1 Ego ko na vinaego momoe sa koleona sira na uana tolina na vinatarasaena na Tamasa beto koleona sa na aqaqo vavatarasaena beto na madina isa qai roitinia ira na tinoni. 2 Isa na aqaqo sa tavaturu pa kale peguruna sa sa tavaisongo na Ia Madina. Ko ketakoi qai kole sa na juke vitu kaena beto na tevolo sa kolea na bereti sa tavaivana lao tana Tamasa. 3 Pa liguna na toba poko vinarua sa kole sa na aqaqo sa tavaisongo na Ia Madina Jola. 4 Ko ketakoi qai kole sa na tevolo tabuna sa tapoko qolo ko ketakoi qai tavavakukuvu na sakasa umumanga jongadi beto ko na Bokese Binaqara sa ulenia na vinaego tana Tamasa. Na Bokese Binaqara isa sa tapokonia na qolo beto pa leona sa kole na jagi qolo sa kurai na mana, na kolu opata ti Eroni sa nyorunia na equru, beto karu kipa patu rerevatadi ketakoi qai takuti ira na Vavanau vinaego tana Tamasa. 5 Pa narena na bokese isa qai vatururia sira na mateana na vinagigilana na Tamasa sa suvere ketakoi, ko na babanadi sa qai revata lao vei pana udena na bokese ketakoi qai tavulasa sira na sela tadira na tinoni. Ba nake lani sa mana kilipuputuria ara sa doru sakasa aipira.

6 Ego inara qai tavatana vei sira na sakasa ketakoi. Ko ira na iama sa qai tome lao pa aqaqo momoe pa kale peguruna doru totoso ko qai roitinia sa na roiti tana iama. 7 Ba na aqaqo vinarua pa leona sa na kuta iama lavata gu sa boka tome laoa, ko kai totoso gu pana kai aoro sa boka tomea isa sa na Ia Madina Jola isa. Tonai sa tome lao sa na kuta iama lavata sa sa pogoso tomenia isa sa na orungudi na manugu sa vavakukuvuniria ko na vulasana nona sela mekana beto na vulasadi na sela qai roiti kaleniria ira na tinoni. 8 Na Gagala Tabuna sa vakabere vatatalea pana vinatana vei pira tonai sa korapa turuona sa na aqaqo pa peguruna poni sa na soana lao tomena pa Ia Madina Jola sa sa oqoro bola votu. 9 Ko na aqaqo peguruna api sa na vinapapadana sa udukia na totoso kopira. Na ginuana sa na vaivana beto na manugu qai tavavakukuvu lao tana Tamasa sa qaike boka valiosia sa na monanana na tinoni sa vatarasaea na Tamasa. 10 Ura na sakasa pira sa na gagani gu, na buku gu, beto kaki soana vei qai vulasa muleniria mekadi gu ira na tinoni. Na totoli tuvisi pana peguruna gu na tini sa aipira, ko qai tavaroiti tinganai gu mina kamua sa na totoso tonai mina vakoregaria doru sakasa na Tamasa.

11 Na Karisito sa tei lame tu ko isa sa na kuta iama lavatana pana sakasa jongadi taqe isongoria gita kopira. Na aqaqo madina ketakoi sa roiti isa sa poreveveina jola beto sa lioso jola, beto ko nake ira na tinoni qai roitinia sa na aqaqo isa, ko na ginuana sa nake sakasa taroitina pana kasia gusu api sisa. 12 Ko nake pana neqina na orungudi na qoti beto na bulumakau goto pana orunguna mekana sa sa tomea isa pana kai memeka totoso gu sa na Ia Madina Jola ko sa teku vanigita na tinaruvata kole jolana. 13 Na orungudi gu na qoti na bulumakau beto na kavudi na tuni bulumakau qai taparugu sa qai iparainiria sira na tinoni qaike lioso na dia toa, ko pa soana vei api sa qai boka tavulasa sira na tinoni. 14 Ko vei mina sosoto sa sa vei isa, poni sa ai mina koi vei poreveveina sa na orunguna i Jisu. Pana Gagala kole jolana sa vaivanania tana Tamasa sa nona toa mekana sa vei kai vavakukuvu liosona. Ko na orunguna mina valiosia na monanada pana doru roiti kepore vua jongadi, ko ta boka roiti vania na Tamasa toana.

15 Ko na ginuana vei beto na Karisito sa vatoqoa na vinaego koregana sa vei ko ira sa soruria na Tamasa sa mai tekua na mana kole jolana sa taringungutinia na Tamasa. Ko sa boka gore votu vei pira sa alepi ura na Karisito sa tei mate tu ko sa ruvataria sira na tinoni pana dia roiti ikikeredi qai roitiniria tonai sa korapa koleona sa na vinaego momoe. 16 Pana kalena na paranga vakole sa sa poreveveina sa mina tagigila vatale mai sa sa tei mate tu sa na tinoni sa roitinia na paranga vakole, 17 ura na paranga vakole sa pa liguna tu sa mate na tinoni sa roiti vakolenia beto sa sa kolea na neqi sa na paranga vakole isa. Goto tonai sa korapa toaona sisa, poni sa sa oqoro pore na ona neqi sa na paranga vakole. 18 Ko pana soana vei isa sa na vinaego[a] momoe sa sa tavatoqo tonai sa tavaroiti sa na orunguna na manugu. 19 I Mosese sa ule vaniria mai ira na tinoni sa doru garunu pana Vavanau, beto sa tekuria sa na orungudi na bulumakau beto na qoti ko sa qairi tavitiniria na kolo beto sa vatubulia sa na vulu jijimirina sa tapiko pana kae hisopi ko sa iparainia pana buka beto pana tadira doru tinoni sa na orungu. 20 Beto ko pira sau sisa, <<Api sa na orungu sa vatoqo vamauria sa na vinaego sa garununigou na Tamasa agou ko muna vatabea,>> sau.[b] 21 Ko pana soana vei mutugu isa sa i Mosese sa iparainiria mutugu na orungu sa na aqaqo tabuna beto ko doru sakasa qai tavaroiti pana vinatarasae. 22 Ko pana tutina vei sa tapoja pa Vavanau sa tata doru sakasava gu sa qai tavalioso pana orungu, beto ko na sela sa qai tavulasa pa liguna sa tavuva mai tu sa na orungu.

23 Ko sa poreveveina jola sa ira na sakasa pira, ira na ongudi gu na sakasa pa noka, sa mai tavalioso tugu pana soana vei taqe koni pojai. Ba ira na sakasa pa noka sa na vavakukuvu qai jongana jolaniria tu pira sa na padadi. 24 Ko na Karisito sake tomea sa na Ia Madina ira na tinoni gu qai roitinia beto ko na kirena gu isa na sosotona. Goto sa tomea isa sa pa noka sosoto, ko kopira ketakoi sa korapa turu vanigita pa moena na Tamasa sisa. 25 Doru aoro sa tonai sa tome lao pana Ia Madina Jola sa na kuta iama lavata poni sa sa pogoso tavitinia sa na orunguna na manugu. Ba na Karisito sa nake soku totoso sa tome lao vaivanania sa nona toa mekana, 26 ura vei bi vei isa sa pa popodalaina na kasia gusu ko sa kamua kopira sa bi mate tei soku ngavulu totoso tu sisa. Ba kopira tonai mai okoto qarigu sira na totoso poni sa bola votu kai memeka totoso gu sisa ko sa varijo paleria sira na sela tadira na tinoni tonai sa vaivanania nona toa mekana. 27 Doru tinoni sa mai mate kai totoso gu, beto pa liguna isa sa mai gosoroni vaipitu tana Tamasa ira sa na dia sela. 28 Ko pana soana vei isa sa na Karisito ba sa vavakukuvunia sa nona toa mekana kai memeka totoso gu ko sa pogoso variuria sa na sela tadira soku tinoni. Ko tonai mina lame na vinarua totoso sisa sa nake veveina na sela sa mina lamenia isa, goto mina lame aloria tu sira qai korapa verania sisa.

<- Hiburu 8Hiburu 10 ->