1 Qa nyoroguania ara ko mu vakoinonoria agou, ka visa tavitiqu, sa ai qai vevei ira na boko tamada noda tite qai tutia i Mosese pa moa. Ira doru sa qai takopu pa kauruna na gavu beto ira doru sa qai karovo vatalea sa na Kolo Jimiri. 2 Ko ira doru sa qai vei na tinoni sa tapaputaiso pana gavu beto pana kolo ko qai mekarai tutia i Mosese sira. 3 Beto ko ira doru qai gania sa kai muqisi gagani pana gagala 4 beto ko ira doru qai bukua kai muqisi buku pana gagala. Ko ira doru qai mekarai buku pana patu gagala isa sa tutiria. Ko na patu isa sa na Karisito. 5 Ba pa liguna tugu qai vei inara ba na Tamasa sake qeraniria sira sokudi, ko sa vei sa sa vaapaparia doru eqa pa qega sa na kokobu tinidi. 6 Ego ko doru sakasa qai gosororia ira aipira sa na vavapada vinabalau tadagita ko take ekekaniria na roiti ikikeredi, vei qai vei ira na tinoni pori. 7 Beto muke vatarasaeria na beku, vei qai vei ira kaki tinoni totonai, ko pira sau sa na Kukuti Tabuna, <<Ira na tinoni qai toqo tetekugadia beto qai bubukugadia beto qai turu peka valulasa,>> sau.[a] 8 Gita take somana roiti valulasa, vei qai vei ira kaki totonai ko sa vei sa pana kai memeka rane gu sa ira rabete kue tina tinoni sa qai mate kikisu. 9 Beto take podekia na Karisito sa gita, qai vei ira kaki qai podekia na Bangara totonai ko sa vei sa sa vamateria na dole. 10 Beto take kole ququmi sa gita, vei qai vei ira kaki totonai ko sa vei sa sa vamateria na mateana vaivamate. 11 Ego ko ira doru sakasa aipira sa qai gosororia ira ko na vavapada, beto ko qai takuti vagore ko na vinabalauda gita. Ura gita sa taqe korapa toa pana totoso tonai sa korapa tata lame sa na vinabebetona. 12 Ko sa vei sa na tinoni sa rove veinia mekana sa tei turu vamauru tu sisa biu, sa mi dodoro vatale kita mi vukele. 13 Doru podeke qu gosororia sa na veveidi qai tei gosororia tu ira na tinoni. Ba na Tamasa sake boka tetea nona paranga, ko minake vamalumu laogou ko bu tapodeke jolania na miu boboka sagou. Goto tonai mina lame sa na podeke sa isa mina vanigou na neqi ko muna boka vangaju palea, ko mina vadogoronigou na soana vovotuna.

14 Ko sa vei inara sa, ka visa qua baere jonga, mu ukunia agou sa na vavatarasae beku. 15 Qa paranga veinigou na tavagigalamiu ara sagou, ko mu doro vilotia mekamiu sisa qa pojai ara. 16 Tonai taqe buku pana kapa taqe varoitia pana vavolo tana Bangara beto ko taqe paranga jonganania tana Tamasa, poni sa taqe mekarai somana pana orunguna na Karisito sa gita. Tonai taqe kipai ko taqe tekua gita sa na bereti, poni sa taqe mekarai somana pana tinina na Karisito sa gita. 17 Ura kame gu sa na batu bereti, ko gita doru sa taqe mekarai teku pana kai batu bereti gu. 18 Mu doria tu na tututi tadira na tinoni Izireli ko! Ira qai gania na vaivana sa tavavakukuvu sa qai somana tugu pana vavakukuvu sa taroiti pana ia vavakukuvuna. 19 Ko na sa ginuana sa isa qa korapa pojai ara? Na gagani sa tavaivana lao tana beku sa sa koleona na poreveveina? Babi na beku sa sa koleona na poreveveina? 20 Dai! Isa qa pojai ara sa na sakasa qai tavavakukuvu pana ia vavakukuvuna tadira na tinoni rodomo sa qai tavavakukuvu lao tadira na tomate ikikeredi, nake tana Tamasa. Ko ara qake nyoroguanigou ko bu mekarai somana tavitiria ira na tomate sagou. 21 Muneke boka bukua na kapa tana Bangara beto bu bukua mutugu na kapa tana tomate sagou. Muneke boka mekarai teku pana tevolo tana Bangara beto bu teku mutugu pana tevolo tana tomate sagou. 22 Ba ai vei taqe nyorogua vatagigiria gita sa na Bangara? Ai vei taqe rove veinia taqe neqi jolania isa sa gita?

23 Bi boka paranga sa kai tinoni, <<Ara qa tavamalumunia ko mana boka roitiniria gu doru sakasa qa nyorogua roitiniria,>> biu sisa. E, sosoto, ba nake doru sakasa sa qai tokania na tinoni. Ara mana boka paranga gu, <<Ara qa tavamalumunia ko mana boka roitiniria gu doru sakasa qa nyorogua roitiniria,>> bau sara, ba nake doru sakasa sa qai vaiovulu. 24 Agou doru muke kole nyaqoa gu na miu nyorogua mekamiu, goto mu doria tu vei na nyorogua tadira na goto tinoni. 25 Qu tavamalumu gu sagou ko muna boka ganiria gu sa na sa bi tavavai pa ia qai vavainiria na masadi na manugu. Ba muke pavu nanasa vivilotonia sa na veveina na gagani isa sa tavavakukuvu lao mai tana beku, ura kita mu vatakulangia na monanamiu. 26 Ura <<na ona na Bangara sa na peso beto doru kai sa qai surana pa peso.>>[b] 27 Vei kai tinoni sake gigilai na Bangara sa bi soru laonigou pana kai vavolo sagou ko bu malumu lao, poni sa mu tekua gu sa na gagani sa tavatana pa moemiu. Beto muke pavu nanasa vivilotonia na veveidi sa na gagani ura kita mi vatakulangia na monanamiu. 28 Ba bi vei kame sa bi pojanigou agou pira biu, <<Na gagani api sa sa tei tavavakukuvu lao mai tu tadira na beku,>> biu sisa, poni sa mu roroqua na tinoni sa ule veini vanigou isa beto kita mu vatakulangia na monanana kame, ko muke tekua sa na gagani isa. 29 Ba nake monanamiu mekamiu agou sa qa korapa pojai ara, goto na roquna tu na goto tinoni. Ura kepore laona sa na tinaruvata taqu mina tapitu pana monanana na goto tinoni. 30 Vei ba paranga jonganania ara sa na gaqu gagani, poni na sa ginuana qai poja vivikerenisiu tu ara sira na gagani qa tei paranga jonganania tu? 31 Ego ko bu gagani, bu buku, babu roiti sagou, sa mu roitiniria sa dorudi pana valavatana na Tamasa. 32 Mu toania na uana vei muneke vavotua kaki tapata tadira na Jiu, bi tadira na tinoni karovodi babi tadira na ekelesia tana Tamasa, 33 vei qa roiti vei ara. Ara qa podekia ko ma vaqeraria doru tinoni pana doru soana qau ko qake nyaqoa gu sa isa vei sa jongana gu taqu. Goto qa nyaqoa tu sa isa vei sa jongana tadira na soku tinoni, ko mai boka taalo qau.

<- 1 Koriniti 91 Koriniti 11 ->