1 Ego beto sa paranga lao ti Paula si Aquripa, pira sau, <<Kopira qu tavamalumu gu sao ko muna parangania na veveimu mekamu,>> saunia.

Poni sa alakania na limana si Paula, beto sa paranga nanaqe mulenia mekana, pira sau, 2 <<Bangara Aquripa! Qa doro veinisiu mekaqu qa pera qa turu pa moemu ao sara ko mana nanaqe mulenisiu mekaqu sa pa doru ginugua qai gogorenisiu ara ira na tinoni Jiu. 3 Qu tei gigila vatataleriamua tu ao sira doruna uana beto na toa vaigua tadira na tinoni Jiu, ko sa vei sa qa tepaigo ara sao ko mu vainongoro lame taqu.

4 Na veveina na toa qa toania ara toto vei tu na koburuqu ko podalai tu pa qua toa tadira na qua puku tinoni beto pa Jerusalema sa qai gigila betoriadia ira doru tinoni Jiu. 5 Qai gigila vatalesiudia na totoso kakasana, ko vei mai nyorogua vavakatonia sa boka gu. Qai gigilaidia ira sa pa puku tinoni sa tuti vikivokotia na vinatarasaena na mei Tamasa, qa toa vei kai Parese sara. 6 Ko kopira qa turu tapitu pa moemiu agou sara pa ginuana qa vera gelenia ara sa na taringunguti sa vaniria na Tamasa ira na tamamei pa moa. 7 Ko na taringunguti tugu isa sa qai kole vera gelenia ira ka manogarua mei bubutu ko qai vatarasaea na rane na bongi sa na Tamasa. Ko na vera gelena gu na taringunguti isa sa qai jutu talenisiu ara ira na tinoni Jiu, bangara Aquripa. 8 Ai sa vei sa quke boka tu vasosotoa agou sa na Tamasa sa vaturu muleria pa mate sira qai mate?

9 Ara mekaqu perangana ba qa rove veinia mana kanai tugu sa na isongona i Jisu pa Nazareti, ko mana roitiniria soku ngangangulu qau. 10 Ko qa roitiniria ara pa Jerusalema sira na ngangangulu aipira. Qa teku neqi tadira na kuta iama, ko soku sira qai tutia na Bangara qa vatomeria pa ruma vaipiu. Beto ko totonai qai tapitu ko mai tavamate sira na tinoni vevei ira, poni sa qa somana vaegoqua tugu sara. 11 Beto ko pa doru ruma vavaikamuna soku totoso qa vakilasaria beto qa jujukuria ko mai poja vivikeria sa na dia vinasosoto. Beto ko sa koi vei pugelesiu na tagigiri ko pa goto gugusu tu ba qa nyaqo tututiria tugu ko qa koti vivikereria sira.

Poni sa oe sa na Bangara, <Ara si Jisu isa qu korapa komitia ao. 16 Ba mu tatakole ko mu turunia na nenemu inara! Ura na ginuana qa votu pa tamu sara sa ura qa tei udukigo tu sao ko muna nabulunisiu ara beto ko muna vavakatoniria sira na sakasava qu batiria beto ko ira na sakasava kode mana vabatinigo. 17 Kode mana vasarego ara sao tadira na mua tinoni mekamu beto ko tadira na tinoni karovodi, tadira doru ketakoi mana garunu laonigo ara. 18 Kode muna revangaria ao sa na matadi ira, ko mai gabala loa pale ira sa na rodomo ko mai lame pa kabere beto ko mai loa pale sa na neqi ti Setani ko mai lame tana Tamasa. Ko tonai mai gabala sa mina taleoso na dia sela beto ko mai somana isongo tavitiria ira qai tavalioso tonai qai rangesiu ara,> saunisiu.

19 Ko inara sa vei sa, bangara Aquripa, qake nongoro vapelea mule ara sa na dodogoro lagere veina pa noka. 20 Goto podalai tugu pa Damasikasi beto pa Jerusalema, ko mi lao pa doru gugusu Jiudia beto vei tugu tadira na tinoni karovodi, sa qa kole taraenia ara sa na veveina mai loai na dia sela ko mai gabala mule tana Tamasa, beto mai roitiniria ira sa na roiti mina ulenia qai gabala qauniria. 21 Ko pa ginugua gu aipira sa qai aru tamananisiu ira na tinoni Jiu ara totonai qa korapa pa kakabarena zelepade, ko qai podekia ko mai vamatesiu qarigu. 22 Ba qa isongia gu ara sa na vaitokai tana Tamasa kamua tugu pa rane pa ngeni api, ko kopira qa turu lani ko kopira mana vavakato tamugou doru tinoni, ikete na lavata. Ba kepore mutugu sisa mana vavakatonia goto isa tugu ira na tinoni kokorotai beto i Mosese qai koroto vakolenia kode mina gore votu qarigu. 23 Ko isa qai korotonia ira sa na Karisito mina gosoria na vitigi beto ko isa sa na tinoni momoe mina turu mule pa mate, ko mina ule votunia na kabere tadira na tinoni Jiu beto tadira na tinoni karovodi,>> sau si Paula.

24 Ego totonai sa korapa paranga nanaqenia mekana vei inara i Paula, poni sa sa vevela lao si Pesitasi, <<Paula, qu tuturu sao! Na gigalai lavata qu isongia sa sa vatuturigo!>> saunia.

25 Poni sa oe lao si Paula, <<Qake tuturu sara, bangara lavata! Ira na paranga sosotodi beto na tavagigaladi gu sa qa korapa pojaria ara. 26 Ti bangara Aquripa isa qa korapa paranga laoa ara sa na sakasava aipira sa sa gigilariaona. Qake boka vasosotoa ara sa vei bike gigilai isa sa na sakasava aipira biu, ura nake pa ia paena qai taroiti sa aipira. 27 Bangara Aquripa, qu vasosotoria tugu ao sira na tinoni kokorotai? Qa gigilaiqua ara sa qu vasosotoria tugu ao sira!>> sau si Paula.

28 Poni sa paranga lao ti Paula si Aquripa, <<Pana totoso papakana vei aipira ai vei qu rorovea kode muna pelukia ao sa na roququ ara ko mana vasosotoa ara sa na Karisito?>> sau.

29 Poni sa paranga si Paula, <<Na qua vavara lao tana Tamasa, sa vei bi pa totoso papakana babi na kakasana, sa nake ao gu mekamu goto ira doru tugu vei qai korapa vainongoro lame taqu pa ngeni aipira sa bai vei ara qau, goto isa gu qa tapiu vei ara pira sa buke vei qau,>> sau.

30 Ego beto sa turu sa na bangara i Aquripa, na qavuna i Pesitasi, i Benike, beto ko ira qai toqo tavitiria, 31 ko totonai qai taloa riu sa qai kole vaiparanga, pira qarigu, <<Kepore kai sela bi pada tavamatenia babi tapiunia sa na tinoni api,>> qarigu.

32 Beto sa paranga lao ti Pesitasi si Aquripa, <<Bi boka taruvata gu sa na tinoni api vei bi oqoro tepa lao ti Siza,>> sau.

<- Roiti 25Roiti 27 ->