1 Beto sa vabatinisiu tugu na mateana sa na pie vaivatoana, sa lioso vatatale, sa nyoro lagere vei pana totoqona bangara tana Tamasa beto na lami, 2 ko sa nyoro gore vei pa korapana na soana lavata pa gugusu lavata. Pana karu kalena na ovuku sa turu sa na gou vaivatoana, sa vua manogarua totoso pana kai aoro, kai totoso pa kai popu; beto ko ira na equruna sa na sasalanadi ira na pupuku tinoni. 3 Kepore kai sa talevena pana tana Tamasa sa mina kole pa gugusu isa, goto na totoqona bangara beto na lami gu sa pana ia isa beto ira na ona nabulu sa mai vatarasaea. 4 Kode mai batia na isumatana isa, beto mina takuti pana readi sa na isongona isa. 5 Na bongi sa mina kepore sa ketakoi, beto na juke beto na tapo sa maike kilu kole, ura na Bangara, na Tamasa gu sa na dia kabere, ko ira sa mai kole gu bangara kamua na kamua.
7 Mu vainongoro ko! Sa tata gu na lamequ sara! Mai tamana sira qai vataberia na paranga kokorotai qai kole pana buka api!>> sau.
8 Ara Jone, sa qa nongororia beto qa batiria sira doru sakasa aipira. Ko totonai qa nongoria na batiria poni sa qa kokopo gore pa peso ko ma vatarasaea sa na mateana isa sa vabatinisiu na sakasava inara qau, 9 poni sa paranga sa na mateana, <<Dai, muke roitinia isa! Ara ba kai nabulu veveimu tugu ao, beto veveidi tugu ira na tavitimu, na tinoni kokorotai, beto ko ira doru qai vataberia na paranga pana buka api. Goto na Tamasa tu sa mu vatarasaea!>> sau. 10 Beto pira sa poja veinisiu, <<Muke aru golomoria sira na paranga kokorotai pana buka api, ura sa tata lame gu sa na totoso tonai mai pidoko lame sa aipira. 11 Goto kopira sa isa na tinoni sa roitinia na roiti ikikerena, sa mi lalaona tugu roitinia na ikerena, isa sa paji na ona toa sa mi toania tugu laona sa na toa pajina; isa sa tuvisi mi laona tugu roiti vatuvisi, beto isa sa lioso na ona toa sa mi suvere lioso tugu laona,>> sau.
12 Sa paranga si Jisu, <<Mu vainongoro! Sa tata gu na lamequ sara. Mana pogosoria lame sa na pinia mana ianiria na tinoni, isa na padana na okokotona na dia roiti qai roitiniria. 13 Ara sa na alapa beto na omeqa, na momoe beto na liligu, na popodalaina beto na vinabetona.
14 Mai tamana sira qai tei valiosoria tu na dia poko, ko mai tavamalumu ko mai tutia sa na soana sa lao tome vei pana atakamanana na gusu lavata, ko mai somana tekua sa na vuana na gou vaivatoana. 15 Goto pa peguruna na gugusu lavata sira qaike tavamalumu ko mai tome sira na tinoni ikikeredi, ira qai roroiti potana, na roiti vabosi, vaivamate, vatarasae beku, beto ko ira sa learia na roiti seseke.
16 Ara Jisu sa qa garunu laonia sa na qua mateana, ko mina vavakatonia pana tadira na ekelesia sira na sakasa aipira. Ara gu sa na tuti lamequ beto na podo tutiqu pana tai Devita, beto ara tugu sa na seru vuvugei jonga sa tolanga,>> sau.
17 Na Gagala beto na maqotana na lami sa qai paranga lao tai Jisu, <<Mu lame,>> qarigu.
20 Isa sa vavakatoniria doru sakasava aipira sa sa paranga, <<E, sa tata gu na lamequ sara!>> sau.
21 Na vairoqu vaialona tana Bangara i Jisu mi kole somana pana tamugou dodoru tinoni tana Tamasa! Agua.
<- Dodogoro 21