Jone 2

Na Vaialava Pa Kena

1 Ego pa vinaue rane sa sa taroiti sa kai inevanga vaialava pa Kena pa Qalili, ko na tinana i Jisu sa korapa ketakoi. 2 Ko i Jisu beto ko ira na ona sepele ba qai somana tasoru valao tugu pa vavolo vaialava isa. 3 Totonai sa pidili sa na buku vaini, poni sa paranga laoa i Jisu sa na tinana, <<Tuqu, sa betoniria na vaini sira,>> sau.

4 Poni sa paranga si Jisu, <<Ko na savana taqu beto tamu sa vei ina, tinaqu? Ara ba na qua totoso sa oqoro kamua,>> sau.

5 Poni sa parangaria na tinana sira na nabulu, <<Muna roitinia gu agou sisa vei mina garununigou isa,>> sauniria.

6 Ego na tututi pa vinatarasae tadira na tinoni Jiu sa koledia sa pa kalena na vavalioso, ko na juki vatanana na vei isa sa koledia ketakoi sa ka vonomo bogu patu lavata vuvutugu tarini kolo, padana pa vaikorapaina vitungavulu lima ko kai gogoto manoga lita kame.

7 Ko sa paranga laoria i Jisu sira na nabulu, <<Mu vapugeleniria na pie gagale sa na bogu jagi inara,>> sau. Poni qai vapugele jutuniria na pie tugu ira sira na bogu ira.

8 Beto sa garunuria i Jisu sira, <<Ego kopira mu tinu ko mu pogoso laonia tana tinoni sa kopunia na vavolo,>> sau.

Poni qai pogoso laonia tugu sisa vei sa pojaniria i Jisu. 9 Ko sa buku podekia na tinoni kopu vavolo sa na kolo sa tapeluku vaini poni sa sa valilingia, ba sake gigilai pai sa koko lame vei sa na vaini isa. (Ba ira na nabulu qai tinua na kolo ko qai gigilaidia sa.) Ko sa kukua sa na tinoni sa vaialava, 10 ko pira saunia, <<Qokolo, ira doru tinoni sa na vaini jongana jola mai tu sa qai iia momoea, beto totonai qai tei dori buku tu ira na tinoni sa beto qai iai sa na vaini nake loka jongana. Ba ao sa qu kopu vakolea ko kopira tu qu vavotua sa na vaini jongana jola,>> saunia.

11 Alepi sa na roiti vinagigila momoe sa roitinia i Jisu pa Kena pa Qalili, ko ketakoi sa vatadogoronia isa sa na ona neqi, ko ira na ona sepele qai vasosotoa sisa.

12 Ego pa liguna isa sa qai goredia pa Kepaniami sira Jisu, na tinana, ira tasina marene beto ko ira na ona sepele, ko qai dori susuveredia mai tu ka vivisa rane ketakoi sira.

I Jisu sa Aduria ira qai Vavai pa Kakabarena Zelepade

(Matiu 21.12-13; Maka 11.15-17; Luke 19.45-46)

13 Ego sa tei tata tugu sa na totoso vavolo Alokata tadira na Jiu, ko sa taloa sae pa Jerusalema si Jisu. 14 Totonai sa kamu sisa ketakoi, ko sa rerege lao pa kakabarena zelepade, poni sa batiria sira na tinoni qai korapa vavainiria na bulumakau, na sipi, na kuru, beto ko ira na tinoni bebei poata qai korapa toqo roitinia dia roiti. 15 Poni sa roitinia isa kai gasoro vavaiiriruna, ko sa adu vovotuniria pa kakabarena zelepade sa doru manugu, na sipi, na bulumakau. Beto sa upele vavukele enga paleria sira na tevolo tadira qai bebei poata, ko sa ipaporoniria doru eqa sa na dia poata. 16 Beto pira sauniria sira qai vavainiria na kuru, <<Mu pogoso votu riuniria pa ia lani sira na sakasa pira! Muke roiti veinia na ruma mamaketina sa na ruma tana Tamaqu!>> sauniria.

17 Totonai qai batia ira na sepele inara sa vei, poni sa qai gigila kamua ira sisa vei sa pojai na Kukuti Tabuna, pira sau, <<Tamasa, na qua roroquna na mua ruma ao sa sa iku vuvurunguziu,>>[a] sau.

18 Ego ko tonai sa roiti vei inara i Jisu sa qai lao nanasia ira na mamata tinoni Jiu sisa, pira qarigunia, <<Na roiti vinagigila ai veveina sa muna roiti vanigei ao ko agei mene boka vasosotoa sa qu isongia tugu ao sa na neqi ko muna boka roiti vei inara?>> qarigunia.

19 Poni sa oeria i Jisu sira, pira sauniria, <<Mu jegaria sa na zelepade madina api, beto sa na rane vinaue kode mana vaturu ligua ara sapi,>> sauniria.

20 Poni sa pira qarigu sira na mamata tinoni Jiu, <<Qokolo, ko ka madengavulu vonomo aoro tu qai kole roitinia ira sa na zelepade madina api! Ba ao muna vaturu ligua pa kue rane gu?>> qarigu.

21 Ba na zelepade madina saunia isa sa na tinina gu mekana. 22 Ko pa liguna sa turu mule pa mate sisa, poni sa qai roroqu kamua ira na sepele sisa sa poja veinia isa api. Ko qai vasosotoa ira sa na Kukuti Tabuna beto ko na parangana i Jisu.

I Jisu sa Gigilaiona na Bulodi na Tinoni

23 Ego totonai sa korapa suvere pa Jerusalema pa totoso vavolo Alokata si Jisu, poni sa kubo tinoni sa qai vasosotoa sisa tonai qai batiria na roiti vinagigila sa roitiniria isa. 24 Ba i Jisu mekana sake totoravusuria sira, ura sa tei gigila betoriaona tu isa sira. 25 Beto ko sake nyaqoa tadira na tinoni isa sa na vavakato vinasosoto veveidi ira na goto tinoni, ura isa mekana sa tei gigila vatale betoriaona tu sa na roroqu sa kole pa bulodi na tinoni.

<- Jone 1 Jone 3 ->