1 Ego enga sae sau si Jekopi sa batia si Isoa, korapa lalamegana tavitiria ira ka madegogoto ona tinoni, ko sa pikataria sa na koburu lao tadira Lia, i Resolo beto karu nabulu rereko. 2 Ego ira na nabulu rereko tavitiria na tudia sa sa vakoleria pa momoe, beto sa tuti si Lia beto ira na tuna, beto ira Resolo i Josepa pa liligu. 3 Beto mekana sa lao pa moedi ira ko sa titi opo gore pa peso ka vitu totoso totonai sa lao tatai na tugana.

4 Ba i Isoa sa abutu ko sa lao gosoria si Jekopi, sa borua beto sa titia na ruana ko sa aoa. Beto ko qai vailulukana. 5 Beto poni sa doro lao si Isoa, sa batiria sira na rereko beto na koburu ko sa nanasa, <<Ira sei sa qai tutigo ao aipira?>> saunia.

Poni pira sau si Jekopi, <<Ira sa na koburu na Tamasa sa vatadogoronia nona roroqu tana mua nabulu sa aipira,>> saunia.

6 Beto sa qai lame tata sira na nabulu rereko tavitiria na dia koburu ko qai titi opo gore pa peso.

7 Beto sa tuti lame si Lia beto ira na tuna ko qai titi opo gore pa peso. Beto liligu qai lame sira Josepa i Resolo ko qai titi opo gore tugu vei pa peso.

8 Beto sa nanasa tu si Isoa, <<Na sa laodi sa doru gogodo papausu qa gosororia pori?>> sau.

Sa pira sau sisa, Dai! <<Ai vei ko mu qeranisiu ao qua bangara qau sa,>> saunia.

9 Poni sa pira saunia i Isoa sisa, <<Tasiqu, ara sa tei soku tu sa na qua sakasava. Mu kopuniria ko mi mua sira vei qu isongoria,>> saunia.

10 Ba pira saunia i Jekopi sisa, <<Muna qeranisiu ara ao sa, mu tekuria pa limaqu ara sira na vaivana pira. Ura tonai qa batia na isumatamu ao sa, sa vei puputa qa batia na isumatana na Tamasa, kopira vei qu vakamu vatalesiu ao. 11 Ko bu tekua tu sa na mana taqu sa tapogoso lame tamu, ura na Tamasa sa roroqusiu ko qa isongoria gu sa doru kai sa,>> sau. Ko sa paranga jujukia i Jekopi sisa ko sa tekua i Isoa sa na vaivana.

12 Beto pira sau si Isoa, Ego! <<Vatana ko aria ta mekarai riuoda. Ara kode mana vavaburogou,>> saunia.

13 Ba pira saunia i Jekopi sisa, <<Ao na qua bangara qu gigilaimua sa na koburu qai oqoqanai munyala beto ko mana dodogororia tugu vei na tuni sipi beto na tuni bulumakau qai korapa susu. Ko vei mai tatoni sasasuruniria pa kai rane poni kode doru na papausu mai mate beto. 14 Ko muke vei ao na qua bangara, mu riu momoemua goto ara mana mavo tugu tututiqua tutiria tugu na rijodi na gogodo papausu pa momoe pira beto na rijodi na koburu, tinganai mana kamugo pa Seia,>> saunia.

15 Poni pira sau mutugu si Isoa, <<Ego mina vei sa, ma loa vanigo ropi kaki tinoni taqu ko mai vavaburogo,>> saunia.

Sa nanasa tu si Jekopi, <<Ai sa vei ko mu roiti vei mutu inara qugu?>> <<Sa pada gu sa qu tavaraguanisiu ara ao na qua bangara qau,>> saunia.

16 Ego ko na rane tugu isa sa gabala ko sa riuona pa Seia si Isoa. 17 Goto i Jekopi sa lao pa Sukoti ko ketakoi sa vaturua kai ona ruma beto ira na papausu sa roiti vaniria na aqaqo susuverena. Ko sa vei sa, sa tavakukunia Sukoti sa na ia isa.

18 Pa liguna sa koko pa Padani Arami si Jekopi, sa kamu vatale pa gugusu lavata pa Sekemi pa Kenani sisa ko sa vaturua nona ia susuverena pa moena na gugusu lavata. 19 Ego ko sa vai tekunia isa kai gogoto poata siliva pa limadi ira na tuna i Hamo na tamana i Sekemi sa kai kobu peso ko ketakoi sa vaturua isa sa nona aqaqo. 20 Ko ketakoi sa vaturua isa sa kai ia vavakukuvuna sa vakukunia El Elohe Izireli.

<- Popodalaina 32Popodalaina 34 ->