La-ukei ta
JON ramen iy atorou ma bwena Sahou Tanan La-ukei dah badeh, moson tan ma la-uh. Ari badeh, ta aseben ndrine iri lau ta Kindrei kudu mwasin hawe tama taha Kindrei uru nadun, Jises Krais. Ma ari ja i buku doh, iy bwalen ta iri lau badu lulik kawendreya iri, ma karuwi iri kamani Kindrei. Iri lau badu lulik nane doh badeh, asehek i buku doh: Iri lakou mara-ei udu kon munyak dah badeh, se kone iri bwai. Ma Jises ale badeh, nadu Kindrei, eme ma iy winiyan basahan ndramak handru, ma kihis hawe iri lakou badu kon munyak, i buku taha mwan ma badih ale amekes kede-eh, bwe. Iri asehek i buku doh, buku ndramak anya kudu mwasin hawe Kindrei badeh, iy sabudon iri lakou marakon badu kon munyak labai. Iy sabudon ta a-en hamon tiri kandriyen ta aseken ndramak ari ja, tasah iri anya iri kandriyen buku doh, badu kon munyak ale. Eme ma, iri anya taha sabudon boto-on labai, ta a-en hamon tiri kandriyen doh. Jon anya, iri lau ta Kindrei badeh, satehei ndranye iri sala tiri sahou doh. Iy anya, Jises badeh, ndrasahan ndrame awas handru, ma iri mwan ma badih badeh, katehei budon tiri ki-in ta Jises, iri badeh, kaso-ok Kindrei handru, ma hawe iri mwan ma badih rayah ja. Iri Sahou Tinan Sahou kohan udu aliy asahan eme awas (1:1-4) Lomada sun hawe lulik (1:5–2:6) Batanau ta kandriyen ha-un (2:7-17) Nadu Kindrei iri, ma hawe nadu balik (Satan) (2:18–3:10) Tikisiy ta Kindrei ma tikisiy tataha (3:11–4:21) Taha lau ta Kindrei badeh, katehei budon tataha mara-ei kihis ki-in le tan (5:1-21)
Taha badeh, kadek ta lomada sun, ma taha salelei iri lau badu lulik sawendreya taha 1(Kalan 1:1–3:10) Sahou kohan in aliy asahan eme lewan, ma lau marakon anyolom 1 Aso badeh, ta atorou la-ukei ewek taha, ta nyala sahou kohan handru in aliy. Sahou dah badeh, asahan bwena labai, ya aso ndranuhun, ma aso ndranyolom na mada aso amwenen. Ma aso ndratona na mine aso ale. 2 Sahou dah asahan eme lewan, ya aso anyolom na mada aso, ma aso asehek nyala aliy. Ya aso tiye ewek taha dah, ta nyala kohan handru winiyan bano bwe. Ma bwena iy in hawe tama taha Kindrei, ya idah iy ndrasahan ndrame lewan, ma aso atou iy na mada aso amwenen. 3 Eme ma aso asehek ewek taha, ta lakou mari aso ndranyolom, ma ndranuhun, ma aha kameh winiyan atudun Kindrei hawe ahi, ma tukum tataha kameh udu hawe tama taha Kindrei uru nadun Jises Krais. 4 Aso atorou sahou dah ta nyala aha, tasah sahou bwidi ahi sekesek tinan labai. Taha badeh, kadek ta lomada sun 5 Aso ndranuhun nadu Kindrei Jises Krais asehek sahou dah, ya aso asehek nyala aha i buku doh: Kindrei badeh, iy lomadan labai, lulik winiyan basahan tan o badan bwe. 6 Buku taha ari ari anya, “Ndrinek udu mwasin hawe Kindrei, ma jo edek hawen handru,” arile, iy edek bolo lulik kahis le, iy badeh wasai, ma iy ba-en hamon ta sahou handru bwe. 7 Arile, buku taha adek bolo lomada sun, i buku le iy, taha badeh, katukum ma ndrine taha kamwenen ta nadu tine taha iri rayah ja, ma ndraye Nadu Kindrei, Jises Krais kameh sikinei kandriyen ndra-in tataha mara-ei iu.8 Buku taha anya, “Jo bamekes ari kandriyen ndra-in bwe,” taha badeh, ndrawendreyani ndrine taha le amwenen, ya sahou handru ta Kindrei badeh, ba-en ndrine taha bwe. 9 Arile, buku taha nyowonya kandriyen ndra-in tataha eme lewan, Kindrei kameh winiyan bamani taha bwe. Tasah, iy bwidi lakou buku iy ndrasehek, ma iy winiyan mesekei kandriyen mwasin. Eme ma, iy kameh mani kandriyen ndra-in tataha mari iu, ma bwidi taha asahan ha-un mara-ei ja. 10 Buku taha anya, “Jo bamekes ari kandriyen ndra-in bwe,” sebwe na sahou tan doh, taha aloh Kindrei ndramak ari ta wasai. Tasah, Kindrei mene ndratiye i buku doh: Taha mari badeh, amekes kandriyen ndra-in. Buku taha asehek i buku doh, sahou tan handru badeh, ba-en ndrine taha bwai.
1 Jon 2 ->
8 Buku taha anya, “Jo bamekes ari kandriyen ndra-in bwe,” taha badeh, ndrawendreyani ndrine taha le amwenen, ya sahou handru ta Kindrei badeh, ba-en ndrine taha bwe. 9 Arile, buku taha nyowonya kandriyen ndra-in tataha eme lewan, Kindrei kameh winiyan bamani taha bwe. Tasah, iy bwidi lakou buku iy ndrasehek, ma iy winiyan mesekei kandriyen mwasin. Eme ma, iy kameh mani kandriyen ndra-in tataha mari iu, ma bwidi taha asahan ha-un mara-ei ja. 10 Buku taha anya, “Jo bamekes ari kandriyen ndra-in bwe,” sebwe na sahou tan doh, taha aloh Kindrei ndramak ari ta wasai. Tasah, Kindrei mene ndratiye i buku doh: Taha mari badeh, amekes kandriyen ndra-in. Buku taha asehek i buku doh, sahou tan handru badeh, ba-en ndrine taha bwai.
1 Jon 2 ->