1 Totonai mai toga pa Jerusalema qarigu ko qai kamu pa Betipezi isa pa Kubo pa Olive si Jisu beto ko ira na ona sepele, poni sa sa garunu lao momoeniria i Jisu sira karu ona sepele, 2 pira sauniria, <<Mu lao pa gugusu pa moemiu kai karovona lao poni. Ko isa tugu muna lao kamu sa kode muna batia agou karu sa kai dongiki na tapiko vaturu kolena tavitia kai tuna. Mu ruvatia sa na dongiki beto mu toni lameniria taqu. 3 Vei mai parangagou kaki tinoni, poni sa pira munagu, <Na Bangara sa nyoguania,> munagu, sa kode mai vamalumu vanigou,>> sau sisa.
4 Ko sa taroiti vei pira sapi ko sa gore votu sa na paranga tana Bangara sa lame vei tana tinoni kokorotai, isa pira sau,
6 Ko qai taloa lao sira karu sepele, ko qai roitinia tugu sisa vei sa garununiria i Jisu. 7 Qai toni kamunia ira karu sa na dongiki beto ko na tuna, beto ko qai lovasa vamakeleniria ira pa pokotodi sa na dia koti beto sa koi si Jisu. 8 Ira na minete tinoni lavata qai lovasaniria na dia koti sa na soana, goto kaki qai kaele teku gou ko qai lovasa vakoleniria pa soana. 9 Na puku minete tinoni sa qai rerege pa moena beto pa liguna i Jisu beto qai kukuku,
10 Totonai sa tome lao pa Jerusalema si Jisu, sa sa kirikanoko sa na gugusu doruna, <<I sei sa?>> qarigu.
11 Poni sa qai oe lao sira na pupuku minete qai tutia isa, <<Isa na tinoni kokorotai sapi, i Jisu pa gugusu Nazareti pa Qalili,>> qarigu sira.
12 Ego ko sa tome lao pa kakabarena na zelepade si Jisu ko sa adu vovotuniria sira doru qai korapa vavai beto qai vavainiria na sakasava pa kakabarena zelepade, beto sa peluku vaopo paleria sira na tevolo tadira na tinoni bebei poata karovodi beto ira na totoqodi tadira qai vavainiria na kuru vavakukuvudi. 13 Beto sa pira sauniria sira, <<Pira sau sa na Kukuti Tabuna, <Na qua ruma sa mina takukunia na ruma vavarana,>[c] sau, ba agou sa qu roiti veinia na bevi ovovona tadira na tinoni raja ikikodi,[d]>> sauniria.
14 Ego ko qai lao tana pa kakabarena zelepade sira na leqa beto na qao, ko sa salanaria isa. 15 Ba ira na kuta iama beto ira qai vaivagigalainia na Vavanau sa qai tagigiri totonai qai batiria na roiti vaivagabaradi sa roitiniria i Jisu beto ko qai nongoria na kukuku irirangadi na koburu pa kakabarena zelepade pira qaqarigu, <<Aroia na Tuna i Devita!>> qarigu.
16 Ko pira qarigunia si Jisu, <<Qu nongororiamua tu ao sisa qai korapa pojai ira inara?>> qarigunia.
17 Ego tonai sa taloa tadira pa kakabarena na zelepade sisa poni sa lao pa Betani ko na bongina sa puta ketakoi.
18 Tonai sa rerege mule ligu lao pa Jerusalema na vuvugei jonga si Jisu, poni sa sa vaia na burana. 19 Ko sa batia sa kai gou piqi pa kekete soana, ko sa lao kamua ba kepore kai vuana bi batia goto gagale equruna gu. Poni sa pira saunia sa na gou piqi, <<Na iamu sa munake vua ligu mule sao!>> saunia. Isa tugu sa paranga vei inara isa, poni sa sake ruavo tugu malei mateona sa na gou isa.
20 Tonai qai batia ira na sepele sa vei inara sa qai gabara vivitigi, ko qai paranga sira, <<Ai sa vei ko sake ruavo tugu malei mateona sa na gou piqi ina?>> qarigu.
21 Poni sa oeria i Jisu, pira sauniria, <<Ma poja sosotonigou ara sagou: vei muna vasosoto beto muneke ruarabeke pa miu rarange sagou, sa kode muna bokai gu agou sisa vei qa roiti veinia ara na gou piqi api. Ba nake mekana gu api, goto vei muna paranga laoa na kubo, <Mu iolo ao na kubo ina ko mu lao vukele pa ivere,> bugu, sa kode mina gore votu gu. 22 Beto vei muna vasosoto sagou, sa kode muna tekua gu agou sisa vei qu tepai pa vavara,>> sau si Jisu.
23 Ego sa mule lao pa kakabarena zelepade si Jisu ko sa korapa vaivagigalai, sa qai kamu nananasia ira na kuta iama beto ira na iviva mamata tadira na tinoni sisa, <<Na neqi sa sa qu isongia ao? I sei sa vanigo na neqi ko qu roitiniria ao sira na sakasava aipira?>> qarigunia.
24 Poni sa oeria i Jisu, pira sauniria, <<Ara ba ma nanasanigou mai kai nanasa. Ko vei muna oe vatalea agou sa kode mana ule vanigou ara sa ai neqi veveina qa isongia ko qa boka roitiniria ara sa na sakasava veveidi pira. 25 I sei sa vania na neqi si Jone beto sa paputaiso tinoni? Na Tamasa ba na tinoni?>> sau sisa.
27 Ko qai oea gu si Jisu, pira qarigunia, <<Dai, qeke gigilai i sei sa vania na neqi si Jone beto sa paputaisoria na tinoni,>> qarigu sira.
29 <Koi, ara daiqua,> sau sa na tuna moa, ba sa sovai poni sa bei roroqu ko sa riu tugu.
30 Beto sa lao mutugu tana tuna pa ligu sa na tamadi ko sa garunu veinia mutugu isa sa poja veinia na tuna moa, poni sa pira sa oe veinia, <E, jongana, tamaqu,> saunia, beto sa sake pavu riu roiti sisa.
31 I sei ira karu pira sa sa roitinia isa sa nyoguania na tamadi?>> sau si Jisu.
33 <<Ego, mu vainongoro lamenia mule kai vavakato vavapada api. Koleona sa kai tinoni sa isongo peso, ko sa roitinia na inuma qurepi, beto sa sa bara vailivutainia. Sa ruri valolua isa sa kai patu ketakoi mina monyo vakolonia na vaini sau. Beto sa sa roitinia kai ruma gegelena ketakoi mai suvere ira na tinoni roiti ko mai kopunia na inuma sau. Ego beto sa sa riu tu soru tinoni ko qai kamu roiti ko qai kopu vania sa na inuma, beto sa sa soni riu lelekogo pa gusu souna sisa. 34 Totonai mi kamua sau sa na totoso lolokete, sa sa garunu laoniria na tinoni poreona inuma sa kaki ona pinausu, ko mai lao tadira na tinoni roiti ko mai teku vania na iana pa ona vuvua pa ona inuma sauniria.
35 Ba qai lao tu ira na tinoni roiti ko qai aru tamanaria sira na pinausu, ko kame sa qai mamajai, kame qai vai vamatea, goto kame mutu sa qai buti tarini patu. 36 Pa liguna isa sa sa garunuria mutugu sira kaki ona pinausu, ira sa qai mota jolaniria ira sa garunu momoeria. Ba qai roiti veiniria mutugu ira sa garunu laoniria momoe. 37 Pa liligu bebeto sa sa garunu laonia tadira sa na tuna sosoto.
38 Ba totonai qai batia ira na tinoni roiti sa na tuna, sa qai kole vavaiparanga, <Api sa na tuna mina teku vakarovoria na isisongo tana tamana! Mei, lame ko ta vai vamate pale beto ta tekua noda sa na isisongo tana!> qarigu. 39 Ko qai lao ko qai ragata tekua, beto qai gona votunia keta peguruna na inuma, ko qai vamate palea sisa,>> sau si Jisu.
40 Beto sa sa nanasa laoria i Jisu sira, <<Ego, vei totonai mina mule lame kamu sa na tinoni poreona inuma, sa na sa beka kode mina roitinia tadira na tinoni roiti pira?>> sau sisa.
41 Poni sa qai oea ira sisa, <<Kode mina vamate paleniria gu isa sira na tinoni ikikeredi inara. Beto kode mina vakarovo lao vaniria tu kaki goto tinoni sa na ona inuma, ira na tinoni mai boka vania na iana totonai mai lolokete,>> qarigu.
42 Poni sa parangaria i Jisu sira, <<Qu oqoro tu vakaberiamiu agou sa na Kukuti Tabuna isa pira sau?
43 <<Ko na binangara tana Tamasa sa mina tateku varijo pale tamugou, ko mina tavalao mule tadira na tinoni karovodi mai boka roiti vavoturia na vua jongadi. 44 (Isa na tinoni sake vasosoto sa mina vei na tinoni sa vukele pa patu ko mina talolomoto. Goto na tinoni sa takoa na patu isa sa mina avuru bilu,[g])>> sau si Jisu.
45 Totonai qai nongoria ira na kuta iama beto na Parese sa na vavakato vavapada ti Jisu, sa qai gigilai sa isa sa korapa gu pojai na veveidi ira qarigu. 46 Ko qai kole popodeke ko bai aru tamania qarigu, ba qai matagutuniria na minete tinoni, ura ira doru tinoni sa qai vasosotoa kai tinoni kokorotai si Jisu qarigu.
<- Matiu 20Matiu 22 ->