1 Ego pa liguna sa vei inara, sa i Jisu sa lekogo ovikiria na gugusu pa Qalili. Sake nyorogua lekogia isa sa pa Jiudia, ura ira na mamata tinoni Jiu sa qai kole kuonia ko mai vamatea qarigu. 2 Ego sa tei tata tu sa na totoso vavolo tonai qai suvere pa dia aqaqo sira na Jiu. 3 Poni pira qai paranga lao vei tana sira ka visa tasina marene, <<Mu tava turu tu ao ko mu sae pa Jiudia ko ira na mua sepele mai batiria sira na mua roiti vaivagabaradi qu roroitiniria! 4 Ura na tinoni sa nyorogua tagigila vakabere sa kepore kai roiti sa roitinia pa paena! Ao sa qu korapa roitiniria sira na sakasa inara, ko mu bola votu tu tana kasia gusu ko mai gigilago sao!>> qarigu. 5 (Ura mekadi gu ira ka visa tasina ba qaike vasosotoa sisa.)

6 Poni sa parangaria i Jisu sira, <<Na totoso taqu sa sa oqoro kamu. Goto agou sa doru totoso sa na miu totoso gu. 7 Agou sa sa boka tavaraguanigou na kasia gusu, goto ara tu sake tavaraguanisiu ura ara qa ululenia sa nona roiti sa na ikikeredi qaunia. 8 Agou sa mu sae tu somana pa vavolo, goto ara sa maneke sae pa vavolo ina, ura na qua totoso sa oqoro kamu,>> sauniria.

9 Ko inara sa paranga vei sisa, beto sa suvereona tugu pa Qalili.

10 Ego pa liguna qai tei sae tu pa vavolo sira ka visa tasina, poni sa isa ba sa tuti sae tugu, ba sake rerege vakakabere pa vaikamu tinoni goto sa rerege gogolomona tu. 11 Ego ko ira na tinoni Jiu sa qai kole nyanyaqoa sisa pa vavolo isa, <<Ai sisa?>> qarigu.

12 Qai kole vaimamanasa golomonia ira na tinoni pa vaikamu sa na veveina i Jisu. Kaki qai paranga, <<Na tinoni jongana sisa,>> qarigu. Goto kaki sa qai paranga, <<Dai, sa toni varururaria na tinoni sina,>> qarigu. 13 Ba kepore sa kame bi paranga votu lolodakania sa na veveina i Jisu, ura qai matagutuniria ira na mamata tinoni Jiu.

14 Ego totonai sa tei vaikorapai tu sa na vavolo poni sa sae pa kakabarena zelepade ko sa kole vaivagigalai si Jisu. 15 Ko qai kole gabara sira na mamata tinoni Jiu, ko qai paranga, <<Ai sa vei ko nake sikuluna, ba sa gigalai jola tu sa na tinoni ina?>> qarigu.

16 Poni sa oeria i Jisu sira, pira sauniria, <<Isa qa vaivagigalainia ara sa nake vaivagigalai taqu, ba nona tu na Tamasa isa sa garunusiu. 17 Na tinoni sa malumu roitinia sisa sa nyoroguania na Tamasa sa kode mina gigilai na veveina na qua vaivagigalai. Kode mina doro pikatia sa vei na koko lame veina tugu tana Tamasa sa babi na qua gu mekaqu. 18 Na tinoni sa vavavakato mulenia na veveina mekana sa sa korapa gu nyaqoa na valavata mulenia mekana. Goto isa sa nyorogua valavatia sisa sa garunia isa, sa isa sa na sosotona beto kepore kai sakasa sesekena sa kole tana. 19 I Mosese tugu sa vanigou ko na Vavanau, ba kepore kame agou bi vatabea sa na Vavanau. Ai sa vei qu korapa tu nyorogua vamatesiu sara?>> sau si Jisu.

20 Qai oe lao sira na minete tinoni, <<Qokolo, sa vituligo gu na tomate ikikerena sao! I sei sa korapa nyogua vamatego sao?>> qarigu.

21 Poni sa oe lao si Jisu, pira sau, <<Kai roiti vaivagabarana gu sa qa roitinia ara, poni qu gabara beto tu sagou doru. 22 I Mosese sa garunugou ko mai tapobe sira na tumiu marene sau (ba nake i Mosese sa roiti momoenia sa, goto ira na miu tite tu qai podalai momoenia), ko qu popoberia agou pa rane Minere sira na koburu marene. 23 Ko vei pa rane Minere bi tapobe sa na tinoni ko vei ko mike tamaja sa na Vavanau ti Mosese, poni sa ai sa vei sa qu tagigirinisiu tu sara tonai qa salana vajongai kai tinoni pa rane Minere? 24 Muke pitua na toa peguruna tana tinoni, goto mu pitua na vaipitu tuvisina tu,>> sau si Jisu.

25 Poni pira qai kole vavainanasa vei sira kaki tinoni pa Jerusalema, <<Nake tinoni ina sa qai korapa nyorogua vamatea ira na mamata? 26 Ko doro! Sa korapa paparanga lolodaka, ba kepore kame pori vei biu lao tana! Palu qai gigilaidia ira na mamata sa isa tugu beka sa na Karisito? 27 Ba totonai mina lame sa na Karisito, sa kepore kai tinoni mina gigilai ketakoi na lame veina sisa. Goto na tinoni api sa gita taqe tei gigila betoaoda tugu gita ketakoi na lame veina,>> qarigu.

28 Ego ko totonai sa korapa vaivagigalai pa kakabarena zelepade si Jisu, sa vevela votu, <<Ai sa vei, qu gigila vatalesiumiu tugu agou beto qu gigilaimiu ketakoi na lame veiqu sara? Ara sa qake lame pa qua neqi mekaqu, goto isa tu sa garunusiu sa na sosoto, ba agou quke isongo gigilai tu sisa. 29 Ara qa gigilaiqua sisa, ura ara sa na koko veiqu tana beto ara sa isa tugu sa garunusiu,>> sau si Jisu.

30 Poni qai nyorogua aru tamania ira sisa, ba kepore kame bi ulini limana sisa, ura sa oqoro kamua sa na totoso tana. 31 Ba kubo tinoni pa vaikamu tinoni sa qai vasosotoa sisa, beto pira qarigu, <<Totonai mina lame na Karisito, sa ai vei kode mina roitiniria tugu isa sa na soku roiti vinagigila jolaniria vei sa roitiniria na tinoni api?>> qarigu.

32 Qai nongoro vaia ira na Parese sa qai kole vaimamanasania na veveina i Jisu ira na tinoni, ko qai garunuria ira na Parese beto na kuta iama sira na nabulu kopu, ko mai lao aru tamania si Jisu qariguniria. 33 Poni sa pira sauniria i Jisu sira, <<Ara sa mana suvere iapeki totoso mule tamugou, beto sa kode mana laoqua tana isa sa garunusiu. 34 Ko kode muna nyaqosiu ara sagou ba munake boka batisiu, beto ketakoi mana lao suvere ara sa agou munake boka lao,>> sau.

35 Ego ko totonai qai nongoria ira na Jiu inara sau isa, sa qai vavaiparanga mekadi, <<Pai sa mina lao saunia isa ko tanake boka batia gita? Mina lao pa kaki gugusu tadira na tinoni Qiriki ketakoi qai korapa ira kaki tavitida tinoni Jiu ko mina lao vaivagigalai tadira na tinoni Qiriki? 36 Na sa ginuana sa na paranga tana? Pira sau sisa, <Kode muna nyaqosiu ara sagou, ba munake boka batisiu, beto ketakoi mana lao suvere ara sa agou munake boka lao,> sau,>> qarigu.

37 Ego pa rane bebetona na vavolo, isa na rane poreveveina, sa sa turu si Jisu ko sa vevela votu, pira sau, <<Isa sa kidepe sa mi lame taqu ko mi buku! 38 Isa sa vasosotosiu ara, sa kode mina vei tugu sa pojai na Kukuti Tabuna, kode mina bubukala votu pa bulona na tinoni isa sa na kolo toana,>> sau. 39 (Isa saunia i Jisu sa na Gagalana na Tamasa isa ira mai vasosotoa isa sa mai tekua. Ba oqoro taiania ira sa na Gagala Tabuna pa totoso isa, ura sa oqoro turu mule sae pa ona neqi lavatana tana Tamana si Jisu.)

40 Ego ko kaki tinoni pa vaikamu sa tonai qai nongoria sa na parangana i Jisu, sa qai paranga sira, <<Sosoto, isa sosoto tugu sa na tinoni kokorotai lavatana sa tavera!>> qarigu.

41 Qai paranga sira kaki goto, <<Api sa na Karisito!>> qarigu.

Goto kaki mule sa qai paranga, <<Dai, nake pa Qalili mina votu lame vei sa na Karisito! 42 Na Kukuti Tabuna sa pojaiona tu sa na Karisito sa mina lame pa tutina i Devita ko mina podo pa Betilihema tu, na gugusu ketakoi sa suvere i Devita sau,>> qarigu.

43 Ko pa veveina gu i Jisu, sa sa tapipikata sa na minete tinoni. 44 Kaki ira sa qai nyorogua aru tamania si Jisu, ba kepore tugu kame ira bi uli laoni limana sisa.

45 Ego ko totonai qai mule kamu sira na nabulu kopu pa zelepade, sa qai nanasa sira na kuta iama na Parese, pira qarigu, <<Ai sa vei ko quke toni lamenia sisa?>> qarigu.

46 Poni qai oe lao sira na nabulu kopu, pira qarigu, <<Oqoro pore kai tinoni bi paparanga vei sa paranga vei na tinoni api,>> qarigu.

47 Poni qai paranga sira na Parese, <<Ko agou ba kopira sa tei toni vapirugou tugu isa? 48 Ai sa vei, qu tei gigilaimiu tu agou sa kai mamata babi kai Parese bi tei vasosotoa mai tu sisa? Bi mija tu! 49 Ira na minete tinoni pira sa qaike tavagigalania sa na Vavanau, ko kode mai gosoria na vinakilasa tana Tamasa ke!>> qarigu sira na Parese.

50 Poni sa i Nikodimasi, isa sa lao tai Jisu kai bongi, sa parangaria, 51 <<Na tutina pa oda Vavanau sa gita taqeke oqanai pitua sa na tinoni totonai sa oqoro tanongoro mai ko bi oqoro tagigila sisa sa roitinia na tinoni isa,>> sau.

52 Poni qai oea ira sisa, pira qarigunia, <<Ko ai vei, ao ba kai tinoni Qalili tugu ke, oko? Mu tiro vilotia tu na Kukuti Tabuna ko, beto sa muna gigilai sa na tinoni kokorotai sa minake votu lame vei pa Qalili,>> qarigunia.

53 (Ego ko qai okoto mumule riudia pa dia gugusu sira doru tinoni.

<- Jone 6Jone 8 ->