Matiu 5

Na Qeqera Sosotona

(Luke 6.20-23)

1 Totonai sa batiria i Jisu sira na minete tinoni, poni sa sa kesa sae pa kukubona. Ko totonai sa toqo isa poni sa qai lame vavaikamu tana sira na ona sepele. 2 Poni sa sa podalai vagigalairia isa sira, pira sau:

3 <<Qai tamana sira qai golaba pa gagala,

ura tadira sa na binangara pa noka.

4 Qai tamana sira qai takulanga,

ura mai tavamanoto sira.

5 Qai tamana sira qaike tuara,

ura ira mai teku isongia na kasia abana.

6 Qai tamana sira qai burana kidepenia na tuvisi,

ura ira mai pote vatale.

7 Qai tamana sira qai vairoqu vaitokai,

ura ira mai taiania na vairoqu vaitokai.

8 Qai tamana sira sa lioso na bulodi,

ura ira mai batia na Tamasa.

9 Qai tamana sira na tinoni vavaivabule,

ura ira mai tapoja na tuna na Tamasa.

10 Qai tamana sira qai takomitinia na tuvisi,

ura tadira sa na binangara pa noka.

11 Qu tamana sagou tonai qai poja vivikeregou, qai komitigou beto qai jutu seseke tarinigou doru kai ikerena pana laequ ara. 12 Mu qera ko mu qera vivitigi tu, ura na miu pinia pa noka sa lavata jola. Ura ira na tinoni kokorotai pa moa ba qai komiti veiniria tugu inara,>> sau si Jisu.

Agou Na Solo Beto Na Kabere

(Maka 9.50; Luke 14.34-35)

13 <<Agou sa na solona na kasia abana. Ba totonai mina maragutu na lilingina sa na solo, poni sa ai mule mina vei beto mina boka lilingi solo ligu sisa? Totonai sa sa kepore veveina sisa, goto na padana sa mina tagona votu pale gu pa peguru, ko mai tete anyanyunia gu na tinoni.

14 Agou sa na kaberena na kasia gusu. Na gusu sa toqo pa batuna na kubo sa sake boka pae. 15 Kepore sa kai tinoni sa vatoaia na juke beto sa vatoqo pale pa kauru kadakita. Goto sa vatoqoa tu pa totoqona juke isa sa na juke, ko sa tolanga vaniria sira doru pa leo ruma. 16 Ko agou ba mi tolanga vatale tu sa na miu kabere ko ira na tinoni mai batiria na miu roiti jongadi, ko mai vatarasaea sa na Tamamiu pa noka,>> sau si Jisu.

Na Vaivagigalaina Na Vavanau ti Mosese

17 <<Kita mu roroqua agou sa ara qa lame ko ma jegaria sa na Vavanau tai Mosese babi na vaivagigalai tadira na tinoni kokorotai qau kita mugu. Ara qake lame ko ma jejegara goto ma vavaokoto tu qau. 18 Ura ma pojanigou sosoto ara sagou: tinganai mina maragutu sa na oka beto na peso, sa bi mija tu mina mumuri pa Vavanau sa kai leta ikete babi gasi ikete, tinganai mai gore votu beto mai tu sira doru sakasava. 19 Ko sa vei sa na tinoni sa vakeporea kame ira na kobu garunu ikete aipira beto sa vagigalainiria ira na goto tinoni ko mai veiniria tugu isa, sa mina tapoja na tinoni kepore veveina pa binangara pa noka sa na tinoni isa. Goto na tinoni sa vataberia beto sa vaivagigalainiria, sa mina tapoja na tinoni poreveveina pa binangara pa noka sisa. 20 Ma pojanigou ara sagou: vei na miu tuvisi minake pugele nyonyoa jolania na tuvisi tadira qai vaivagigalainia na Vavanau beto na Parese, poni sa munake isongo boka tomea agou sa na binangara pa noka,>> sau si Jisu.

Na Vaivagigalaina Na Kokora

21 <<Qu tei nongoroniamiu tugu agou sa isa pira sau perangana tadira pa moa, <Munake varivai,[a] beto ko isa sa varivai sa kode mina gosoria na vaituti,> sau. 22 Ba ara ma pojanigou sagou: na tinoni sa kokorania na tasina sa mina gosoria na vaituti. Isa pira biunia na tasina, <Ao na batu kokove,> biunia, sa mina lao pa koti tadira na tinoni Jiu. Isa pira biu, <Ao na duduvili,> biu, sa mina lao pa iku pa heli.[b]

23 Ko sa vei sa vei bu korapa vaivanania pa ia vavakukuvuna ao sa na mua vaivana poni sa ketakoi tu sa bu roroqu kamua ao sa kai sela qu roitinia ao tana tasimu, 24 poni sa mu loa vakolea ketakoi pa moena na ia vavakukuvuna sa na mua vaivana ko mu mule riu bulea mai sa na tasimu beto sa mu lao vaivanania sa na mua vaivana. 25 Mu sisiqarai bulea na mua kana totonai qu korapa lalaomiu pa soana, kita na mua kana mi valaogo tana tinoni vaituti, ko na tinoni vaituti mi valaogo tana na nabulu kopu, ko isa mi gona tomenigo pa ruma vaipiu. 26 Ma poja sosotonigo ara sao: kode munake isongo votu taloa ketakoi sao tinganai muna lipu vaokotia na poata bebetona,>> sau si Jisu.

Na Vaivagigalaina Na Babarata

27 <<Qu tei nongoroniamiu tu agou sa isa pira sau perangana, <Munake babarata,>[c] sau. 28 Ba ara ma pojanigou sagou: na tinoni sa dodoro nyoroguania gu sa kai rereko iviva, sa sa tei baratia tugu pa bulona isa sisa. 29 Ko vei na mata kale matuamu ao sa bi vavukeligo, sa mu ujolia ko mu gona palenia. Ura vei kai kobu tinimu ao sa bi takobu pale sa isa sa jongana jolania na tini dorumu ao bi tagona lao pa heli. 30 Beto vei na lima kale matuamu ao sa bi vavukeligo ao, sa mu kobua ko mu gona palenia. Ura vei kai kobu tinimu ao sa bi takobu pale sa isa sa jongana jolania na tini dorumu ao bi tagona lao pa heli,>> sau si Jisu.

Na Vaivagigalaina Na Vailoa Tamabaragoso

(Matiu 19.9; Maka 10.11-12; Luke 16.18)

31 <<Ego pira sau sa perangana, <Isa mi loa pale na maqotana sau sa mi vania na pepa vailoa sa na maqotana,>[d] sau. 32 Ba ara ma pojanigou: na tinoni sake vaiputa taviti goboro na maqotana ba sa loa pale goboro, sa sa vababaratia sa na rereko api beto na marene sa nagoa na rereko sa taloa pale api ba sa babarata tugu,>> sau si Jisu.

Na Vaivagigalaina Na Maulu

33 <<Qu tei nongoroniamiu mutugu agou sa isa pira sau perangana, <Munake tetea na mua maulu, goto muna vagore votua sisa qu maulu laonia tana Bangara,>[e] sau. 34 Ba ara ma pojanigou: muke isongo maulu totonai mu roitinia kai taringunguti. Muke maulu lao pa noka, ura isa sa na ona totoqona bangara na Tamasa. 35 Muke maulu lao pa peso, ura isa sa na ona tetetena na nenena isa. Muke maulu lao pa Jerusalema, ura aza na gugusu tana Bangara lavata. 36 Beto muke maulu lao pa batumu, ura kai lage vurungumu gu ba quke boka vakekai babi vakukudea. 37 Goto na miu paranga sa mi E gu tonai mi E beto mi Dai gu tonai mi Dai. Goto vei kaki paranga mule muna jokeleniria, poni sa ira na koko veidi gu tana kutana nikerena sira,>> sau si Jisu.

Na Vaigigalaina Na Raja Vaibei

(Luke 6.29-30)

38 <<Qu tei nongoroniamiu tugu agou sa isa pira sau perangana, <Isa sa vapalekai na matamu sa mu vapalekai na matana, beto isa sa valovea na mua patu sa mu valovea na ona patu,>[f] sau. 39 Ba ara ma pojanigou: muke raja beini ikerena sa na ikerena. Goto bi poaria kai tinoni na papara kale matuamu, sa mu balinga lao vania mule keta pa kale merimu ao. 40 Vei bi nyorogua toni lao rajanigo pa vaituti sa kai tinoni ko mi teku variunigo na mua soti biu, sa mu vamalumu vania tugu vei na mua koti ao. 41 Vei kai tinoni bi jujukigo ko mu pogoso vania kai maelo biunigo, sa mu tuti pogoso vania karu maelo tu ao. 42 Na tinoni sa tepago sa mu vania, beto na tinoni sa nyorogua tekua gu mai tamu biu sa muke uku peleni tu,>> sau si Jisu.

Roroquria Na Mua Kana

(Luke 6.27-28, 32-36)

43 <<Qu tei nongoroniamiu tu agou sa isa pira sau perangana: <Muna roroqua na tavitimu,[g] beto munake tavaraguania na mua kana,> sau. 44 Ba ara ma pojanigou sagou: mu roroquria ira na miu kana beto mu vavara tokaniria ira qai komitigou, 45 ko mu tuna na Tamamiu pa noka sagou ura isa na ona tapo sa vaalanganiria ira na tinoni ikeredi beto na tuvisidi beto na okoro sa vagoreniria ira na tinoni jongadi beto ira na seladi. 46 Ura vei ira gu qai roroqugou sa muna roroquria agou, poni na pinia sa muna tekua? Ira gu na tinoni teteku takisi ba qai bokadia roitinia sisa. 47 Beto vei muna gosoro qeqeraniria ira na miu baere gu sagou, poni sa qu oqoro roitinia kai sa bi goto sagou. Ira gu na tinoni rodomo ba qai bokadia roitinia sisa. 48 Ko agou sa mi maladoruru na miu vairoqu vei tugu na Tamamiu pa noka ba sa maladoruru na ona vairoqu,>> sau si Jisu.

<- Matiu 4 Matiu 6 ->