1 Pira sau si Jisu, Ara sa na gogou sosotona na qurepi, beto na Tamaqu sa na tinoni umuma. 2 Ira doru kaequ ara qaike vua sa sa kaele paleria isa, goto ira doru kae qai vua sa sa kakabisi valiosoria ko mai boka vua vatale. 3 Agou sa qu tavaliosonia na paranga qa tei pojanigou tu ara. 4 Mu togasa taqu beto ara ba mana togasa tamugou. Na kaena na gasoro qurepi sa sake boka vua tonai mina turu kale mekana, goto mina togasa tugu pa kuta gogouna sisa beto sa mina vua. Ko sa vaitoto vei tugu isa sa agou ba munake boka vua vei munake togasa taqu.

5 Ara sa na gogouna na gasoro qurepi, goto agou sa na kakaena. Isa sa togasa taqu beto ara qa togasa tana, sa isa tugu sa mina vua vatale. Ura kepore kai sa muna bokai sagou vei munake togasa taqu. 6 Isa sake togasa taqu sa sa tagona votu vei pale kai kae gou ko sa mateona. Ko na kae gou vei inara sa qai taboko vaikamu ko qai tagona lao pale pa niku, ko qai tavato pale. 7 Vei muna togasa taqu sagou beto na qua paranga mai togasa tamugou, poni sa isa qu nyoguania ko muna tepai sa kode muna tekua tugu. 8 Tonai muna qua sepele ara sagou ko muna vua vatale, poni sa sa tavalavata sa na Tamaqu ara. 9 Kai muqisi vei na Tamaqu sa roroqusiu sara, poni sa ara ba qa roroqugou tugu sagou. Ko mu togasa pa vairoqu taqu. 10 Vei muna kopuniria sira na qua garunu, poni sa kode muna togasa pa qua vairoqu sagou, kai muqisi vei ara ba qa kopuniria sa na garunu tana Tamaqu ko qa togasa pa vairoqu tana sara.

11 Ira na sakasava aipira sa qa tei ule vanigou tu agou ara ko na qua qera mi kole tamugou beto na qera tamugou mi okoto vatale qau. 12 Api sa na garunu taqu: mu mekarai vairoqu sagou kai muqisi vei tugu ara qa roroqugou sagou. 13 Kepore mutugu sa kai vairoqu sa lavata jolania na vairoqu tana tinoni sa vaivanania nona toa ko sa tokaniria ira nona baere. 14 Ko agou sa na qua baere ara vei muna roitiniria sira qa garununigou ara. 15 Kopira sa qake kukunigou na pinausu ara sagou, ura na pinausu sake gigilai sa isa sa roitinia na ona bangara. Ba kopira qa gigalanigou na baere sagou, ura ira doru sakasa qa nongororia tana Tamaqu sa qa tei ule vanigou tu sagou. 16 Nake agou qu vilesiu sara; goto ara tu sa qa vilegou agou beto qa udukugou ko muna lao vua vatale, ko na vuamiu mi kole jola. Beto ko isa muna tepania na Tamaqu pa isongoqu ara sa mina vanigou tugu. 17 Ko api sisa qa garununigou agou: mu mekarai vairoqu, sau si Jisu.

18 Pira sau si Jisu, <<Vei minake taravaguanigou na kasia gusu, poni sa mu gigila gu sa ara mai tu sa tei ke tavaraganisiu tu. 19 Vei bi na ona na kasia gusu sagou, poni sa na kasia gusu bi roroqu veinigou na ona baere mekana isa sagou. Ba ura nake tana kasia gusu sagou, goto ara tu qa tei vile kalenigou tu pa kasia gusu sagou, ko sa vei sa sake tavaraguanigou na kasia gusu sagou. 20 Mu roqu vakoititia sa na paranga qa tei pojanigou tu: kepore sa kai pinausu sa poreveveina jolania sa nona bangara. Vei mai komitisiu sara, poni sa agou ba mai komitigou tugu; vei mai kopunia sa na paranga taqu, poni sa kode mai kopunia tugu sa na paranga tamugou. 21 Ba ira na sakasa aipira kode mai roiti laoniria tugu tamugou koko vei agou qu pogosia na isongoqu ara, ura qaike gigilai ira sisa sa garunusiu ara. 22 Vei bake lame ko bake pojaniria ara, poni sa baike tagorenia ira sa na dia sela; goto kopira sa maike boka talegasania ira sa na tinajutuna na dia sela. 23 Isa sake tavaraguanisiu ara sa sake tavaraguania tugu sa na Tamaqu. 24 Vei bake roitiniria ara tadira sira na roiti kepore mule kai tinoni bi tei roitiniria mai tu, poni sa baike tagogorenia ira sa na dia sela. Ba kopira sa qai tei batiadia tugu sira qa roitiniria ara, ba qaike tavaraguanisiu tugu sara beto na Tamaqu. 25 Ba inara sa vei sa vei gu ko mi gore votu sisa sa takuti pa dia Vavanau, isa pira sau, <Qaike tavaragua goborosiu sara,>[a] sau.

26 Na vaitokai, isa na Gagala sa kolea na sosoto beto sa koko vei tana Tamaqu, sa mina lame. Ara mana garunu lagere vanigou koko vei tana Tamaqu sisa, ko totonai mina lame sa mina ululenia na veveiqu ara sisa. 27 Beto ko agou ba muna ululenisiu tugu sara, ura pa popodalaina tu na qua roiti ara qu podalai suvere tavitisiu ara sagou.

<- Jone 14Jone 16 ->