Jone 12

I Jisu sa Talumu pa Betani

(Matiu 26.6-13; Maka 14.3-9)

1 Ego ko ka vonomo rane sa kole beto mina kamua sa na rane vavolo Alokata, poni sa sa lao pa Betani si Jisu, pa gugusu sa susuvere i Lazarasi, isa na tinoni sa vaturu mulea pa mate. 2 Ko ketakoi sa qai roiti vania kai tetekuna si Jisu. I Mata sa sa somana vatanania sa na tetekuna isa, beto ko i Lazarasi tugu sa kame ira qai somana teteku tavitia i Jisu pa tevolo. 3 Ego ko totonai sa sa pogoso lamenia i Mere sa kai bogu oela ikete[a] beto umumanga jongana jola sa taroiti pa kai gou nadi ko sa sae jola na vaina. Sa tekua isa sa na oela isa ko sa vuvania pa nenena i Jisu beto sa sa puqa vapidilinia na vurunguna. Ko na givorona na umanga jongana na oela api sa sa pugelia na ruma.

4 Poni sa kame ira na sepele tai Jisu, i Jiudasi Isikarioti (isa na tinoni kode mina gabala kanai i Jisu), sa pira sau, 5 <<Ai sa vei ko sake tavavainia sa na oela api? Bi boka tatekuni kue gogoto poata siliva ko bi tokaniria ira na tinoni vaivasevidi sa na oela api!>> sau. 6 (Ba sa paranga vei inara si Jiudasi nake vei ko sa roroquria ira na tinoni vavaivasevidi sa, goto na tinoni ikikona sisa. Na baiki poata sa isa sa popogosia, ko koledia na totoso sa mamavo rarau golomona poata.)

7 Poni sa pira sau si Jisu, <<Mu loai, tari tu! Muke kotia ko mi tutini ona roroqu sisa sa vatanania na ranena mana tagolomo ara. 8 Ura ira na tinoni vaivasevidi sa kode munake beto isongoria agou, goto ara sa kode munake isongosiu lalaomiu agou,>> sauniria.

Ira na Tinoni Mamata qai Kukitinia i Lazarasi

9 Ego ko qai nongoronia ira kai minete tinoni lavata si Jisu sa korapa ketakoi qarigu, poni sa nake i Jisu gu mekana sa qai laonia, goto vei ko mai dogoria tugu vei si Lazarasi, isa sa vaturu mulea pa mate i Jisu qarigu. 10 Ko ira na kuta iama sa qai kukitinia ko mai vamatea tugu vei si Lazarasi qarigu, 11 ura pa ginuana isa ira soku tinoni Jiu sa qai taloadia ko qai vasosotoa si Jisu.

I Jisu sa Tavabangara pa Jerusalema

(Matiu 21.1-11; Maka 11.1-11; Luke 19.28-40)

12 Ego ko sa rane ligu neqa, poni sa qai nongoronia ira na minete tinoni qai vaikamu pa vavolo Alokata sa i Jisu sa korapa tome lalameona pa Jerusalema qarigu. 13 Poni sa qai kaele tekuria na kaedi na gou pamu ko qai votu lao gogosoria sisa ko qai kuku vevela, pira qarigu,

<<Aroia!

Sa tamana sisa sa lame

pa isongona na Bangara,

na Bangara pa Izireli!>>[b] qarigu.

14 Sa tekua i Jisu sa kai dongiki ko sa koia, ko sa gore votu sisa vei sa takuti pa Kukuti Tabuna, pira sau,

15 <<Muke matagutu,

ao na gugusu pa Zaione!

Dotu! Na mua Bangara

sa korapa lame ina!

Sa koi pa kai tuni dongiki sisa,>>[c] sau.

16 (Ira na sakasava aipira sa perangaina sa qaike gigilai na ginuana ira nona sepele, goto tonai sa tei taovulu sae tu si Jisu sa beto qai soni roroqu kamua ira sa na veveina gu isa sa na kukuti aipira beto ko na sakasava aipira sa qai roiti laoniria ira tana.)

17 Ko ira na tinoni qai somana batia si Jisu tonai sa kuku votunia pa bevi ko sa vaturu mulea pa mate si Lazarasi sa qai kole ululenia sa na veveina isa. 18 Ko sa vei sa ira na minete tinoni qai lame gosoria sisa, ura qai tei nongoronia tu ira sa na roiti vinagigila sa roitinia isa. 19 Ko qai kole vavaiparanga mekadi sira na Parese, pira qarigu, <<Taqe batia sa kopira? Kepore kai sa taqe bokai sa gita! Doro! Na kasia gusu doruna sa kopira sa qai tutiadia isa,>> qarigu.

Ira Kaki Tinoni Qiriki qai Nyaqoa i Jisu

20 Ego kaki ira na tinoni Qiriki sa qai somana sae vatarasae pa totoso vavolo Alokata. 21 Ko ira sa qai lao ti Pilipi (isa sa kai tinoni pa Betiseda pa Qalili), ko pira qarigunia, <<Bangara, agei sa qe nyorogua dogoria i Jisu,>> qarigunia.

22 Poni sa lao si Pilipi ko sa pojania si Aduru, ko ira karu qai mekarai lao pojania si Jisu.

23 Poni sa oeria i Jisu sira, <<Sa tei kamu tu sa na totoso ko mina tavalavata sa na Tuna na Tinoni. 24 Sosoto pa sosoto ma pojanigou ara sagou: vei minake tavavuvusu mai pa peso ko mina mate mai tu sa na kiko vuiti, poni sa kode mina kole gu koleona sisa. Goto vei mina mate mai tu sisa, poni sa kode mina vua vasoku sisa. 25 Na tinoni sa roqua nona toa sa kode mina saivia tugu sisa, ba na tinoni sake rabekia nona toa pa kasia gusu api poni sa isa sa kode kopunia nona toa ko mina kamua na toa jola. 26 Isa sa nabulunisiu ara sa mi tutisiu, ko ketakoi mana suvere ara sa na qua nabulu ba mi suvere tugu. Isa sa nabulunisiu ara sa na Tamaqu tu mina valavatia sisa,>> sau si Jisu.

Na Tuna na Tinoni Mina Tavamate

27 Beto pira sau mule si Jisu, <<Kopira na buloqu ara sa sa mamata taduanga, ko na sa managu sara? <Tamaqu, mu vasaresiu pa totoso api,> managu? Ba isa tugu sa na ginuana qa lamenia ara, ko mana gosoria tugu ara sa na totoso vitigi api. 28 Tamaqu, mu valavatia nisongomu!>> sau si Jisu.

Poni sa lagere vei pa noka sa kai ovovele, pira sau, <<Qa tei valavatia tugu ara sisa, ko mana kai valavatia mutugu,>> sau.

29 Poni sa ira na minete tinoni qai korapa turu ketakoi ko qai nongoria na ovovele sa qai paranga, <<Koi, na paka oka!>> qarigu. Goto ira kaki pira qarigu, <<Dai, kai mateana sa parangia sina!>> qarigu.

30 Poni sa oeria i Jisu sira, pira sau, <<Nake pa ginuaqu ara sa sa lame sa na ovovele api, goto pa ginuguamiu tu agou. 31 Kopira sa na totoso tapitu tana kasia gusu api, ko kopira mina taadu votu sa na bangarana na kasia gusu api. 32 Tonai mana taovulu sae vaiolo pa kasia gusu sara, sa kode mana vatata lameria ara taqu sira doru tinoni,>> sau. 33 (Tonai sa paranga vei inara isa, poni sa ulenia isa sa na soana vei beto mina mate isa.)

34 Poni qai oe laoa ira na minete tinoni sisa, <<Agei qe nongoronia pa Vavanau sa na Karisito mina toa kamua na kamua. Ko ai sa vei sa kode mina taovulu sae vaiolo sa na Tuna na Tinoni qugu tu sao? I sei tu sa na Tuna na Tinoni api?>> qarigu.

35 Poni sa oeria i Jisu sira, <<Iapeki totoso mule mina kole tamugou sa na kabere. Mu rerege tonai qu korapa isongia na kabere, ko na rodomo mike udegou. Ura na tinoni sa rerege pa rodomo sa sake gigilai ketakoi sa lao vei sisa. 36 Ko tonai qu korapa isongia sa na kabere sa mu vasosotoa sa na kabere, ko mu vei na tinoni sa suvere pa kabere,>> sau si Jisu.

Ira na Jiu Qaike Vasosotoa si Jisu

Ego pa liguna sa paranga vei inara, poni sa sa taloa riu suvere vapaeona si Jisu. 37 Sa tei roitiniria tugu i Jisu pa moedi ira doru sira na roiti vinagigila aipira, ba qaike vasosotoa ira sisa. 38 Ko na kokorotai ti Aisea na tinoni kokorotai sa sa gore votu gu sisa pira saunia,

<<Bangara, i sei sa vasosotoa

na mei vavakato?

Beto ti sei mina tadogoro

sa na neqi tana Bangara?>>[d] sau.

39 Ko vei beto qaike boka vasosoto sa isa tugu vei sa pojai mule tugu i Aisea, pira sau,

40 <<Sa tavaleqa na matadi

beto sa patei na bulodi,

ko na matadi qaike boka dodogoro

beto na bulodi qaike vakoinonoa kai sa

ko qaike boka gabala mule lame taqu,

goto bai vei ira sa ba salanaria ara sira,>>[e] sau.

41 Aipira sa sa pojaria i Aisea ura sa batia na vinalavata tana Karisito ko sa vei sa sa vavakatonia na veveina isa.

42 Koledia tugu sira sokudi na tinoni mamata qai vasosotoa isa ba qaike ule votunia na dia vinasosoto, ura qai matagutuniria ira na Parese kita mai taiju pale pa ruma vavaikamuna qarigu. 43 Ura qai nyoroguania ira sa na vinalavata tadira na tinoni jolania na vinalavata tana Tamasa.

Na Paranga ti Jisu sa Vaipitu

44 Ego beto sa vevela votu si Jisu, pira sau, <<Isa sa vasosotosiu ara sa nake ara gu sa sa vasosotosiu isa, goto isa tugu sa garunusiu vei ara. 45 Beto ko isa sa batisiu ara, sa sa batia tugu sisa sa garunusiu ara. 46 Qa tei lame vei tu na kabere tana kasia gusu sara, ko ira doru qai vasosotosiu ara sa maike suvere pa rodomo. 47 Na tinoni sa nongororia na qua paranga ba sake kopuniria, poni sa nake ara qa pitua sisa. Ura ara qake lame ko ma pitua na kasia gusu qau, goto qa lame ko ma aloa tu na kasia gusu qau. 48 Isa sa dainisiuona ara beto sake teku vakataparia na qua paranga, sa sa koleona sisa mina pitua isa. Na paranga qa tei pojai tu ara sa isa tugu sa mina pitua pa rane liligu sa na tinoni isa. 49 Ura ara sa qake vavakato pa qua neqi mekaqu, goto isa tu na Tamaqu tu sa garunusiu sa isa tu sa vanisiu na garunu ko na sa mana pojai beto na sa mana vavakatonia. 50 Ko qa gigilaiqua ara sa na garunu tana sa na toa jola. Ko ira na sakasava qa vavakatoniria ara, sa isa tugu sa vavakato veini vanisiu na Tamaqu poni sa isa tugu qa vavakato veini vanigou sagou,>> sau si Jisu.

<- Jone 11 Jone 13 ->