4 Ehe, ahi ndratanan, Kindrei ibo gok boto-on labai ta koha aha i san ta Krais, ma aha akohok koha aha badeh, tan amwenen. Eme ma ahi amekes sahou i buku doh: Aha badeh, a buku la-ukei le, leheya iri mwan ma badih, Kindrei atehei ahi a buku aposel tan amwenen. 5 Handru, ahi amwenen winiyan ta amekes gok doh bwe. Eme ma ahi sasehek, sahou tahi amwenen mene bamekes ari lakou bwe. Kindrei le ari badeh aseben ahi, ma bwidi ahi winiyan ta gok. 6 Kindrei amwenen mene bwidi ahi winiyan, ma ahi bwidi gok tan ta sahou randra le ha-un nane doh. Sahou randra le ha-un nane doh, bala buku batanau ta Moses bwena mene bwe. Idoh lakou ha-un ja Malawin Ndrabun badeh, amekes asahan. Batanau malen ta Moses badeh, leheya taha kameh amak le. Iy nyamun ta edeu kohan buku lakou Malawin Ndrabun amekes asahan eme tataha bwe.
7 Bwena mene Kindrei torowenei sahou ta batanau malen badeh, udu bwele-e bek. Ma gok ta batanau doh leheya taha kameh amak le, tasah taha winiyan ba-en hamon handru ma akohok kohan mwasin bwe. Na len Kindrei edeu batanau ili mine Moses, lomada Kindrei badeh, asahan hawen, ma lomotani mada Moses labai. Eme ma, iri mwan ma badih badu Isra-el anoh, ma bwidi iri winiyan banyolom madan bwe. Ano, lomada sun nane udu mada Moses anya i bwisik, ma amak mara-ei. 8 Ya, gok Kindrei amekes ta edeu Malawin Ndrabun eme tataha mwan ma badih marakon, kameh udu bwele-en labai mara-ei ja ta sahou randra le malen mene, ma sun ta Kindrei kameh anya handru amwenen eme tataha. 9 Handru, batanau malen bwena mene edeu taha marakon a ta sahou ma tiye taha kameh amalin ta Kindrei. Ya, batanau malen doh mene asahan hawe lomada Kindrei. I buku le, sahou randra le ha-un doh ja badeh, akohok iri mwan ma badih ame hamon ma aloh iri lau mwasin labai, idoh kameh ibo gok ta edeu tataha sun ta Kindrei solo-an labai. 10 Batanau doh mene iri mwan ma badih badu Isra-el anya lakou laba tinan labai, ma leheyani Kindrei eme tataha, na dah iy asahan laleyah. Tasah, sahou randra le ha-un doh taha aloh sahou mwasin udu bwele-en mara-ei labai ja, ma leheya buku Kindrei aso-ok taha labai. 11 Ehe, batanau bwena doh mene ta udu luluwen bwe, iy asahan hawe sun ta Kindrei. Arile, lakou ha-un doh ja kameh ta udu le buku doh, sun asahan hawen kameh i tinan mara-ei.
12 Ehe, atondrok lakou doh kameh ta ere le buku doh. Eme ma, bwili ahi winiyan bama ta atiye sahou mwasin doh bwe. 13 Arile, ahi batone ari sahou ta sahou mwasin bwe. Ahi tanan kameh asahan i tinan mara-ei. Eme ma ahi bamekes kandriyen buku Moses amekes bwe. Iy mene tone madan na ranah kolau, ma iri mwan ma badih badu Isra-el sanyolom sun doh anya i bwisik ma ano mara-ei. 14 Budon ma ndrine iri lau Isra-el bwena ndrahis, ma iri bala tanan moson o kati batanau doh, Moses mene edeu ili tiri bwe. Ma na dah ale, iri lau Isra-el, iri bala tanan moso kati sahou batanau bwe. Buku iri atehei budon tiri handru in ta Krais, Kindrei kameh winiyan sihi budon tiri, ma iri winiyan atanan handru ta kati moson ta sahou batanau. 15-16 Ehe, idoh handru, bolo len marakon iri mwan ma badih badu Isra-el anyolom sahou ta Moses udu bolo asiu ta Kindrei, budon tiri ihis, ma iri bala tanan saba lakou Kindrei anya kaleheya iri ta batanau doh bwe. Arile, buku mwan o badih iy tubuni ndrinen ili ta Laban, iy badeh ndrasihi budon tiri ma iri ndratanan Jises Krais iy are lau handru. I buku Kindrei tolowei kolau tubuluhi mada iri, ma iri winiyan anyolom amwenen. 17 Na dah, Laban badeh, ndra Malawin Mwasin; ma are lau Malawin Mwasin ta Laban udu hawen, iri kameh ari maha-an ta a-en hamon ta batanau ta Moses ja bwe. Ma iri ale kameh are len labai ta kandriyen ndra-in. 18 Na dah, taha mwan ma badih marakon asahan lau ta Kindrei, taha badeh, batone kandriyen asahan ta manyah tataha bwe i buku bwena mene Moses amekes. Koha taha badeh, leheya sun ta Kindrei asahan tataha i buku torowe leheya lakou. Eme ma, len marakon taha badeh, akohok sun ta Laban solo-an, solo-an labai, ma idoh tubuni taha, ma taha asahan buku le Laban amwenen. Malawin Mwasin ta Laban bwidi lakou doh eme tataha.
<- 2 Korin 22 Korin 4 ->