1 Ko, qokolo, i sei sao ko qu juturia ira na goto tinoni? Ao qu juturia ira na goto tinoni sa kode munake boka tavavugasa tonai mina vaipitu na Tamasa. Ura tonai qu juturia na goto tinoni, poni sa mekamu tugu sa qu jutugo ura ao ba qu roitiniria tugu sira na roiti ikikeredi qai roitiniria ira. 2 Taqe tei gigila vataleoda tu gita sa na vaipitu tana Tamasa sa na koko lame veina pana tuvisi tonai sa pituria ira qai roitiniria na sakasava ikikeredi vei aipira. 3 Qokolo, ko ao ba qu roitiniria tugu mekamu sira tugu na sela qu jutuniria ira goto tinoni! Ko ai vei ao qu rorovea kode muna boka talegasaniamua ao sa na vaipitu tana Tamasa? 4 Ba palu qu vakepore veveinai beka sa na vairoqu lavata tana Tamasa beto na ona uana vei sake oqoqa tagigiri beto ko sa boka vera vamomosonigo na Tamasa. Quke gigilai tu ao sa na vairoqu tana Tamasa sa vei ko mi boka vagabaligo ao sau? 5 Ba qu korapa vapatua beto qu vaduduvilia na bulomu, ko qu korapa boka vaikamu tarinigo mekamu sa na vinakilasa muna gosoria pana rane tonai mina tadogoro votu sa na vaipitu tuvisina tana Tamasa.

6 Ura na Tamasa mina okoto tabaraniria na laona na dia roiti sira na tinoni.[a] 7 Ira na tinoni qaike ngajunia na roiti jongana beto qai nyaqoa ko na Tamasa mi vaululuria na valavataria beto ko mai tekua na toa kepore vinabetona qarigu, sa na Tamasa mina vaniria na toa jola. 8 Goto ira qai nyaqoa na dia nyorogua mekadi beto qai daidiania na sosoto goto qai tutia tu na dia soana seladi, sa na Tamasa mina vagosoroniria na ona vinakilasa manginina sira. 9 Ira doru tinoni qai roitinia isa sa sela sa mina vagosoroniria na tapata beto na vitigi takulanga, momoe ira na Jiu beto ira na tinoni karovodi tugu vei. 10 Goto ira qai toania na roiti jongana sa mina vaululuria na valavataria beto mina vaniria na bule, momoe ira na Jiu beto ira na karovodi tugu vei. 11 Ura na Tamasa sake totoka kale.

12 Ira na tinoni karovodi qaike isongia na Vavanau ti Mosese, ko qai sela beto qai mate tugu pana peguruna na Vavanau isa. Beto ira na Jiu qai isongia na Vavanau isa sa qai sela, beto na Vavanau tugu isa sa pituria. 13 Ura nake ira na tinoni qai nongoria gu na Vavanau sa qai tavatuvisi pa moena na Tamasa, goto ira tu qai tutia na Vavanau sa qai tavatuvisi. 14 Tonai ira na tinoni karovodi qaike isongia na Vavanau ti Mosese qai roitiniria pana dia uana kolena sa na sakasava pana Vavanau, poni sa sosoto qaike isongia tugu sa na Vavanau, ba sa kai muqisi podeke vei qai tei tutia tu ira sa na vavanau. 15 Na dia uana sa ulenia sa na roiti tana vavanau sa sa takuti gu pana bulodi, ko monanadi ba sa ulenia gu sisa, ura na dia rorove soku totoso sa toke muleniria beto kaki totoso sa totokeniria. 16 Ko aipira mina roiti vei sa na Tamasa pana rane tonai mina pituria sa na roroqu golomodi tadira na tinoni, ko mina roiti vagore votua i Jisu Karisito sa na vaipitu tana Tamasa, mina vei puputa sa pojai na nongoro jongana qa taraenia ara.

17 Ego ao qu visongonigo kai tinoni Jiu mekamu sa qu totoravusia na Vavanau ti Mosese beto qu vaqatania sa na tinoni tana Tamasa sao qugu. 18 Qu gigilai na nyorogua tana Tamasa beto qu boka vile pikataria sira na sakasava qai jongana jola, ura qu tavagigalai pana Vavanau sao. 19 Qu gigila vatalea sa mekamu sa kai tinoni vaitoni tadira na leleqadi, na kabere tadira pa rodomo, 20 kai tinoni vavanau tadira na pupupugudi, beto kai tinoni vaivagigalai tadira qai melalunia na sosoto tana Tamasa, beto qu isongia na gigalai okoto vatalena beto na sosotona pana Vavanau. 21 Ego ko ao qu vagigalairia ira goto tinoni qugu, sa ai sa vei qu vagigalaigo tugu mekamu? Ao qu tarae, <<Muke iko!>> qugu, ba ao mekamu quke iko? 22 Ao qu paranga, <<Muke babarata!>> qugu, ba ao mekamu quke babarata? Ao quke tavaraguaniria ira na beku, ba ao mekamu quke ikoria na zelepade? 23 Ao qu vavaqatania sa na veveina qu isongia na Vavanau, ba ao mekamu quke vakeporea sa na Tamasa tonai qu majai na Vavanau tana Tamasa? 24 Sa sotona gu sa na Kukuti Tabuna tonai pira sau, <<Pana laemiu agou sa ira na tinoni karovodi qai poja vivikeria sa na isongona na Tamasa,>>[b] sau.

25 Na pobe sa na vinagigila na tinoni tana Tamasa sao, ko vei bu kopunia na Vavanau poni sa na mua tapobe sa sa pore laena. Ba vei muneke tutia na Vavanau poni sa na mua tapobe sa sa vaitoto vei gu quke tapobe sao. 26 Beto ko na tinoni karovona sake tapobe sa bi tutia na uana tuvisina sa nyoroguania na Vavanau, poni sa na Tamasa mina doro veinia kai tinoni tapobena sisa. 27 Ko na tinoni karovona sake tapobe sa vei mina tutia na Vavanau poni sa mina tutinigo sao, ura qu isongia ao sa na vavanau takutina beto qu tapobe tugu ba qu majai na Vavanau. 28 Nake isa gu sa tapobe na vulitina sa na tinoni Jiu sosoto, beto nake sakasava sa taroiti pa peguruna gu na tini tinoni sa na ginuana sosoto na pobe. 29 Goto isa tu sa vevei na tinoni Jiu pa bulona sa na tinoni Jiu sosoto, isa sa tapobe na bulona. Ko na roiti alepi sa na Gagala tana Tamasa tu sa roitinia, nake Vavanau takutina sa roitinia. Na tinoni vevei ina sa sa tekua na vinatarasae tana Tamasa tu, nake pana tana tinoni.

<- Romu 1Romu 3 ->