Roiti 2

Na Gorena Na Gagala Tabuna

1 Ego totonai sa kamua sa na rane Penitikositi, poni sa qai mekarai suvere vaikamu pa kai ia sira doru aipira. 2 Totonai sa sa ovanga vasiboro lagere vei pa vavagalo sa kai sa sa vei na ovangani popogoso gava lavata, ko sa vapugelia sa na leona na ruma qai korapa suveria ira. 3 Beto sa qai batia ira sa kai sa sa vei na iku sa memea tapipikata sa lagere toqo tadira okokoto tinoni ketakoi. 4 Ko ira doru sa sa pugeleria na Gagala Tabuna, beto ko qai podalai paranganiria ira sira na gogoto paranga pa boboka ovelai paranga sa vaniria na Gagala Tabuna.

5 Ego ko qai korapa tugu suveredia ketakoi pa Jerusalema sira na tinoni Jiu neneqidi pa vatarasaena na Tamasa, ira na koko lame veidi pa okokoto puku tinoni pa kauruna na oka. 6 Ko tonai qai nongoria sa na ovanga lavata api, poni sa qai vaikamu sira na mota tinoni ko qai rura gu mai koledia, ura qai okoto kole nonongorodiaria gu sira na okokoto dia paranga qai paranganiria ira.

7 Ko qai kole rura beto qari gabara, ko pira qarigu, <<Dotu, kue qokolo! Ira doru tinoni qai korapa paranga aipira sa na gagale tinoni Qalili beto tu! 8 Ba ai sa vei ko gita taqe korapa tu nonongororiaoda pa okokotoda paranga sira na sakasava qai korapa pojaria ira? 9 Ura gita sa na okoto lame veida tu pa Patia, Midia, Elami, Mesapotamia, Jiudia beto pa Kapadosia, Ponitasi, beto ko pa Esia. 10 Gita kaki mule pira sa na lame veida tu pa Piruqia, Pamipilia, Ijipi, pa eqa pa Libia tata vei pa Saerini, beto kaki gita sa na kokoda pa Romu tu. 11 Na tinoni Jiu beto ko na tinoni karovo gabalada sa gita, kaki gita sa na lame veida pa nusa Kiriti tu beto ko pa Arabia tu, ba taqe okoto korapa nongoro betoriaoda gita pa okokotoda parangana sira na roiti poreveveidi tana Tamasa qai korapa pojaria ira!>> qarigu sira. 12 Ko pa dia gabara beto na rura, sa qai kole vavainanasa mekadi, <<Koi, na sa na ginuana sa vei pira?>> qarigu.

13 Goto ira kaki sa qai vavagoreni qera ko pira qai paparanga vei, <<Koi, sa apo jongaria gu na vaini lomosona ko qai digere sinara!>> qarigu.

Na Paranga Ti Pita Pa Rane Penitikositi

14 Ego ko totonai sa turu pa vaikorapaidi ira ka manogameka tinoni tagarunudi si Pita ko sa paranga vivivaria ira na minete tinoni, pira sau, <<Ka visa tinoni Jiu tavitiqu beto ko agou doru na suveremiu pa Jerusalema! Mu vainongoro lameniria na qua paranga ko mu gigilai sa na ginuana isa sa gore votu api! 15 Qaike bubuku vadigereniria sira pira, isa vei qu roroqua agou. Nake totoso bubuku sa kopira, ura sa koni sia koloko vuvugei gu sa neqa. 16 Goto isa qu batia kopira sa na vagore votuna na kokorotai ti Joili na tinoni kokorotai, pira sau sisa,

17 <Ego pira mina vei sa pa rane liligu,

sau sa na Tamasa:

Mana vakijara tariniria ira doru tinoni na qua Gagala.

Ko mai ule votunia ira na tumiu marene

beto na tumiu rereko sa na qua nongoro.

Ira na sae korega sa mai bati dodogoro,

beto ira na miu babaragoso sa mai putagitaria na putagita.

18 Ko na rane ira sa ira na qua nabulu marene na qua nabulu rereko

ba mana vakijara tariniria tugu na qua Gagala.

Ko ira ba mai ule votunia tugu na qua nongoro.

19 Kode mana roitiniria na sakasava vaivagabaradi pa noka vavagalo

beto na vinagigila neqidi pa peso api,

na orungu, na iku beto na rovu nune tula.

20 Na tapo sa mina rodomo

beto na popu sa mina jimiri orungu,

totonai mina oqoro lame sa na rane lavata tana Bangara.

21 Ba ira doru qai kiu alili lao tana Bangara sa mai taalo! sau sa na Tamasa,>[a] sau si Joili.

22 Ka visa tinoni Izireli tavitiqu, mu vainongoroniria na paranga aipira ko! Isa tugu i Jisu pa Nazareti sa na tinoni sa tavadogoro vaporeveveina pa moena na Tamasa. Ko agou mekamiu ba qu tei dogoro vasosoto vataleria tu sira na roiti vaivagabaradi, na sakasava vaivagabaradi, beto na vinagigila neqidi sa roiti votuniria na Tamasa tana ko qai tabata pa vaikorapaimiu agou. 23 Isa tugu sa na tinoni sa tei vilea tu na Tamasa pa ona nyorogua beto pa ona gigalai perangana tu, beto ko sa taloa valao pa limamiu agou sisa ko agou qu vamatea sisa tonai qu valao vaniria ira na tinoni ikikeredi ko qai patania pa korosi. 24 Ko isa tugu sa sa tei vaturu mulea tu na Tamasa ko sa ruvatia pa vitigina na mate, ura na mate sake boka piu tamana vakole jolai sisa. 25 Ura pira sau sa sa pojai i Devita na veveina isa,

<Qa babatiaqua ara pa moequ doru totoso sa na Bangara,

ura pa kale matuaqu gu sa toqo sisa

ko sa vei sa ara maneke boka tajou vakanoko.

26 Ko sa vei sa sa qeqera sa na buloqu

beto na qua paranga sa pugelia na qera,

beto ko na tiniqu ba mina kole toa gegele lao momoe.

27 Ura ao muneke vakole jolasiu pa ia tadira qai mate sara,

beto muneke loa pale na mua Liosona

ko bi kole nyabo goborona.

28 Qu tei vabatinisiu tu sa na soanana na toa,

beto na mua suvere somana taqu

sa mina pugelenisiu na qera,>[b] sau.

29 Ego ko, ka visa tavitiqu, ma lodaka vanigou gu ara sa na veveina i Devita na bangara, isa na tamada pa moa. I Devita sa sa mate ko sa tagolomo, ko na pouna isa sa sa korapa gu kole tavitigita gita kamua tu pa rane pa ngeni alepi. 30 Ko i Devita ba kai tinoni kokorotai tugu ko sa gigilaiona isa sa pa maulu tu sa taringungutinia na Tamasa sa na veveina kame ira pa tutina i Devita sa mina toqo bangara vei i Devita.[c] 31 Ko sa tei doro lao momoea tu i Devita sisa mina roitinia na Tamasa vuka risa, ko sa vei sa sa pojai isa sa na veveina na turumule tana Karisito, pira sau,

<Isa sake taloa pale pa ia tadira qai mate,

beto na tinina sake taloa pale goboro

ko bi kole nyabo goborona,>[d] sau.

32 Ko isa tugu i Jisu isa sa sa vaturu mulea na Tamasa pa mate, ko agei doru pira sa qe bati vataleamei ko mene boka vavakatonia gu sa vei isa. 33 Ko sa taovulu sae pa kale matuana na Tamasa. Ko sa tekua isa sa na Gagala Tabuna isa na taringunguti tana Tamana, beto sa sa vuva lagerenia ko isa sa qu batia beto qu nongoria agou kopira. 34 Ura i Devita sake sae pa noka, ba pira tu sau sisa,

<Na Bangara Tamasa sa parangia na qua Bangara:

Mu toqo pa kale matuaqu,

35 tinganai mana veiniria na mua tetetena pa nenemu

sira na mua kana,>[e] sau.

36 Inara sa vei ko mu gigila vatalea agou doru tinoni Izireli sapi: sa tei vabangaria tu beto sa vakarisitoia na Tamasa sa isa tugu i Jisu api, isa agou tugu qu vamatea pa korosi,>> sau si Pita.

37 Ego ko totonai qai nongororia ira na minete tinoni sira na paranga aipira, sa sa tasuni sa na bulodi, ko qai paranga laoa i Pita beto ira doru tinoni tagarunudi, pira qarigu, <<Ko, boko tavitimei, na sa sa vei mene boka roitinia agei sa vei?>> qarigu.

38 Poni sa pira sauniria i Pita, <<Agou doru sa mu okokoto gabala ko mu tapaputaiso pa korapa isongona i Jisu Karisito ko mai taleoso sira na miu sela, beto sa muna tekua agou sa na vaivana tana Tamasa, isa na Gagala Tabuna. 39 Ura na taringunguti tana Tamasa api sa tamugou tugu, tadira na tumiu agou beto tadira doru qai suvere pa souna, ko tadira doru gu ira na Bangara na oda Tamasa mina kukuria,>> sau si Pita.

40 Ego ko soku paranga mule sa sa poja vaneneqiniria i Pita beto ko sa kole tepa vaneneqiniria, pira sauniria, <<Mu alo mulenigou pa vinakilasa mina gosoria na sasae tinoni sa tei rerege vapiru tu api!>> sauniria. 41 Ko ira qai vasosotoa na paranga ti Pita sa qai tapaputaiso, ko pa rane tugu isa sa papada kue tina tinoni sa qai somana taanye tamo lao tadira na tinoni tana Bangara. 42 Qai somana ngangalinia ira sa na vaivagigalai tadira na tinoni tagarunudi beto na toa mekarai vaiia, na toa mekarai teteku beto na mekarai suvere vavara.

Na Toa Tadira Qai Vasosotoa Na Bangara

43 Ego ko qai kole matagutu sira doru tinoni tonai qai batiria soku roiti vaivagabaradi beto na vinagigila neqidi qai kole roroitiniria ira na tinoni tagarunudi. 44 Goto ira qai vasosoto sa qai mekarai suvere vaikamu beto qai mekarai vaiisongainiria sira doru dia sakasava. 45 Ko na dia isisongo beto na dia sakasava sa qai okoto vavainiria ko na poatadi sa qai okoto ia betoniria ira qai vaivasevi. 46 Na vaituti rane gu sa qai mekarai kamenia ira sa na lao vavara pa kakabarena zelepade beto na mekarai vaikamu teteku pa okokoto ruma. Qai mekarai vaitekuniria na gagani pa qeqera beto pa bulo pangaga. 47 Qai vatarasaea na Tamasa beto qai tavaraguaniria ira na minete tinoni. Ko na vaituti rane gu sa na Bangara sa anye vatamo lao vaniria sira qai taalo.

<- Roiti 1 Roiti 3 ->