gok mwasin.

<- 2 Timoti 22 Timoti 4 ->