Geregerena Fala Jiu Gi Li

Hebrus
Nali ioli iko 'ali gera Kristin, gera sae fafuta'a rasua ala ioli Kristin gi. 'E 'urifo ionada iko 'ali 'oka, ma garani gera ka kalasu lo faasia fitoona gera ala Christ. Gera oga 'ali gera ka oli lo 'ada fala falafala Jiu gi li. Wale 'e 'e geregere fada 'e ilia fada 'ali gera fafu ala dau nasina ala fitoona gera gi li. 'E sae 'uri 'e fada, Jesus Christ mola 'e fatae madakwa ala God faga. Jesus 'e ura nasi talasi 'e famalifii rasua ai, ma 'i lia Wela firi God. Jesus 'e tasa ka liufia lou profet 'i lao gi. Lia ka liufia lou eniselo gi, ma ka liufia lou Moses wasua. 'Are la fo, ioli Kristin gi gera ka ura nasi 'i laola fitoona gera gi, ma ikoso gera oli fae buri fala falafala Jiu gi li.
God 'e ilia ka sui lo lia Jesus lo fata abu ba'ela io firi, ma ka tasa liufia rasua fata abu 'i lao gi. Ma galona lia ala fata abu na li, Jesus 'e saiala faamurinala ioli gi, 'ali gera sigi tefau faasia ta'ana failia maena. Foasina 'i lao gi gera fatailia mola lului 'are Jesus 'e taua. Wale 'e gerea buka 'e li, 'e ilia fala Kristin gi 'ali gera ura nasi firi ala fitoona gera gi, malaa ioli ba'ela ba 'i lao gi. Wasua talasi ioli gi gera ka malakwaita ada, 'e ilia gera ka ura nasi ala fitoona gera gi.
'Are 'ilitoa 'i laola buka 'e li gi li:
Jesus 'e tasa ka liufia eniselo gi (1:1—2:18)
Jesus 'e tasa ka liufia Moses failia Josua (3:1—4:13)
Jesus 'ilito'ola fata abu Kwalaimoki (4:14—7:28)
Sae alafuunala Jesus 'e tasa rasua (8:1—9:22)
Foasina Jesus 'e tasa rasua (9:23—10:18)
Ioli fitoo gi gera ka ura nasi ala fitoona gera gi (10:19-30)
Ioli 'i lao mae gera fitoo 'oka ala God gi (11:1-40)
Donaa maurinala Jesus (12:1—13:19)
Alaana fafu'isi gi (13:20-25)

God 'e alaa faga 'alia Wela lia

1 'Ua lo mae 'i lao, God 'e sae fala koko 'ualo gia gi 'alia profet gi ala talasi afula ma 'alia kwalumolee 'are mamata gi sui. 2 Ma ala fe atoa fafu'isi 'e gi, 'e sae lo faga 'alia Wela lia. Ma God 'e raunailia 'are gi sui 'alia Wela lia, ma 'i lia lou God 'e filia 'ali ka too ala 'are gi sui. 3 Wela Wale God 'e fatailia madakwana ala 'ilitoanala God tefau, ma ka rada failia ala malutala tofunai. Ma Wela God 'e dau fanasia 'are gi 'alia nanatana ala saenala 'ali ikoso gera sui. 'I burila Wela 'e lufaa lo abulo ta'ana gia gi, ka bi oli fala 'i nali, ma ka gwauru ala gula aolo ala God 'ilitoa.

Wela God 'e 'ilitoa ka tasa

4 God 'e faa 'ilitoa Wela lia ka tasa liufia eniselo gi, malaa lou ratae 'are 'e kwatea fala Wela lia li 'e 'ilitoa ka tasa liufia ratae 'are 'e kwatea fala eniselo gi li. 5 Sulia God ba 'e sae 'uri 'e fala Wela lia,

“'I'o Wela lau, ma 'i tara'ela 'i lau Mama 'o.”✡

Ma God iko 'ali sae mola 'urifo fala ta eniselo.

Ma tekwa 'ua lo mae, God ka sae lou 'uri 'e sulia Wela lia,

“Lakae Mama 'ala, ma 'i lia kae Wela aagu.”✡

Wasua ma God iko 'ali sae mola 'urifo sulia ta eniselo.

6 Ma talasi 'e garani lo 'ali God ka kwatea mae Wela 'ilitoa lia fala 'i laola molagali li, God ka sae 'uri 'e,

“Eniselo lau gi sui gera foasia.”✡

7 Me saena God 'e taua sulia eniselo gi li, 'e 'uri 'e,

“Eniselo lau gera galo fagu gi, lau kwatea gera ka malaa oru gi failia dunaa gi.”✡

8 Ma God ka sae 'uri 'e sulia Wela lia,

“'I'o God, ma 'Ilitoana 'o kae io firi.

Ma 'o 'ilitoa fafia ioli 'o gi 'alia radana.

9 'O babalafe fafia 'are rada gi, ma ko barasi 'alia 'are ta'a gi.

'Are la, 'i lau God 'o, lau fili 'o, ma laka kwatea lou babalafena ba'ela famu failia fabaelana la 'e tasa ka liufia kwaima 'o gi.”✡

10 Ma God ka sae lou 'uri 'e fala Wela lia,

“Aofia ala fuli na mae, 'o raunailia wado 'alia limamu 'i talamu, ma ko raunailia raloo.

11 'Are fo gi kae sui, wasua 'i'o koe mauri firi. Gera kae furafura ta'a malaa na toro 'ualo.

12 Ma koe kalasua malaa na ioli 'e kalasua toro 'ualo. 'O olisia malaa toro.

Wasua ma 'i'o, ikoso olisi, maurinamu ikoso sui.”✡

13 God ka sae lou 'uri 'e fala Wela lia,

“'O io 'i gula aolo agu, la la ka dao ala talasi lakae alua koe liufia malimae 'o gi li.”✡

God iko 'ali sae mola 'urifo fala ta eniselo.

14 Ta 'e eniselo gi? Eniselo gi aloe 'are gera galo 'ala God gi. God 'e keria eniselo gi fala kwairanaina ala ioli kae faamaurida gi.

Hebrus 2 ->