1 Ego na veveina na poata vaivana tokadi ira na tinoni tana Tamasa pa Jiudia sa mu roitinia isa qa vavanau veiniria ira na ekelesia pa Qelesia. 2 Pana rane momoe pana vuiki sa agou mu okokoto vakolea sa kaki poata na padana vei qu bokai, ko mu kopunia. Ko na vaikamudi na poata sa muke verania gu totonai mana lame kamu ara beto mi taroiti. 3 Totonai mana lame kamu sara sa mana garunu laoniria taviti leta vinakabere sira qu tei vaegoria tu ko mai pogosoria sa na miu vaivana lao pa Jerusalema. 4 Bi vei mina pada ko ara ba mana lao tugu vei, poni sa kode mai lao tavitisiu ara sira.

5 Ara kode mana lao ovikigou pa liguna mana rerege jola vei pa Masidonia, ura ara kode mana jola vei tugu pa Masidonia. 6 Ko palu mana suvere tavitigou babi palu mana suvere tugu ketakoi pana totoso lomoso, ko agou ba muna boka tokanisiu ko mana jokelia na qua rererege pa liguna mana taloa ketakoi. 7 Ura ara qake nyoroguania ko ba dogoro aputainigou gu tonai ba rerege jola kopira, goto qa rovea sa pa liligu ba boka suvere tavitigou na totoso kakasana qau vei mina vamalumusiu na Bangara. 8 Ara kode mana suvere pa Episasi tinganai tu mina kamua na rane Penitikositi,[a] 9 ura kai atakamana jongana sa sa kole ko ara mana boka roiti vatalenia sa na vareregena na nongoro jongana, ba qai soku tugu sira na tinoni qai susuqutusiu ara.

10 Vei mina lame tamugou si Timote, sa mu vakamu vatalea pa vaikorapaimiu, ura isa sa roitinia na roiti tana Bangara, sa vei tugu qa vei ara. 11 Ko kepore sa kame agou mi doro vagorea sisa, goto muna tokania ko mina jokele vatalea sa nona rererege, ko vei sa mina boka mule lame taqu, ura ara qa korapa verania ko mina mule lame tavitiria ira na tavitida pana tana Karisito sisa.

12 Goto na veveina na tasida i Apolosi, sa ara qa tepa vivitigia sisa ko bi lao ovikigou sagou tavitiria ira kaki tavitida pana tana Karisito qau, ba sa doro vei nake ona nguti[b] ko mina lame sa kopira. Ba kode mina lame sisa totonai mina tekua na totoso jongana.

13 Mu suvere gegele, mu turu vamauru pana miu rarange, mu varene, mu aru vamauru. 14 Mu roitiniria doruna na miu roiti pana vairoqu.

15 Qu gigilaimiu sa na tatamana ti Sitepanasi. Ira sa na tinoni momoe qai gabala pa Akaia, beto ko qai vania dia toa mekadi pana roiti nabuludi ira na tinoni tana Tamasa. Ka visa tavitiqu, qa tepa vivitigigou ara sagou 16 ko mu vataberia sira na vaitoni tadira na tinoni vevei aipira, beto ko ira qai mekarai somanania beto qai pavu talenia na roiti. 17 Ara qa qerania sa na lamedi ira Sitepanasi i Potunatasi beto i Akaikusi, ura qai tekua sa na lolomo tamugou ko qai tokanisiu. 18 Ko ira qai vamanotia sa na gagalaqu beto vei tugu na gagalamiu agou. Mu nongororia sira na tinoni vevei aipira.

19 Ira na okokoto puku ekelesia pa Esia qai garunu laonia na dia roroqu. I Akuila beto i Pirisila beto na ekelesia sa vavaikamu pa dia ruma sa qai garunu laonia na dia roroqu neqina sa lame vei tana Bangara. 20 Ira doru tavitida pana tana Karisito sa qai garunu laonia na dia roroqu. Mu vaiqeqera lao lame pana soana vaigosoro tana tinoni sa tutia na Karisito.

21 Ara Paula qa kutia sa na qua roroqu api pana limaqu mekaqu. 22 Na tinoni sa keporeona vairoqu lao tana Bangara, sa na leleve mi opo taria sisa! Ao mei Bangara, mu lame! 23 Na vairoqu vaialona tana oda Bangara i Jisu mi somana tamugou. 24 Na qua roroqu mi somana tamugou doru pana oda kole kame ti Jisu Karisito. Agua.

<- 1 Koriniti 15