2 Koriniti 5

1 Qe gigilaimei agei sa tonai mina tajegara pale sa na aqaqo isa na tinimei qe suveria pa peso api, sa na Tamasa mina vanigei kai ruma sake taroiti pa lima tinoni beto ko na kole jolana pa noka. 2 Ko pana tini api sa qe kiu alili sagei ura qe nyorogua teku pokonia agei sa na mei susuverena pa noka. 3 Ko totonai mene tei pokonia tu sa na tini isa sa agei meneke vei na tinoni sa gagado. 4 Ura totonai qe korapa suveria sa na aqaqo pa peso api, sa agei qe kiu alili tavitia na takulanga. Ba nake vei ko agei be siqarai gona pale sa na tinimei api qeu sa, goto qe nyoroguania ko be isongia sa na tini koregana pa noka qeu, ko isa na tinimei sa boka mate sa mi tabei lao pana tini sa kole jola. 5 Isa sa tei vanaqiti vanigei tu na bei api sa na Tamasa tugu mekana, isa sa tei vanigita tu na ona Gagala ko na Gagala isa sa na vinasosotona na ona na Tamasa sa gita.

6 Ko agei doru totoso sa qe varene. Qe gigilai sa totonai qe korapa suveria sa na tinimei pa peso api, sa qe korapa sou pana tana Bangara, 7 ura na mei rarange sa sa gaitigei, nake mei dodoro. 8 E, qe varene sagei, ko qe nyoroguania sa be taloa tu sa pana tinimei api ko be lao suvere tavitia na Bangara qeu. 9 Ko bi vei be suvere tu pana toa tinimei api babi pana tini koregana, poni sa agei na mei kuta nyorogua sa me vaqerai gu isa qeu. 10 Ura gita doru sa kode tana bola votu pa moena na totoqona vaipitu tana Karisito. Ko okokoto tinoni sa mai okoto tekua sa na vuana tugu doru dia roiti qai roitiniria pana dia toa tini, bi vua jongana babi vua ikerena.

Na nongoro sa vabaereria lao tana Tamasa ira na tinoni

11 Ko sa vei sa agei qe gigilai sa na poreveveina tana matagutunia na Bangara, ko qe podekeria ko me vagabalaria sira na tinoni qeu. Tana Tamasa sa na kaberena gu ko ara qa nyorogua vasosotoa sa pa monanamiu agou ba na kaberena tugu vei. 12 Qeke korapa vavaporeveveina mulenigei mule pana tamugou sagei, goto qe korapa gu pojanigou na veveimei mekamei ko agou tu sa muna vavaqatanigei. Ko mina vei tu sa muna boka oeria sira qai kemarania sa na veveina na boboka tana tinoni goto nake veveina na uana. 13 Ura vei be doro vei na tinoni rururamei sagei, isa na ginugua pa vaikorapaina na Tamasa beto agei sisa. Vei be doro vei na tinoni tavagigalamei sagei, poni sa mu doro veinia qe korapa parangagou agou. 14 Na vairoqu tana Karisito sa sa bangaranigei ura agei qe vagigila vatalea sa kai tinoni sa mateniria doru tinoni, ko na ginuana isa sa doru tinoni qai somana mate tugu sira. 15 Ko isa sa mateniria doru tinoni, ko ira qai toa sa maike tavaqera muleniria mekadi goto mai vaqerai tu isa sa mate beto sa tavatoa mule vaniria.

16 Ko sa vei sa kopira sa kepore kai tinoni taqe doronia pana dodoro tinoni sa gita. Pa totoso qai jola pori sa taqe doronia pana dodoro tinoni sa na Karisito, ba kopira taqeke doro veinia isa sisa. 17 Ko inara sa vei sa totonai sa kole kame tana Karisito sa na tinoni, sa isa sa na vinapodaka koregana sisa; na toa leluna sa tei mumuriona tu, ko kopira na toa koregana sa lame. 18 Doru sakasava aipira sa na Tamasa sa roitiniria, isa pana oda kole kame tana Karisito sa vaibaerenigita tana mekana beto sa vanigita na roiti ninabulu ko tana vavaibaere laoniria mule pana tana sira kaki goto tinoni. 19 Na oda nongoro sa na veveina pana kole kame tana Karisito na Tamasa sa vaibaere laonia tana mekana sa na kasia gusu. Sake puku tutiria isa sira na dia sela, beto ko sa tei vanigita tu sa na nongorona sa ulenia na soana vei beto mai vaibaere lao tana Tamasa ira na tinoni. 20 Ko agei sa na tinoni paparanga tana Karisito, na Tamasa sa varoitigei ko sa ulenia na ona tepa. Agei qe tepa vania na Karisito: mu baere lao tana Tamasa! 21 Na Karisito sa kepore na ona sela, ba pa laedagita na Tamasa sa vamalumia ko sa vapogosonia na sela ko pana oda somana kole kame tana sa gita taqe somana isongia na tuvisi tana Tamasa.

<- 2 Koriniti 4 2 Koriniti 6 ->