1 Korin 12

Ndramas ta Malawin Ndrabun

1 Ya aha kawas tek, na idah jo anya kasehek taha, ta ndremenya taha mene eme tek, ta iri ndramas ta Malawin Ndrabun. Eme kameh, aha winiyan atanan mwasin ta aliy. 2 Aha kabudon, manyah taha bwena mene are ndra bolo lulik, ano aha ame lewan. Aha mene atehei aha ala bolo iri san ndra-in ta kindrei ta wendreya, ari koha iri bwe, iri lau amekes na sukumada kei. 3 Jo aso-ok na dah, aha katanan ta aleben iri malawin ndra-in, ma iri Malawin Mwasin ta Kindrei kamwenen. Buku Malawin Mwasin ta Kindrei irek ere ndrine ari mwan o badih, ma iy asehek sahou i tan, ya iy mwan o badih doh winiyan basehek sahou anya, “Jises ibo lolo-ou,” bwe. Ma ale, buku ari mwan o badih iy barek ta Malawin Ndrabun bwe, iy winiyan basehek anya, “Jises, badeh, Laban,” bwe.

4 Iri ndramas ta Malawin Ndrabun kede-eh solo-an labai. Arile, Malawin Mwasin badeh, ari le, ma iy edeu lakou doh eme tataha. 5 Taha winiyan amekes iri gok solo-an ta Laban. Arile, Laban badeh, ari le. 6 Kandriyen ta amekes gok kede-eh, iri solo-an labai, arile Kindrei badeh, ari le, ma iy edeu boto-on eme tataha lau marakon, ma taha winiya amekes iri gok doh.

7 Malawin Ndrabun badeh, ndraleheyani iy amwenen ndrame lewan ta lau ta Kindrei marakon. Iy amekes i buku doh, ta taha kaseben iri lau rayah ja. 8 Taha lau rayah badeh, winiya asehek sahou ta budon. Ya iri rayah ja winiya asehek sahou ta tanan, arile iri ndramas marakon doh badu mine Malawin Ndrabun le ari. 9 Lau rayah badeh, akohok budon handru badeh, boto-on labai. Ya lau rayah ja badeh akohok boto-on ta anyumor ndramak ibo sik amwenen ja. Iri lau mwan ma badih nane doh akohok ndramas ta Malawin Ndrabun ari le. 10 Ta iy ari ja badeh, iy edeu boto-on ta amekes lahou tinan ma kalem. Ta iy ari ja badeh, iy edeu ndramas ta asehek sahou buku propet. Ya, iy ari ja akohok ndramas ta seleya iri malawin marakon, ta Kindrei, deh bwe. Iy ari badeh, akohok ndramas ta asehek boho kon randrah labai ja. Iy ari ja akohok ndramas ta tobolowe iri boho kon doh, ma asehek ili tiri lau ta Kindrei. 11 Malawin Mwasin ari le nane adeh, amekes iri lakou marakon. Ta so-ok tan le, iy apwai ndramas tan marakon ili ta ndramak ari, ari.

Bada taha ari le, lakou solo-an udu aliy

12 Bada taha ari le, lakou solo-an badeh, udu aliy. Iri lakou mara-ei nane doh ahis are bada taha. Bada Krais badeh, i buku aliy. 13 Handru, taha rayah badeh, Juwis, ma rayah bwe. Taha rayah badeh, bonyo-ou, ma taha rayah badeh, bwe. Arile, Malawin Ndrabun ndratehei taha mara-ei ndrala ndrahis ta bada Krais le ari. Iy amekes doh bwena, kala taha mene alomwa taha na Malawin Ndrabun ari le nane, eme ma, Kindrei tiye iy ta eme ndrine taha mara-ei.

14 Sahou dah handru, bada taha kede-eh ari le bwe. Iy badeh, solo-an labai. 15 Sahou sokek ari i buku doh: Sebwe katim kameh asehek i buku doh, “Jo minem bwe. Eme ma, jo badu sese badam bwe.” Buku katim, iy abudon, ma iy asehek i buku le doh, kede-eh handru deh? Bo-oh! 16 O, i buku ndranyem anya, “Jo madam bwe, eme ma jo badu badam bwe.” I buku ndranyem tiye i buku doh, aha sanuhun sahou tan. Iy badeh, badu hawe badam amwenen. 17 I buku badam mara-ei ki madam le, ou winiya banuhun ari lakou bwe. Ma, i buku badam mara-ei ki ndranyem le, ou winiya bahon lakou bwe. 18 Arile, Kindrei ndratehei iri lakou marakon badu bada taha ili le se, in hamon ta tanan ma so-ok tan.

19 I buku badam ki sese le, ya badam handru kameh udu heh? 20 Arile, Kindrei bamekes bala buku aliy bwe. Iri lakou solo-an badeh, udu badam amwenen, arile, badam handru badeh, ari le. 21 Madam winiya basehek sahou bala ta minem anya, “Jo le winiyan, jo baso-ok ou bwe.” Ma batum winiya basehek sahou bala ta katim anya, “Jo le winiyan, jo baso-ok ou bwe.” 22 Badeh, bamwenen se bwai! Iri lakou rayah ou abudon, iri nyamu iri bwe, iri badu badam le amwenen. I buku iri bado badam bwe, badam kameh winiya bamwenen bwe. 23 Iri lakou rayah udu badam ou anya, iri ndra-in sese, ou badeh, nyosowani iri na nyasou solo-an. Ya, iri lakou rayah udu badam, bwilim ale ama ta aliy, ou

badeh, tubuluhi iri amai udu mwasin labai. 24 Arile, lakou rayah udu badam, kone iri mwasin ja, badeh, bwai. Handru, Kindrei bwidi bada taha iri marakon ndrala le se. Ma bada taha rayah, i buku nyara iri bwe, Kindrei le amwenen edeu nyara iri. 25 Iy amekes i buku doh, ta bada taha iri satebelese, ma satalan laleyah, arile taha ari, ari winiyan atondrok iri rayah ta kandriyen randra le. 26 Buku bada taha sese atona isi, badeh, bwidi bada taha mara-ei isi. Buku bada taha sese sekesek ta akohok nyaran mwasin, idah kameh bada taha mara-ei sekesek labai.

27 Na dah bada aha marakon ndrahis ndrala bada Krais le ari, ma bada aha ari, ari badu hawe badan. 28 Udu bolo iri lau ta Kindrei, iy atehei iri aposel mwena, ano iri propet, hamon tiri propet, iri lau ta leheya. Ano iy ale atehei lau rayah ta amekes lahou tinan ma kalem, iri rayah ta anyumor lau abo sik, iri rayah ta aseben, iri rayah asahan kabin ta amekes lahou ta Kindrei, ma iri rayah ta asehek iri boho kon randrah labai ja. 29 Gok buku aposel, propet, ndramak ta leheya, ma ndramak ta amekes lahou tinan ma kalem; lau marakon winiya bamekes iri gok doh bwe. 30 Iri gok rayah ja ale, buku anyumor ndramak ibo sik, asehek boho kon randrah labai ja, ta tobolowe moso boho kon mara-ei; lau marakon winiya bamekes iri gok doh bwe. 31 Aha lau mwan ma badih badu Korin kede-eh amekes iri gok solo-an labai ta akohok ndramas ta Malawin Ndrabun.

Taha kaso-ok ndramak ari, ari

Arile, na dah, jo anya kaleheya aha ta san ari mwasin handru, ma iy udu bwele-en labai. San doh ta ou aso-ok iri lau rayah ja.

<- 1 Korin 11 1 Korin 13 ->