1 Ego totonai sa korapa rerege lao si Jisu, sa sa batia isa sa kai tinoni na podo leqana. 2 Poni qai nanasia ira na ona sepele sisa, pira qarigunia, <<Rabi, i sei sa sa sela ko sa podo leqa sa na tinoni api? Na tinoni api, ba ira na tinana na tamana?>> qarigunia.

3 Poni sa oeria i Jisu sira, pira sauniria, <<Na leqa sa vaia na tinoni api sa nake pa ona sela, beto nake sela tadira na tinana na tamana, goto vei gu ko mi bola votu tana sa na roiti tana Tamasa sau. 4 Pinakoi sa korapa kabere na rane, poni sa ara ma roitiniria sira na roiti tana isa sa garunusiu ara, ura na bongi sa korapa nono lame totonai minake boka roiti sa na tinoni. 5 Totonai qa korapa pa kasia gusu sara sa ara tugu sa na kaberena na kasia gusu,>> sau si Jisu.

6 Pa liguna sa poja vei inara isa, poni sa sa odolo pa peso ko sa vanyelakia isa sa na peso beto sa ora laonia pa matana na tinoni leqana. 7 Beto pira saunia sa na tinoni leqana api, <<Mu lao ko mu subi pa lolu pie pa Siloami,>> saunia. (Na ginuana na isongo Siloami sa Na Tagarunu.) Poni sa riu tugu sa na tinoni isa ko sa subi ko sa babata sa na matana beto sa mule lame. 8 Ira kaki tavitina beto ira na tinoni vei qai tei babatiadia tu na kole tetepana isa perangana sa qai vavainanasa, <<Nake isa tugu na tinoni sa kole totoqo tetepa pa poni sapi?>> qarigu.

9 Qai paranga sira kaki, <<Isa tugu sapi!>> qarigu.

Goto kaki qai paranga, <<Dai, nake isa sina, goto sa doro vei gu isa!>> qarigu.

Poni sa paranga mekana sa na tinoni isa, <<E, ara tugu sisa,>> sau.

10 Poni qai nanasia ira sisa, <<Ko ai sa vei beto qai boka tu babata na matamu sao kopira?>> qarigu.

11 Poni sa oeria isa sira, <<Kai tinoni na isongona i Jisu sa odolo vanyelakia na peso ko sa oraniria na mataqu, beto sa garunusiu ko mu lao subi pa lolu pie pa Siloami saunisiu. Ko qa riu ko qa subi poni sa beto qa babata liligu,>> sau.

12 Poni qai nanasia sisa, <<Ko ai sisa?>> qarigu.

Ura! Qake gigilai! sauniria.

13 Ego ko qai toni laonia tadira na Parese sa na tinoni sa podo leqa ina. 14 Isa na ranena sa odolo vanyelakia na peso i Jisu ko sa salania na tinoni leqana isa sa na rane Minere. 15 Ko qai kai nanasa ligua ira na Parese sa na tinoni isa ai vevei sosoto beto qai babata na matana qarigunia. Poni sa pira sauniria, <<Sa orani nyelaka sa na mataqu, beto qa subi poni sa kopira sa qa babataqua,>> sauniria.

16 Poni qai paranga sira kaki Parese, <<Nake koko veina tana Tamasa sa na tinoni isa, ura sake kopunia isa sa na rane Minere,>> qarigu.

Ba kaki sa qai paranga, <<Ba ai sa vei beto sa boka tu roitinia na roiti vinagigila veveidi inara sa na tinoni selana?>> qarigu. Ko sa vaipipikata sa na roroqu tadira.

17 Ko qai nanasa ligua mutugu ira na Parese sa na tinoni isa, <<Ko i sei qugunia ao sa na tinoni isa, ura sa salana vababataria isa sa na matamu ao?>> qarigunia.

Poni sa pira sauniria na tinoni isa, <<Kai tinoni kokorotai qaunia ara sisa,>> sau.

18 Ba qaike vasosotoa tugu ira na tinoni Jiu sa sa leqa perangana ko kopira sa babata sisa, tinganai ko qai kuku tekuria tu sira karu tinana na tamana, 19 ko qai nanasaria, <<Api tugu sa na tumiu marene isa sa podo leqa qugunia agou karu? Ko ai sa vei beto sa boka babata kopira?>> qarigu.

20 Poni qai oeria ria karu tinana na tamana, pira qarigu, <<E, qe gigilaimei sa na tumei marene tugu agei karu sisa, beto ko na podo leqana tugu vei sisa. 21 Ba ai sa vei beto kopira sa boka tu babata sa qeke gigilai, beto ko i sei sa vadodoroa na matana ba qeke gigilai tugu. Isa gu mu nanasia ko, nake koburuna sina! Kode mekana mina ule vanigou na veveina!>> qarigu sira karu. 22 Inara qai paranga vei sira karu tinana na tamana, ura qai matagutuniria ira na tinoni Jiu. Ura qai tei vaivaegonia tu ira na tinoni Jiu sa na tinoni vei mina ule votunia i Jisu sa na Karisito minagu sa mina taiju pale pa ruma vavaikamuna qarigu. 23 Ko sa vei sa qai paranga gu sira karu tinana na tamana na koburu, <<Nake koburuna sina, isa gu mu nanasia ko!>> qarigu.

24 Poni qai kuku ligua na vinarua totoso ira sa na tinoni sa podo leqa, ko pira qarigunia, <<Mu pojai na sosoto pa moena na Tamasa! Ura agei qe gigilaimei sa na tinoni sa salanigo ao ina sa na tinoni selana,>> qarigunia.

25 Poni sa oe sa na tinoni, <<Bi tinoni selana sisa sa ara qake gigilai. Goto kai sakasava gu qa gigilai ara sa qa leqa perangana sara, ba kopira sa qa babata,>> sau.

26 Poni pira qarigunia, <<Ai sa roiti veinigo? Na sa sa roitinia beto sa vababataria na matamu?>> qarigu.

27 Poni sa oeria, <<Na beko qa tei ule vanigou tu, ba qu daimiu vainongoro! Ai sa vei ko qu nyorogua nongoro ligua mutu? Agou ba qu nyoroguania ko bu na sepele tugu tana qugu sagou?>> sauniria.

28 Ko inara sau isa, sa qai paranga sasuria sisa, <<Ao tugu sa na sepele tana poni, goto agei sa na sepele tu tai Mosese. 29 Qe gigilaimei na Tamasa sa paranga sosoto tai Mosese, goto isa na tinoni ina sa agei qeke gigilai pai koko veina sisa,>> qarigu.

30 Poni sa oe sa na tinoni isa, pira sau, <<Koi, ko sa vaivagabara! Ura quke gigilai agou pai koko veina sisa, ba ara sa vababataria tu na mataqu! 31 Taqe gigilaioda gita na Tamasa sake nongororia sira na tinoni seladi, goto ira gu qai madinia isa beto qai tutia na ona roroqu sa sa nongororia isa. 32 Pa moa vei tu totonai sa podalai na totoso sa sake tanongoro podeke sa kai tinoni bi tei vababatai mai tu kai tinoni podo leqana. 33 Ko vei bike lame veina tana Tamasa sa na tinoni api sa bike boka roitinia isa sa na roiti vevei isa,>> sauniria.

34 Poni qai oea ira sisa, pira qarigunia, <<Ao sa na gagale podo lamemu pa sela sao, ba qu korapa nyorogua vagigalaigei agei!>> qarigu. Ko qai iju votu pale pa dia ruma vavaikamuna sisa.

35 Totonai sa nongoria i Jisu sa qai tei iju votu pale tu sisa, poni sa nyaqoa sisa ko sa nanasia, <<Ai sa vei, qu vasosotoa tugu ao sa na Tuna na Tinoni?>> saunia.

36 Poni sa oe sa na tinoni isa, pira sau, <<Bangara, mu ule vanisiu i sei sa na tinoni isa, ko ma vasosotoa!>> sau.

37 Poni pira saunia i Jisu sisa, <<Qu tei batia tu ao sisa, ko isa tugu sa sa korapa parangigo kopira,>> sau.

38 Poni sa paranga, <<Bangara, qa vasosoto sara kopira!>> sau, beto sa kokopo sori tutungu gore pa moena i Jisu.

39 Poni pira sau si Jisu, <<Ara sa qa lame ko mana vaipitu pipikata pa kasia gusu api, ko ira na leqa sa mai babata goto ira na babatadi sa mai leqa,>> sau.

40 Kaki ira na Parese qai somana suvere tavitia isa ketakoi sa qai nongoria sinara sa paranga vei isa, ko qai nanasa laoa, <<Ko agei ba qe leqa qugunigei ao?>> qarigu.

41 Poni pira sauniria i Jisu sira, <<Vei bu leqa sa bi kepore miu sela, ba kopira qu paranga sa na babatamei sagei qugu, ko sa vei sa sa korapa koleona tugu na miu sela sagou,>> sau si Jisu.

<- Jone 8Jone 10 ->