Pol atorou la-ukei tan ramen ma bwena ili tiri lau badu kon

KORIN
Sahou Tanan
Udu bolo len ta Pol doh badeh, kon Korin i kon tinan udu Akaya loboho tiri Grik. Pol iy le ari ma bwena handru ili ta atiye sahou ta Jises ili kon tinan Korin, ma iy eme amekes iri gok ta Kindrei udu kon tinan nane doh. Arile, Pol eme ruwani iri ado, iy ili amekes gok ili kon rakon ja, iri maha eme asahan bolo lau ta Kindrei badu Korin. Eme ma Pol torowenei la-ukei dah ta edeu budon mwasin ili tiri ta amekes maha-an udu bolo iri kudu mwasin.
Pol badeh, tikisi iri lau ta Kindrei badu Korin tinan labai. Kora-on budon tiri mwasin ki-iu laleyah. Ma kora-on kandriyen tiri mwasin kandra-i. Iy asehek ili san ta kandriyen mwasin ta iri tasou ka-en hamon ta aliy, ma ta iri maha-an asahan solo-an badeh, ta iri lau baso-ok ta akohok Malawin Ndrabun ta Kindrei ta atondrok tekedek tiri bwe. Iy tiye ale ta iri kandriyen mwasin ta atukum, ma ta atudun nyara Kindrei, ma ta iri kandriyen solo-an tiri ndramas ale Malawin Ndrabun edeu ili tiri lau ta Kindrei. Iy asehek ale ta iri lau ndramak ndra-au bwena, iri kameh amak ja.
Ta iri lakou marakon nane doh edeu iri maha ili tiri Korin, Pol badeh, amekes iri sahou mwasin labai ta aseben iri katanan ta iri so-ok ta Kindrei. Lakou ari udu bolo buk dah, iri lau ta Kindrei solo-an aso-ok labai badeh, udu bolo kalan ronoh taloh. Udu bolo kalan nane doh, Pol ndraleheyaniy, buku iri aso-ok iri nadu tine iri rayah ja, idoh badeh, ndramas ari mwasin labai, Kindrei edeu ili tiri lau mwan ma badih tan.
Iri Sahou Tinan
Sahou sekesek ma salom ta Pol (1:1-9)
Aloh ta taha ka le ari (1:10–4:21)
Kandriyen bamwenen bwe ta tasou (5:1–7:40)
Lau ta Kindrei ma lau ta Kindrei bwe (8:1–11:1)
Tekedek ta atudun udu bolo asiu tan (11:2–14:40)
Amak ja ta Krais ma hawe iri lau tan handru (15:1-58)
Salom ta lau tiri lakou bwe (16:1-4)
Budon ta tekedek ta Pol (16:5-12)
Sekesek tan amwenen (16:13-24)

Iri lau ta Kindrei badeh, satebelese ma satudun nyara iri le amwenen

(Kalan 1–4)

Sahou sekesek ta Pol

1-2 Jo Pol, jo aposel ta Krais Jises. Na budon ta Kindrei le iy tiye jo asahan lau ta atiye sahou tan. Aru nadu tine taha Sostenes atorou la-ukei dah ewek taha lau mwan ma badih atudun nyara Kindrei ado kon tinan Korin. Krais Jises andrei aha marakon ame asahan ndrabun ma lau tan amwenen; iy andrei aha hawe iri lau badu kon munyak mara-ei, iri ale atudun iy ma asolom in ta nyaran. Iy Laban tataha ma tiri ale. 3 Salom tek ili ta tama taha Kindrei ma hawe Laban Jises Krais ta uru katikisi aha, ma kabwidi ndrine aha kudu mwasin.

Pol edeu wurah i ta Kindrei

4 Len marakon jo edeu wurah ili ta Kindrei, iy mene amekes kandriyen mwasin ta tikisiy ewek taha, tasah aha lau ta Jises Krais. 5 Aha ndrahis hawe Jises labai, eme ma Kindrei ndratehei iri tanan mari mwasin ndrawek taha, ma iy aseben aha ta iri sahou mwasin aha asehek. 6 Tasah, sahou ta Kindrei ahi mene ndrasihidiy ndrawek taha, ndrado bolo ndrine aha, ma ndrato-ou salin. 7 Ta idoh le, aha barah ta ari nyosowan ta Malawin Ndrabun bwe. Aha ado le ta atondrok len ta Laban tataha Jises Krais eme hamon ja, ma ta iy edeu iri lau badu kon munyak ala ta sahou. 8 Iy le kameh tondrokei aha ado mwasin ili winiya le len hamon. Buku len doh Jises Krais eme hamon ja ta anuhun sahou tataha, ari ndramak winiyan basehek taha ta lakou ndra-in ja bwe. 9 Kindrei le amwenen mene atehei aha, ta ndrine aha kudu mwasin hawe nadun Jises Krais. Kindrei, iy mwasin labai, ma ta wendreya bwe. Iy badeh, in hamon tiri sahou tan, ma taha winiyan atehei budon tataha marakon in tan.

Aha sapou aha

10 Na boto-on le ta Laban Jises Krais tataha, jo anya kasehek taha nadu tine mwan ma badih i san ta nyara Jises Krais. Jo anya kabatanau aha ki buku doh: Sohowa aha marakon badeh, ki le randra, idah kameh ari ndra-i winiya bado ndrokowa aha bwe. Aha sapou aha. Budon ma tanan taha badeh, ki le randra ta iri lakou marakon aha abudon ma asehek. 11 Tasah, oro lau rayah badu asiu ta Kolowe ame asehek tek anya, aha nadu tine badeh, ndra-i udu ndrokowa aha solo-an labai. 12 Aha marakon badeh, aha ari ari asehek sahou i randrah randrah. Iri rayah anya, “Ahi badu hamon ta sahou ta Pol,” ma iri rayah ja anya, “Ahi badu hamon ta sahou ta Apolos,” ma iri rayah ja anya, “Ahi badu hamon ta sahou ta Pita.” Iri rayah ja anya, “Ahi badu hamon ta sahou ta Krais le.”

13 I buku sah handru? Sebwe Krais apwai iy nadeh? Sebwe iri tatahi jo Pol ili bada kei tondreh ta ndra-in taha nadeh? Iri anyu aha, iri aloh nyara Pol ale? 14 Jo edeu wurah i ta Kindrei ta jo banyu aha solo-an bwe. Jo anyuwi Krisipus uru Gayus le. 15 Eme ma, aha sasehek anya, “Ahi anyu badeh, in bwele-e nyara Pol.” ( 16 Ehe, jo anyuwi oro lau rayah, oro badeh, ado asiu ta Stepanas. Jo anyuwi lau rayah ja nadeh, arile jo ndramani nyara oro.) 17 Krais tiye jo ta anyu lau bwe, iy tiye jo eme ta tiye sahou tan mwasin. Ya, na len jo mene atiye sahou mwasin ewek taha, jo ba-en hamon ta kandriyen tiri lau ala ta akohok tanan ta andrek iri mwan ma badih ta sahou tiri bwe. Jo bwalek ariu budon taha na sahou badu bohok amwenen. Jo aso-ok gok ta Krais mene bwidiy udu bada kei tondreh, idoh le boto-on labai, winiyan aruwi budon taha.

Krais badeh boto-on ta Kindrei

18 Iri sahou ta nyala Krais imek udu bada kei tondreh badeh, ari moson bwe, ta ndranye iri lau ndramai, ma bakohok seben tan bwe. Arile, ta taha lau ndrakohok seben ta Krais, sahou nane doh, boto-on ta Kindrei. 19 I buku le Kindrei asehek udu bolo buk ndrabun i buku doh,

“Jo kameh bokoro-ei tanan tiri lau nane anya kasahan ndramak ta tanan. Jo kameh sani budon tiri lau nane, iri anya iri ndratanan iri lakou solo-an.” Aisaya 29:14

20 Iri lau ta tanan ndraheh? Ya iri lau tanan ta iri kandriyen malen badu bolo buk ndrabun ta Kindrei ndraheh? Iri lau nane ale tawi iri tanan udu bolo batu iri ndraheh? Kindrei ndraleheyani tanan tiri lau ta tanan badu kon munyak i buku lakou laleyah. 21 Kindrei in hamon ta budon tan amwenen, ma ta idoh, iy sani san tiri lau ta tanan, iri anya, iri winiyan atanan iy. Tasah, iri winiyan bala tanan Kindrei ta iri budon solo-an badu munyak ta iri a-en hamon ta aliy, bwe. Kindrei anya kakohok iri mwan ma badih i buku doh: Iri mwan ma badih anuhun sahou mwasin nane ahi aposel atiye, iri lau solo-an badu kon munyak aloh, “sahou moson bwe.” Arile, are lau iri atehei budon tiri ili le ta Krais, Kindrei badeh, sekesek ta akohok iri ame hamon ja. 22 Iri Juwis atehei budon tiri boto-on ta anyolom lahou tinan ma kalem, ya iri Grik badeh, abo gok boto-on ta akohok budon ma tanan mwasin. 23 Arile ahi atiye iri sahou mwasin ta Krais badeh, iri tatahi iy ili bada kei tondreh. Sahou doh badeh, bokoro-ei budon tiri lau Juwis, ma iri atehei kona iri i tan. Ya, iri lau badu leheleh anya, sahou nane doh ta laleyah le. 24 Arile, taha lau mwan ma badih badeh, badu Juwis ma Grik, Kindrei mene andrei taha ndrala tan. Eme ma taha ndratanan, Krais badeh, iy boto-on ta Kindrei, ma iy ale badeh, tanan mwasin ta Kindrei. 25 Handru, lau rayah badu kon munyak abudon i buku doh, budon ma tanan ta Kindrei badeh, ta laleyah le. Arile, budon ma tanan tan badeh, udu bwele-en labai ja tiri lau marakon. Iri lau rayah anya Kindrei nyamun bwe, arile iy boto-on labai ja tiri lau marakon.

26 Aha kawas tek, aha kabudon na len mwena mene ale Kindrei aloh aha asahan lau tan. Ta mada iri lau badu kon munyak badeh, aha solo-an basahan lau ta tanan bwe. Aha solo-an badeh, nyamu aha bwe. Ma aha solo-an basahan ta lau nadu batun bwe. 27 Arile Kindrei badeh, andrei oro lau ta laleyah le badu kon munyak ame atehei iri lau ta tanan labai ala ta bwilima. Iy andrei oro lau nyamu oro bwe badu kon munyak, ta atehei iri lau boto-on labai ala ta bwilima. 28 Iy eme andrei oro lau nyara oro bado kon munyak dah bwe, oro lau doh iri lau rayah anyolom i buku oro lau ndra-in. Handru, Kindrei andrei oro lakou laleyah nane ame ta bwidi iri lakou tinan kasahan lakou laleyah ja. 29 Iy bwidiy i buku doh, ta ari ndramak winiyan batudun nyaran amwenen ere madan bwe. 30 Tasah, Kindrei ndratehei aha ndrahis hawe Krais Jises, ma iy atehei Krais asahan kati iri tanan mwasin tataha. Na iy le, taha asahan ndrabun ma lau mwasin labai ta madan. Ma iy ale i nyara san ta Kindrei akohok taha ame hamon ja. 31 Eme ma, Kindrei aso-ok taha kamekes iri kandriyen, i buku le buk ndrabun tan asehek,

“Are lau iy anya katudun nyaran, iy badeh, katudun nyara Laban le ari ta lakou marakon iy ndrabwidiy.” Jeremaya 9:24

1 Korin 2 ->