1 Budon tiri lohowan mari badeh, iri kamekes ki ta lau ta atondrok iri badeh, ki buku doh: Saba lahou ndramak ta atondrok iri katiye iri kamekes badeh, ndra iri kamekes le, tasah kandriyen doh badeh, mwasin. Ya, ki buku none iri katebelese, badeh kameh, iri lau kameh bobose nyara Kindrei, ma hawe leheya ta to ale. 2 Ya iri lohowan rayah tiri lau ta Kindrei badeh, sakohok budon anya, “Mwasin ai, ndramak ta Kindrei badeh, nadu tine to labai.” Ndri-iy, ado sakohok iri budon doh; budon doh badeh, bamwenen bwe. Arile, oro lohowan kakohok doh: “Bwe, ndramak ta lau ta Kindrei ta to doh badeh, ndramak ta Kindrei labai, eme ma to kaseken iy. Ma hawe to kamekes lahou boto-on ja ta aseben iy.”

3-4 Eme ya ou badeh, leheya ma tiye sahou dah ta aliu oro: I buku none oro are lau leheya tanan randra labai; bala buku none sahou handru ta Laban Jises Krais bwe, ma hawe bala buku none sahou handru ta lau ta Kindrei, aso leheya dah bwe; badeh kameh, iy ndra ari ai, arile iy tanan lakou bwe. Ma iy doh badeh, tanan sahou bwe, ma iy ta asoh sahou, ma ta aburoh sahou. Ya idoh kameh tiyani madalakis, losen ta lakou, ma hawe sondrokonya, ma amekes budon laleyah, 5 ma hawe andra-i kameh asahan tiri lau, budon tiri bado mwasin bwe, idah kameh amekes andra-i udu le buku doh. Eme ma, sahou handru badeh bado toro bwe. Eme oro anya kandriyen ta an hamon ta Kindrei badeh kameh amekes oro akohok lakou solo-an.

6 Arile, a-en hamon ta Kindrei badeh, bamekes ou akohok lakou solo-an bwe. I buku none ou tam lakou solo-an, o lakou solo-an bwe oh, badeh ou sekesek ta aliy le ai. Ya sekesek tam doh kameh sakalawiy, ou tam lakou solo-an ja. 7 Taha tanan, tine taha edeu taha ame len bolo kon munyak badeh, taha bakohok ari lakou bame hawe taha, bwe. Ya, buku taha amak, taha winiyan bakohok ari lakou badu munyak bala hawe taha bwe le. 8 Eme ya, i buku none tato kolau, ma hawe nato nyamon udu aliy, badeh, winiya to ka-i ai. 9 Arile, i buku none iri lau anya ka-en hamon tiri lau lakou tiri solo-an, ya kasahan i buku iri. Badeh kameh, iri taku ma arah are bolo kandriyen ta madalakis, ma iri kameh bale iri bwe, ma hawe amekes nono-ou laleyah ta aliu iri le, ma iri taku andra-i handru. 10 Tasah, kandriyen ta ou aseken luk solo-an badeh, kati kandriyen ndra-in mari. Ya lau rayah ala labai ta aseken lakou solo-an, eme aluwi iri ame len labai ta budon handru. Eme ya oro le badeh, amekes bohosak i toro amwenen.

11 Arile, ou ndramak ta Kindrei badeh, teleya lakou doh. Ou badeh, asa-ar ta amekes kandriyen ta ou asahan mwasin ta mada Kindrei. I buku none ou abadok ta kandriyen mwasin ta Kindrei, i buku none kandriyen ta budon handru le, ya, i buku none kandriyen ta ou ales boto-on, ya kandriyen ta tikisiy ma hawe kandriyen ta ou bato-ou ta losen suwi bwe, 12 ou badeh, abadok ta sakaliye ta budon handru. Ma ou anyolom ki bwena ta koham handru ta winiyan bamak bwe. Ma koham handru doh mene Kindrei ndratehei ndrawek tam; na len iy aloh ou ame len, asehek budon tam handru i ndranye lau mari anuhun. 13 Ou amekes iri lakou doh udu mada Kindrei anyolom. Tasah, iy le ari badeh, edeu mulin i ta lakou mari. Ma ou amekes iri lakou doh kudu mada Jises Krais, i buku none iy mene ale ales udu mada Pontiyus Pailat tiye sahou ta budon handru; 14 Ya udu mada Kindrei hawe Jises jo tiye batanau i buku doh, “Ou tawi batanau dah kihis, winiya le Krais barasahan, bwe kameh lau kabobose ou. 15 Ya iy kameh asahan na len Kindrei le tanan, eme ya masiye ma tudun ki tan, tasah iy le ari badeh, atondrok, ma iy le ari badeh, kabin tiri kabin mari ma hawe iy le ari badeh, Laban sakalau Laban mari. 16 Ya iy le ari badeh, ta udu le buku doh, ma iy badeh, manyah udu lomadan labai, winiya ari lau winiyan bala mirihik tan bwe. Udu ndra bwena, eme taku dah, ari lau banyolom iy bwe, ma ari ndramak winiyan batou iy bwe le. Eme ya masiye ma tudun ki tan hawe boto-on ki tan, tasah iy badeh, winiyan ta ano bwe, ma iy badeh, ta udu le buku doh. Handru!”

17 Ou batanau oro lau ala lakou toro solo-an, ta oro satudun oro ma hawe oro satehei budon toro boto-on sa-en ta lakou solo-an toro, tasah lakou doh, winiyan bado luwen bwe. Arile, oro katehei budon toro kabadok ta Kindrei. Tasah, iy badeh, lakou tan solo-an labai, ya idah kameh iy edeu eme tato kasekesek ta aliy. 18 Ou batanau oro ta oro badeh, kadih na kandriyen mwasin hawe kandriyen ta anyohan lakou i tiri lau ari ari. 19 Ya, ki buku none oro kamekes kandriyen doh, idah kameh, oro atukum toro le lakou mwasin labai, ta udu le buku doh na len hamon kameh eme. Ya idah kameh, oro winiyan kuhi koha oro handru.

20 Eme ya Timoti, ou tawi lahou udu kanim badeh, kamwenen labai. Ma ou teleya ou, ta tanan ta wasai ala iri aloh anya, “Tanan handru.” Arile bwe. Badeh bamwenen ta sahou ta kindrei bwe, badeh. 21 Ya iri lau rayah badeh, ndra bolo tanan doh, ma iri ndrala len labai ta budon handru.

<- 1 Timoti 5