1 Ka visa baere jonga, na qua leta vinarua lao tamugou sapi. Pana karu doru qua leta sa qa podeke vangangalia ara sa na miu roroqu jongana ko muke mumaniria sira na sakasava aipira qau. 2 Ara qa nyoguania ko vakoititiria agou sira na paranga perangaina tu qai pojaria ira na tinoni kokorotai beto ira na garunu qai ule vanigou ira na tinoni tagarunudi totonai qai vavakato vanigou na veveina noda Bangara isa sa alogita. 3 Sa poreveveina jola sa agou mu vakoititiria sa aipira. Pana rane vinabebetodi sa kode mai lame sira na tinoni vavalededi qai tututia na dia nyorogua ikikeredi ko mai vavaledenigou sagou. 4 Kode pira mai paranga vavalede veinigou, <<Beko sa tei taringunguti vakolea tu sa kode mina mule lame sau, oko? Ba sake gore votu tu sa na taringunguti isa! Ira na tamada sa qai toi mate riudia tu ba kepotu kai sa bi bei. Doru sakasava sa qai kopa kole veidia tugu qai kole vei pa popodalaina tonai sa tavapodaka na kasia gusu!>> marigu. 5 Ba qai daidia roqu vakoinonoa ira sa na ginugua alepi. Pa totoso pa moa sa paranga gu na Tamasa sa qai podaka votu sira na oka, beto na kasia abana sa podaka votu pa kolo ko sa kole livutia na kolo. 6 Beto ko na kolo tugu sa piaria sa na kasia gusu isa. 7 Ko pana kai muqisi paranga tugu isa sa qai korapa takopu sira na oka beto na kasia abana kopira, ko qai korapa tavanaqiti vania na iku. Ko na oka beto na kasia abana sa kode mina ganiria na iku pana rane vaituti tonai mai tavakilasa sira na tinoni ikikeredi.

8 Ba muke roqu mumania agou sa kai sava api, ka visa baere jonga. Pana tana Bangara sa na kakasana na totoso sa sa kepore veveina. Pana tana Bangara kai rane sa sa vei kai tina aoro beto kai tina aoro sa sa vei kai rane gu. 9 Na Bangara sake korapa vavabonginia sa na vagore votuna na ona taringunguti vei qai rorove veinia sa vei qarigu ira kaki tinoni. Goto isa sa korapa mavo veranigou gu sagou ura sake nyoroguania isa sa kai tinoni bi mate. Ba ira doru tinoni sa sa nyoroguaniria isa ko mai gabala loa pale na dia sela. 10 Ba mina lame vasiboro vei kai tinoni ikikona sa na rane mule lame tana Bangara. Pana rane isa na oka mina mumuri tonai mina tanongoro sa na ovangana na qalalana na iku. Beto ko na sakasava pana oka mai tavurungu ko mai tapiara pale pana iku, beto na kasia abana beto doru sakasava qai taroiti pa korapana sa mai mumuri manyao betodia.

11 Ego qu tei nongoria tu agou sa kode doru sakasava sa mai tapiara vei inara, ko sa vei sa qu gigilaimiu ai muna toa goto vei sa agou. Mu toania na uana liosona beto na pangagana na Tamasa 12 totonai qu korapa verania sa na rane tana Tamasa ko mu vasisiqaraia na lamena na rane isa. Pana rane isa sa mina taqalala ko mina vurungia na iku sa na oka ko doru kai sava sa mai nyoro maragutu betodia. 13 Ba gita sa taqe korapa verania isa sa taringunguti vakole vanigita na Tamasa. Sa taringunguti vakole vanigita isa sa na oka koregana beto na kasia abana koregana, ketakoi sa kole na tuvisi tana Tamasa.

14 Ko inara sa vei sa, ka visa baere jonga, totonai qu korapa veraniria agou sa aipira sa mu podeke vivitigia ko mike tabata kai opopu pana miu toa beto muke roitinia kai sela muna boka tajutunia pa moena na Tamasa beto mu suvere bule tavitia isa. 15 Na Bangara sa korapa vera vamomoso, ko na totoso sa korapa vera vamomoso isa sa mu doro veinia na totoso sa korapa vanigou agou ko mu taalo sau. Ko i Paula na turada pana tana Karisito ba sa tei kuti lao vanigou tu pana gigalai sa vania na Tamasa sa na veveina na mule lame tana Bangara. 16 Ko api sa sa tei pojai tu isa pana doru ona leta tonai sa pojai na veveina na lame tana Bangara. Koledia sira kaki sakasava pana ona leta qaike munyala na vakaberedi ko ira na tinoni rururadi beto ira sake matua na roqudi sa qai ruvata vapiruria sira na sakasava pira. Beto ko kaki kukuti pana Kukuti Tabuna ba qai veiniria tugu. Ko na dia roiti vei tugu isa sa qai korapa teku tariniria na vinakilasa pana rane vaituti. 17 Ko inara sa vei sa, ka visa baere jonga, qu tei gigilaimiu tu agou sa vei pira. Ko mu kopu mulenigou mekamiu beto ira na tinoni ikikeredi maike toni vapirugou kita mai vavukelegou. 18 Mu toa sae pana vairoqu vaialona beto na gigalaina na oda Bangara beto na oda inaalo i Jisu Karisito. Isa sa ta vatarasaea beto ta valavatia kopira, beto ko mi kamua na kamua. Agua.

<- 2 Pita 2