1 Ego ko qe paranga loloaria agei sira beto sa qe toka karovo vatuvisi lao pa nusa Kosi. Ko qe ipumeka mai tu pa Kosi beto sa qe toka lao kamu sa pa nusa Rodesi, beto koko ketakoi sa qe lao paro pa gusu Patara. 2 Ko ketakoi qe kamua sa kai vaka mi korapa toka lao pa Poinikia sau, ko qe koi ketakoi ko qe toka riu. 3 Qe korapa lalaomei sa qe batia sa na nusa Saeparasi, beto sa qe vakole veinia pa kale merimei sa na nusa isa ko qe gona lao vei pa Siria. Beto sa qe lao paro pa Turosi, ura ketakoi sa sa vagoreria na sakasava sa suranaria sa na vaka. 4 Pa gusu isa qe batiria sa kaki tinoni tana Bangara, ko qe suvere tu tadira ka vitu rane sagei. Ko pa neqi tana Gagala Tabuna sa qai pojania ira na tinoni tana Bangara ketakoi si Paula ko mike sae pa Jerusalema qarigunia. 5 Ba totonai sa okoto sa na mei totoso suvere tadira, poni sa qe taloa riumei. Qai tutigei sira doru rereko beto na koburu ko qai tutigei tugu votu pa peguruna na gugusu. Ko qe gore ovoro sori tutungu pa nole ko qe vavara, 6 beto sa qe okoto vaiparanga loloa. Beto sa qe koimei pa vaka sagei, goto ira sa qai muledia pa dia ruma.

7 Ego ko qe jokelia agei sa na mei rerege koko pa Turosi ko qe lao paro pa Tolemaisi. Ketakoi qe gosoro qeqeraniria sira na tinoni qai vasosotoa na Bangara ko qe suvere tavitiria mai tu kai rane. 8 Pa liguna qe ipumeka sa qe taloa gore pa Sizaria ko qe gore kamu pa ruma ti Pilipi, isa na tinoni sa tataraenia na nongoro jongana beto ko kame tugu ira ka vitu tinoni vaitokai qai vileria pa Jerusalema. Ko pa ruma tana sa qe suvere. 9 Ko na tinoni api sa ka made sira na tuna rereko koregadi qai kokole ulule votunia ira sa na paranga tana Tamasa.

10 Ko qe tei korapa tu suveremei ka vivisa rane ketakoi agei poni sa sa gore lagere koko vei pa Jiudia sa kai tinoni kokorotai na isongona i Aqabasi. 11 Ko sa lame tugu tamigei ko sa tekua isa sa na beleti ti Paula ko sa pikonia na nenena na limana mekana, beto sa pira sau, <<Pira sau sa na Gagala Tabuna, <Na tinoni sa isongia na beleti api sa kode mai piu veinia tugu pira ira na tinoni Jiu pa Jerusalema, beto mai valao vaniria ira na tinoni karovodi sisa,> sau,>> sau sisa.

12 Ko totonai qe nongororia agei sira na paranga aipira, poni sa qe tepa vivitigia agei beto ira tugu na suveredi ketakoi vei si Paula, ko mike sae pa Jerusalema qeunia sisa.

13 Ba pira tu sa oe vei si Paula, <<Na sa qu korapa roitinia sagou ko qu korapa lukana beto mu vatakulangia na buloqu ara qugu? Ara sa qa vanaqiti ko mana gosoria sa nake mekana gu na tapiu, goto na mate tugu vei pa Jerusalema pa isongona na Bangara i Jisu,>> sau. 14 Ko qeke boka vagabalia agei sa na roquna isa, ko qeke pojai mule kai sa, goto pira gu qeu, <<Jongana, na nyorogua tana Bangara mi gore votu,>> qeu gu.

15 Ego ko liguna qai jola sira na rane qe suvere pa Sizaria, poni sa qe qaqiri ko qe taloa sae pa Jerusalema. 16 Ko kaki ira na tinoni tana Bangara pa Sizaria sa qai tutigei tugu agei, ko qai toni laonigei pa ruma ti Manasoni. Kai tinoni pa Saeparasi sisa, beto ko kai tinoni tugu tana Bangara na tei dori sovaina tu sisa.

17 Ego ko totonai qe kamu pa Jerusalema sagei, sa ira na tinoni qai vasosotoa na Bangara ketakoi qai vatoga vatatalegei. 18 Ko sa jola na bongi beto ko sa rane tu neqa sa i Paula sa tutigei ko qe lao gogosoria si Jekopi, beto ko ira doru tinoni mamata ba qai kamu tugu. 19 Ego ko sa beto gosoro qeqeraniria, poni sa sa vavakato kilipuputu vaniria i Paula sira vei sa roitiniria na Tamasa tadira na tinoni karovodi pa ona roiti ninabulu isa.

20 Totonai qai nongoria na vavakato tana poni sa qai vatarasaea na Tamasa, beto pira qarigunia si Paula, <<Koi, tavitimei, qu tei gigilaimua tugu ao sa na kubo tina sira na tinoni Jiu qai tei vasosoto tu, beto ko qai korapa tugu ngangalinia ira doru sa na kopuna na Vavanau ti Mosese. 21 Beto ko kaki nongoro goborodi qai tei tekua tu na veveimu sao. Ko ao sa qu vagigalairia sira doru tinoni Jiu qai suvere vaisomanai tadira na tinoni karovodi ko mai loa pale ira sa na Vavanau ti Mosese beto ko maike poberia sira na tudia marene beto ko maike tutiria mule kaki uana tadagita quguniria qarigu. 22 Ko na sa sa tana roitinia? Ura kode iapeki gu mai nongoronia sa na kamumu ao. 23 Jongana, mu roitinia gu sisa mene pojanigo agei api. Aipira sira ka made tinoni qai tei mauluniria tu mekadi. 24 Ira pira sa mu toniria ao ko mu somana tavitiria beto muna tabara vaniria tugu vei sa na dia vuvulasa valioso, beto sa mai ngabutu vadadalua na batudi sira. Inara mu roiti vei sao ko ira doru mai gigilai sa doru nongoro veveimu ao qai nongororia sa na gagale sesekedi gu, goto ao mekamu ba qu kopunia tugu sa na Vavanau ti Mosese. 25 Goto na veveidi ira na tinoni karovodi qai tei vasosoto tu sa qe tei garunu lao vaniria tu na leta ko qe ule vaniria sa na vivile tadagita ko maike tekuria sa na masadi na manugu qai tavavakukuvu tari lao vaniria na beku, maike tekua na orungu beto maike tekuria na masadi na manugu qaike tavanyoa pale na orungudi, beto ko maike toania na toa lulasana qeuniria,>> qarigu.

26 Ko sa jola kai bongi ko na ranena poni sa toniria i Paula sira ka made ko sa somana vuvulasa valioso sisa. Beto sa sa tome lao pa kakabarena zelepade ko sa vakaberia sa na totoso mina okoto na totoso tana vuvulasa valioso, totonai mina okoto taroiti vaniria na vavakukuvu vuvulasa sira doru sau.

27 Ego totonai sa tata okoto sa na vitu rane vuvulasa, poni sa ira na tinoni Jiu pa Esia qai batia pa kakabarena zelepade si Paula. Ko qai paranga sosori vatagigiriria sira na minete tinoni doruna ko qai aru tamana tekua si Paula. 28 Beto qai kuku vevela sira, <<Agou na tinoni Izireli o! Mei tokanigei! Api sa na tinoni sa rerege betoa doru eqa ko sa kole vaivagigalainia sa na tinoni Izireli, na Vavanau ti Mosese beto na kakabarena zelepade api sa qai kepore veveidi sau. Ko kopira sa toni tomeniria na tinoni karovodi mule sa pa ia api, ko sa vagoboria sa na ia api!>> qarigu. 29 (Na ginuana qai paranga vei ina sa ura perangana qai bati tavitinia isa pa Jerusalema si Toropimosi na tinoni Episasi, ko qai rorovea sa sa toni tomenia tugu i Paula pa kakabarena zelepade sisa qarigu.)

30 Ego ko sa tagigiri gu sa na gugusu Jerusalema doruna, ko qai abutu vaikamu beto sira doru tinoni ko qai aru tamania si Paula, beto qai ragata votunia pa peguruna na kakabarena zelepade. Ko isa tugu qai votu ira sa qai patei gu sa na atakamanadi na kakabarena zelepade. 31 Ko totonai qai korapa mai vamatea ira qarigunia si Paula, poni sa sa sae kamu tana kuta mamata tadira na tinoni vaipera tadira na tinoni Romu sa na nongorona na vaivevela lavata sa podo pa gusu Jerusalema doruna qarigunia. 32 Poni sake mamavo mutugu goto sa tekuria gu na tinoni mamata gogoto api sira kaki iviva tadira na tinoni vaipera beto vei tugu ira kaki tinoni vaipera, ko qai abutu gore gu sa tadira na minete tinoni. Ko totonai qai batia ira na tinoni sa na kuta mamata tadira na tinoni vaipera beto ira na tinoni vaipera sa toniria, poni sa qai noso mamajai si Paula.

33 Ego beto sa lao kamu na kuta mamata ko sa aru tamania si Paula, beto sa garunuria sira na ona tinoni ko qai pikonia karu seni si Paula. Beto sa sa kole nanasania sa i sei sa na tinoni api beto na sa sa roitinia isa. 34 Ira kaki tinoni pa vaikamu sa qai vevelania kai sa, goto ira kaki sa qai vevelania goto sa tu. Sake boka gigilai na kuta mamata tadira na tinoni vaipera sa na kutana sosoto na dia vevela ura sa mota sa na vevela. Ko sa garunuria gu sira na ona tinoni vaipera, ko mai toni kesania pa ia susuverena tadira na tinoni vaipera sauniria. 35 Totonai sa kamu pa kekesana poni sa qai pogosia tu ira na tinoni vaipera si Paula, ura sa viva jola sa na tagigiri tadira na minete tinoni, 36 ko na minete tinoni sa qai vevela tututi, pira qarigu, <<Vamate palea sisa!>> qarigu.

37 Ego ko qai tata toni tomenia pa leo ia susuverena tadira na tinoni vaipera, poni sa sa paranga laoia i Paula sa na kuta mamata tadira na tinoni vaipera, <<Ai vei ma boka parangigo mai ara sao?>> saunia.

Poni sa oe lao sa na kuta mamata tadira na tinoni vaipera, <<Qokolo, qu balaumua na paranga Qiriki sao? 38 Eo ko nake ao mei sa na tinoni Ijipi pa visa ina sa vaipera lao tana qavuna tana Romu beto ko sa toni laoniria pa qega sira ka made tina tinoni vaivamate!>> sau.

39 Poni sa paranga si Paula, <<Ara sa kai tinoni Jiu pa gugusu pa Tasosi pa ia pa Silisia, ko na tinoniqu sosoto pa gugusu poreveveina isa sara. Qa tepago, mu vamalumusiu mai ko ma parangaria ira na tinoni pira,>> sau.

40 Ko tonai sa vania na vinamalumu na kuta mamata tadira na tinoni vaipera sisa, poni sa turu pa kekesana si Paula ko sa alaka vamomokoniria na limana sira na tinoni. Ko tonai qai noso beto ira doru, poni sa paranga lao pa paranga Aramaiki sisa.[a]

<- Roiti 20Roiti 22 ->