1 Ego totonai qai lao kamu pa Ikonioni poni sa qai lao mutugu tome pa ruma vavaikamuna tadira na tinoni Jiu sira Paula i Banabasi, ko qai vavakato vaneqi poni sa na motadi sira na tinoni Jiu na tinoni karovodi qai vasosoto. 2 Ba ira na tinoni Jiu qai daidia vasosoto sa qai sori vatagigiriria beto qai vainuria sa na roqudi ira na tinoni karovodi, ko qai kanaria sira na tinoni qai vasosotoa na Bangara. 3 Ko na sovaina sa qai kole suveredia mai tu pa Ikonioni sira karu, ko qai kole varenenia ira karu sa na taraena na veveina na Bangara. Ko na Bangara sa vabatiniria na sosotona sa nona nongoro vaialona, ko sa roiti votuniria pa limadi ira karu sira na vinagigila beto na roiti vaivagabaradi. 4 Qai pikatarua sira na tinoni pa gugusu isa, ko kaki sa qai kole vei tugu tadira na Jiu qaike vasosoto, goto ira kaki sa qai kole vei tugu tadira karu tinoni tagarunudi.

5 Ego ko sa kamua sa na totoso totonai qai vatoqoa na roqudi sira kaki tinoni karovodi na Jiu (beto ko tataviti ira na dia tinoni mamata), ko mai komiti vivikereria beto mai gonaniria na patu sira karu qarigu. 6 Ba totonai qai gigilai ira karu tinoni tagarunudi sa na roroqu tadira, sa qai uku laodia pa gugugusu pa Lukaonia, pa Lisitara, pa Debe, beto tinganai vailivutaidi na gugugusu ira. 7 Ko ketakoi qai vavakatonia mule ira karu sa na nongoro jongana.

8 Ego na suverena tugu pa Lisitara sa kai tinoni sa qao ko sa kole gu toqona. Na podo qaona tugu sisa ko sake isongo boka tugu na rerege. 9 Na tinoni isa sa sa kole nonongoro pa vavakato ti Paula. Sa doro vatotogasia i Paula sisa, ko sa dogoro gigilai sa koleona na ona rarange ko mina boka tasalana gu sisa, 10 poni sa kuku viva laoa i Paula sisa, pira saunia, <<Mu turu vatuvisiniria na nenemu!>> saunia. Poni sa gasa turu tugu sa na tinoni isa ko sa podalai gu rerege.

11 Ego ko tonai qai batia ira na puku minete lavata sisa vei sa roitinia i Paula, poni sa qai okoto kuku irangia pa dia paranga Lukaonia, pira qarigu, <<Ira na tamasa sa qai tei peluku tinoni tu, ko qai gore lagere tadagita pira!>> qarigu. 12 I Banabasi sa qai gigalania na tamasa Zeusi, goto i Paula sa qai gigalania na tamasa Hemesi, ura i Paula sa na kuta tinoni paparanga ira karu. 13 Na zelepade tana tamasa Zeusi sa nake souna pa gugusu isa, ko na iama pa zelepade isa sa pogoso lao bulumakau na teteri avoro pa atakamanana gugusu sisa, ko isa beto ira na minete tinoni sa mai vavakukuvu lao tadira karu tinoni tagarunudi qarigu.

14 Ego ko totonai qai nongoronia ira karu tinoni tagarunudi, ira Banabasi i Paula, sa na roiti qai korapa roitiniria, sa qai bako rikata paleria ira karu sira na dia poko, beto qai abutu sasuru lao pa vaikorapaidi ira na minete tinoni, ko qai vevela laoria sira, 15 pira qarigu, <<Ka visa tinoni! Ai sa vei ko qu korapa roitiniria na roiti pira? Agei karu ba na tinoni vei tugu agou! Ko qe lame vavakatonia tamugou agei karu sa na nongoro jongana, ko mu gabala loa paleria agou sira na sakasava kepore veveidi inara ko mu gabala lao tana Tamasa toana, isa sa roitinia na oka na peso na ivere beto ko doru sakasava qai okoto kole pa ia ira. 16 Pana sasae tinoni qai jola lao pori, sa sa vamalumuria na Tamasa sira na tinoni karovodi ko qai okoto tutiria na dia uana mekadi. 17 Ba sake loa valolokia na Tamasa sa kai sa mina ulenia na veveina mekana, ko sa roitiniria sira na roiti jongadi: sa valagere vanigou na okoro pa noka, sa vavuaria sira na umuma pa dia okokoto totoso, sa vapotenigou na gagani ko sa vapugeleni qeqera na bulomiu,>> qariguniria. 18 Ko qai paranga vei tugu inara sira karu, ba qai dori popodeke vivitigi mutugu beto qai boka vanosoria ko qaike vavakukuvu lao tadira karu sira.

19 Kaki ira na tinoni Jiu lame veidi pa Anitioki beto pa Ikonioni sa qai vagabala vapeleria sira na minete tinoni, ko qai gonani patu si Paula beto sa qai ragata votu pale pa peguruna na gugusu. Ko qai rorovea sa sa tei mate tu qarigunia sisa. 20 Ba totonai qai turu vaiidilivutainia ira na tinoni tana Bangara si Paula, sa sa gasa turu sisa ko sa mule tome laona tugu pa gusu. Ko sa bongi beto sa rane neqa poni sa qai taloa lao pa Debe sira kau Banabasi.

21 Ego ko qai vavakatonia pa Debe ira karu Paula i Saula sa na nongoro jongana, ko na kubo tinoni sa qai gabala tutia na Bangara. Beto sa qai gabala mule lao pa Lisitara beto pa Ikonioni, ko qai jola lao pa Anitioki isa na gugusu pa Pisidia. 22 Ko pa dia rererege qai vaneqiria sa na bulodi ira na tinoni tana Bangara, qai paranga vaneqiria ko mai togasa vamauru pa dia rarange, ura soku tapata sa kode tana gosororia mai tugu beto tana tomea sa na binangara tana Tamasa qariguniria. 23 Qai vileria pa okokoto ekelesia sira na iviva mamata, ko qai vavaraniria beto qai madiniria nake teteku, beto sa qai loa laoniria tana Bangara isa qai vasosotoa ko mi toniria qarigu. 24 Ego beto sa qai rerege jolania ira sa pa Pisidia ko qai lao kamu pa Pamipilia sira karu. 25 Pa Peqa qai vavakatonia ira karu sa na nongoro tana Bangara, beto sa qai gore pa Atalia. 26 Ketakoi sa qai toka mule pa Anitioki, pa gugusu ketakoi qai tavamadi pa vairoqu vaialona tana Tamasa ko qai roitinia sa na roiti isa qai koni vaokotia.

27 Totonai qai mule kamu paro pa Anitioki sira karu sa qai kuku vaikamunia sa na ekelesia ketakoi, ko qai ule vaniria sira doru sakasava sa roitinia na Tamasa pa dia roiti qai roitiniria. Beto ko qai vavakatonia tugu vei sa isa vei sa revanga veinia na Tamasa sa na soana ko qai boka vasosoto ira na tinoni karovodi. 28 Beto sa qai suvere vasovaidia mai tu tadira na tinoni tana Bangara ketakoi sira karu.

<- Roiti 13Roiti 15 ->